Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 10

Mu Juwui Lɔ Na Na Ii Loni Mu Lanaya Wu Ngewɔ Hu

Mu Juwui Lɔ Na Na Ii Loni Mu Lanaya Wu Ngewɔ Hu

JI JƐHOVA maikeisia gbatɛni ngelegohu, i guilɔ a fo gboto pɛiŋ aa ya ndunyi gbatɛ. Kɛɛ fo lɛnga leengɔ woma, maika yia tatoilɔ a mai la bagɔɔmi na ma kungɔ Ngewɔ yakpe i majɔɔ. Tao ii ye kiiyei na gbuani ngi nɛmahu, i jiailɔ a na i yɛ a gii la, fale i ta yekpe woteilɔ a Setana, na ye mbui mia a “Too Baahumui,” na kɛma kɛ i looilɔ Ngewɔ baahu. Setana ye faliani a Ngewɔ?

Setana kali yayengeilɔ Iv yaka va

Setana yɛpɛilɔ a kali huwue i pie Iv i Ngewɔ layei gbua hu. A kaso wele huwue, i pieilɔ i gɛ bɛ hinda yekpe wa mia Jɛhova ii yɛ loni ti majɔɔ, na va mia i ndeni ti ma yɛ taa nguwei na mɛ yɛ a wa ngui na ya. Ii wufeni klobɛɛ va Ngewɔ loi va a ndɛ gulamɔ kɛ nde va Iv ma a kaso huwue kɔ aa jia a na Ngewɔ yɛ ndenga ti ma, a ji i ndeni yɛɛ: “Ngewɔ kɔɔ lɔ kɛ foi na ma wua mɛ, wu yamisia ta lawo lɔ tao wua wue lɔ sia Ngewɔ na, wua nduahui gɔɔ lɔ na ma kpekpengɔ kɛ na ma nyamungɔ.” (Jɛnɛsis 3:​5, NW) Iv ii ngi nɛmahui yayengeni klobɛɛ va, i lailɔ a na Setana ndeni ngi ma. I Ngewɔ jawei nyanilɔ kɛ i pienga Adam bɛ i gbɛɛ ngi ma. I hinje wati na ma, haŋ i toonga wati ji ma Setana juwuisia mia a nasia lanayei ye tɔnyangoi ti hu. Tao ta tuŋ lɛma gulɔma a nunga yaka la. I ye piema?

A Tɔnyi Hubɔɔlei

Setana lɔ nunga wuhu baama kɔ ti too ndɛ yewɔvɛilei woma kɛ nuuvu nɛmahulee

Setana Isuɛl lengeisia wuhu baailɔ wɔɔ kɔ ti too ndɛ yewɔvɛilei woma kɛ nuuvu nɛmahulee. Yesu, na yɛni a Mɛsayei, ndeilɔ ngewɔvɛi gbakui nasia ma ti yɛ na ngi wati hu yɛ gbama va mia ti yɛ a Ngewɔ vɛi, ajifa ti yɛ a nunga gaa a “nuuvu jawa gbatɛngɔisia” lɔ sia bɛ Ngewɔ ndeisia mia. (Matiu 15:​9, NY) Isuɛl lengeisia tii lumani ta Mɛsayei gulu, fale Ngewɔ wo gbuailɔ ti woo hu. Yesu ndeilɔ ti ma yɛɛ: “Ta Ngewɔ mahayɛi gbualɔ wu yeya, ti fe kɛnyɛi na wɛ a wua a ngi wuɛisia.” (Matiu 21:​43) Ngewɔ ngi Mahayei gbuailɔ Isuɛlbleisia yeya i fe Yesu womableisia wɛ, tia mia naa ti woteni a ngi liimableisia.

Setana woteilɔ gbɔma Yesu womableisia lenga kɔ i ti wuhu nyani. A gu lɔ ti ma? Yesu tɔmasei yia yayengeilɔ kɛ va na a wue. Ye tɔmasei hu, kena yia mba galɛ yekpe vailɔ ngi gbaa hu, na woma, ngi juwui lilɔ i lɛtii hiŋ ye mbei hu. Ti gbeilɔ fenjɔ ma kɔ ti lola a lenga haŋ mba lee gbi. Ji mba lee gbi hitini ti lɛtii gbuailɔ mbei lia ti mɔ kɛ ti mbei wunga kpuwui la.

Yesu tɔmasei na ye mbui hugɛilɔ a ngi womableisia. I ndeilɔ ti ma yɛ ta mia kalɛ yekpe Vaimui le. I lɛilɔ gulɔma a nde la yɛɛ: “Kalɛ yekpeisia lɔ a Ngewɔ mahayɛi lenga; tawao lɛtii i yɛni a hinda nyamumɔi lenga lɔ; juwui na i lɛtii hiini, Setan le: mba lewe gbelei lɔ a ndunyɛi gɛlɛmɛi; tao tewebla lɔ a Ngewɔ malikɛisia.” (Matiu 13:​38, 39) Yesu ngi womabla lɔnyangoisia humailɔ mbei ma. Setana womablei nasia ti Yesu womabla lɔnyangoisia lia, i ti humailɔ lɛtiisia ma ta yɛ mbei lia. Sia lee Yesu yɛ ndenga, fo hɔndɔ lɛnga leengɔ woma ji i haani nunga ti gbotoilɔ nahi ti yɛ a nde tɛ Yesu womableisia mia a tie, kɛɛ tii yɛ a too Yesu woma a tɔnya. Ti gbuailɔ tɔnya wili na ma Yesu yɛ kɛnga. Ndei mia ti yɛ a nunga gaa la, ye ngla yɛni a Tiniti gaa lɔ, na kɛma kɛ numu sawa mia Ngewɔ yia hu. Ti tatoilɔ gbɔma a ndɛ yewɔisia vɛi la  ta yama ta loko wui ndunya maha hindeisia hu ɔɔ pɔlitisi. Nasia ti yɛ naa a jia a tɔnyi na Yesu yɛ nunga gaanga la, tii ya yɛ gbotoni.

Nasia Lanayei ye Tɔnyangoi Ti hu Tia Mia Ta Lo

Sia Yesu kɛni la, hindeisia ti ma a wooveilɔ. Ngewɔ maikeisia ta nasia gbua lɔ lanayei ye tɔnyangoi ii ti hu Yesu womabla lɔnyangoisia lia kɔ ti ti jukuu. Na woma a bɛbɛ lɔ kɔ numu bi nasia gɔɔ lanayei ye tɔnyangoi ti hu. Ye kɛlɛmi, ta Setana jukuu lɔ, na yɛni a nasia juwui ta lanaya wu Ngewɔ hu kɛ Yesu. A tɔnya, nasia lanayei ye tɔnyangoi ti hu tia mia lee ta lo!

Kɛɛ ba ye gu bi nasia gɔɔ lanayei ye tɔnyangoi ti hu ha? Mua yɛpɛ lɔ kɔlongɔ mɔli ji ma kakei ye na hu.

Ngewɔ lɔ nasia lɔlɔma ti longɔ ti lanayei ye tɔnyangoi majɔɔ