1. Gbɛ mia Baibui ndeni kɔlongɔ Ngewɔ Mahayei ma?

Tɔnya, Yesu Maha yekpe mia a ngie.MAAK 1:40-42.

Ngewɔ Mahayei yɛni a Mahaya lɔ na ngelegohu. I wama ndunyama mahayei jisia kpɛlɛ gbua maa hu, ngi nda Mahayei mia lee a lo. Wati na mia Ngewɔ liima hindei a wue ndunyi hu, sia lee i wuema la ngelegohu. Ngowi yie ji kɔlongɔ Ngewɔ Mahayei ma kpekpengɔ wa le. Wati ma i yaa guani, Ngewɔ Mahayei wama a laha nuvuisia va, tao ta mia lee Mahaya yekpe le nuvuisia va. Tao, ngi Mahayei a waa a ngooyia numui kpɛlɛ luahu ndunyi ji hu.Daniɛl 2:44; Matiu 6:9, 10; 24:14 gaa.

Sia lee Mahin a yɛ Mahaya gbi lee mahu, Jɛhova loko loonga Yesu Klisti ma, kɔ i wote a Maha Ngi Mahayei hu.Hinda Gɛngɔ 11:15 gaa.

2. Gbɛva mia Jɛhova loko looni Yesu ma kɔ i wote a Maha?

Gbɛva see, ngi gbekpengɔ, tao ngi wɔnangɔ. (Jɔn 1:14) I yama gbɔma, kpayei lɔ ngi yeya gbɔva nunga ma, tao ngelegohu mia ngi mahayei gbua ma na kɔ i yɛ ndunyi ji mahu. Ji i wuni hei hu, i lɛilɔ ngelegohu kɛ i heinga ngi Kɛkɛ yejama lukui hu kɔ i mawo. (Hiibrublɛisia 10:12, 13) Na leengɔ woma, Ngewɔ kpaya veilɔ na ngi wɛ, kɔ i tato a Mahayei yayenge la.Daniɛl 7:13, 14 gaa.

3. Yesu tia yeni mia ta Mahayei na yayenge?

Yesu tia kayemableisia mia ti wama Mahayei yayenge ma ngelegohu. (Daniɛl 7:27) Toobla mia halabla le Yesu loko  looni ti ma, nahin ti ma gayengɔ. Jɛhova lɔ ha tuŋ loko looma hinga kɛ nyahanga ma nahin ti gayemangɔ. Sia lee Yesu wuila hei hu, tia bɛɛ, ta wu hei hu a ngafa luwui lɔ.Jɔn 14:1-3; I Kɔrintabla 15:42-44 gaa.

Nunga ti lolɛ mia ti lima ngelegohu? Yesu ti loilɔ a “mbonda wulo.” (Luuk 12:32) Ti jikei mia a 144,000. Tia Yesu nimia ti wama Mahayei na yayenge ma ndunyi ji mahu.Hinda Gɛngɔ 14:1 gaa.

4. Gbɛ mia wueni ji Yesu tatooni a Mahayei yayenge la?

Yesu tatoni a Mahayei yayenge la 1914 hu lɔ. * Hala hindei Yesu pieni, tamia ji i Setana kɛ ngi yafa nyamuisia gbɛni ngelegohu, kɛ i ti yeinga ndunyi ji hu. Setana liilelɔ wa, kɛ i tatonga a hinda nyamuisia wuela ndunyi hu kpɛlɛ. (Hinda Gɛngɔ 12:7-10, 12) I hinje wati na ma, hinda gbagba lɛma lɔ lee gulɔma. Koi, ndɔlei, hingbɛ wawaisia, kɛ ji ndɔɛ a gbɛi. Sawulanga mia jisia kpɛlɛ, ti kɛma, kɛ Ngewɔ Mahayei wama loko wuima ndunyi ji ma hinda hu sange.Luuk 21:7, 10, 11, 31 gaa.

5. Gbɛ mia Ngewɔ Mahayei pie ma, tao i wama pie ma?

A ngowi yia yekpi ji huwue, Ngewɔ Mahayei lɔ fahan waa lɛma mba ndunyi kpɛlɛ hu, kɔ ti yɛ ngooyia hu. Nungei nasia ti mayeingɔ, tia naa waa ma Ngewɔ Mahayei bu, nahin Yesu mia Maha a ngie ti mahu. Ngewɔ Mahayei a ti mabawolɔ, ji i wa ma nunga nyamuisia jukuu ma ndunyi ji hu. Famia nasia kinii ti longɔ ti baoyia majɔɔ, kungɔ ti gaa a kooya ve la Yesu wɛ.Hinda Gɛngɔ 7:9, 14, 16, 17 gaa.

Fo 1,000 na hu, Ngewɔ Mahayei a pie lɔ ngi liima hindei i wue ndunyi ji hu. Ndunyi ji kpɛlɛ a wote lɔ a alijɛnɛ. Na kpɛlɛ leengɔ woma, Yesu a Mahayei yamalɔ gbɔma ngi Kɛkɛ ma. (I Kɔrintabla 15:24-26) Bi numu gbi gɔɔlɔ, nahin ba lo bi ngi gaa kɔlongɔ Ngewɔ Mahayei ma?Saam 37:10, 11, 29 gaa.

 

^ kɔlɔ wumbumi 12 Bi loa bi kɔɔ na Baibui ndeni kɔlongɔ fui ji ma, 1914, bukui ji gaa, Gbɔɔ Vui Baibui Ndeni? kɔlɔ la 215 haŋ i too 218 ma.