Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 8

Mɛsayei Magɛilɔ

Mɛsayei Magɛilɔ

FO 500 leengɔ woma ji Daniɛl kulɔma yei nasia leni, maikei Geblɛ lilɔ nyaha lo yia gama na ngi mbiyei yɛla a Mɛɛli, na gbuani Mahin Devidi le gbambi ma. Geblɛ ndeilɔ ngi ma yɛɛ: “Hoyo, Mbɛlɛmamɔ wa lɔ a bie; Ndemɔi [“Jɛhova,” NW] lɔ bi woma. (Luuk 1:​28) Mɛɛli luwei lɔ tao i yɛɛ a gii ina gbɛva mia maikei na fami na bonda wueni ngi ma.

Geblɛ ndeilɔ Mɛɛli ma kɛ ta mia a Mɛsayei le

Geblɛ lɛilɔ gulɔma a nde la yɛɛ: “Mɛɛri, Baa luwa; gbamaile bia, bi baa jɔɔnga Ngewɔ yama. Kɛ kpee lɛ, ba golɔ, bi hiindolo le, kɛ ba ngi biyɛi lolilɔ a Yesu. . . . Ngewɔ a ngi kɛkɛ Devid maha heimɛi velɔ ngiɛ. . . . Kɛ ngi mahayɛi kɛlɛma ɛɛ yɛ ma.” (Luuk 1:​30-33) Ngowi yekpe wa mia kɛ Mɛɛli mia a Mɛsayei le, na yɛni a “ndui” na ti yɛ a kulɔgbe wue ngi va.

Fui yepekei hu, Mɛɛli Yesu leilɔ Bɛtilɛm. Ye kpindi na ma, maika yia ndeilɔ mbala mahugbebla ma yɛɛ: “Ngi wanga wu gama a ngowili yekpe lɔ a kohunɛ wa . . . gbamaile ti Mbawomɔ lenga ha wu wɛ Devid yeetahu na i yɛni a Kristi, Ndemɔi.” (Luuk 2:​10, 11) Na woma, Yesu mbonda ti li lɔ a ngie Nasalɛt, mia i makɛni na.

Fui ji hu 29 C.E., fo yakpi na hu kungɔ yɛla Mɛsayei ma i gɛ, Yesu tatoilɔ a Ngewɔ layei le la ji ngi vui yɛ a fo “nuu yila gbɔyɔngɔ mahu puu nyɔkɔ.” (Luuk 3:​23) Nunga gboto ti kɔɔilɔ kɛ Ngewɔ mia ngi looni. Fale ti ndeilɔ tɛɛ: “Ngewɔyialemɔ wa i hiyea mu lia.” (Luuk 7:​16, 17) Kɛɛ gbɛ mia Yesu yɛ a nunga gaa la?

Yesu nunga gaailɔ kɔ ti lo a Ngewɔ tao kɔ ti ngi vɛi: I ndeilɔ nunga ma yɛɛ: “Ndemɔi [“Jɛhova,” NW] mu Yewɔɛi yakpe lɔ Ndemɔi le. A lo a Ndemɔi wu Yewɔɛi a wu lii gbi kɛɛ wu yafei [ɔɔ “lɛvui,” NW] gbi kɛɛ wu nɛmahui gbi kɛɛ wu gbayei gbi.” (Maaki 12:​29, 30, NY) I ndeilɔ gbɔma yɛɛ: “Ba mawɛlɛ Ndemɔi bi Yewɔi lɔ gɔwɔ bu, kɛ ta yakpe lɔ ba ngi magbeegbua.”—Luuk 4:​8.

Yesu nunga liinɛpɔilɔ kɔ ti lo a ti nyɔunyɔu: I ndeilɔ ti ma yɛɛ: “A lo a wu heinyɔu kia wu longɔ la a wua yekpe.” (Maaki 12:​31, NY) I ndeilɔ gbɔma ti ma yɛɛ: “Na gbi bi longɔ nunga ti pie a bie, ta mia ba pie a tie; Mojisi jawei yeembui lɔ kɛɛ kaai na Ngewɔ lutuisia ti kɛni.”—Matiu 7:​12, NY.

 Yesu yɛɛ a yɛpɛ nunga gama kɔlongɔ Ngewɔ Mahayei ma a madihou: I ndeilɔ yɛɛ: “Nga Ngewɔ mahayɛi wowili yekpei lelɔ huɛ ta wekɛisia hu bɛ, gbamaile na va lɔ ti nya looni.” (Luuk 4:​43) Gbɛva mia Ngewɔ Mahayei hinda magbeengɔ wa?

Kayema Bukui ndeilɔ yɛ Ngewɔ Mahayei yɛni a mahaya lɔ na ngelegohu, tao kɛ a mahaya yayenge lɔ ndunyi mahu. Yesu, na yɛni a Mɛsayei, ta mia Ngewɔ loko loonga ngi ma kɔ i wote a ye Mahin. Ngewɔ lutui Daniɛl tɔilɔ kɛ Ngewɔ a “mahaya, . . . tɔwɔ, kɛ mahawu’ ve lɔ Mɛsayei wɛ ngelegohu. (Daniɛl 7:​14) Ye Mahayei na bu, Ngewɔ a ndunyi wote lɔ a Alijɛni tao a pie lɔ ngi mabla ti yɛ na kunafɔ va. Ngowi yekpe wa yana a na?