Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 9

Gbɔɔ Mua Kaa Mɛsayei Ma?

Gbɔɔ Mua Kaa Mɛsayei Ma?

NGEWƆ yɛ ndenga yɛ a loko loo lɔ Mɛsayei ma kɔ i yɛ a Maha ngi mabla kpɛlɛ mahu. Ngewɔ kɔɔ lɔ mahin na bonda mu gbeengɔ fa, fale i loko looni numui na lɔ ma a gu i yɛ a Maha yekpe wa. Mɛsayei yɛni a Mahin ye gbɛ bonda lɔ? Kɔgugba wa? Pɔlitisimɔ wa? Ɔɔ kɔɔ gɔɔmɔ wa? Sia Kayema Bukui ndeni la, Mɛsayei yɛ gba Ngewɔ lutuisia kpɛlɛ ma, i yɛni a Yesu Klisti lɔ.—Matiu 23:​10.

Ngewɔ tɔilɔ kɛ Mɛɛli Yesu leilɔ nahi jumbu gbi ii yɛ ngi ma. Tao gbɔma Yesu looilɔ kpauŋ kɔlɛya hindei nasia kpɛlɛ hu Setana yɛ a wa la ngi mahu. Yesu gbuailɔ panda a Ngewɔ a pili na i yɛ a hindeisia wue la kɛ pili na i yɛ a yɛpɛ la. I Ngewɔ lawokɔilɔ a pili na i yɛ a ngi gbayei yayenge la, ngi wɔnangɔ yɛla, ngi nɛmahuleengɔ yɛla, tao i ndomi gɛilɔ sia lee Ngewɔ na. A mu tɔ lɛ na mua kaa Yesu ma.

Yesu yɛɛ a kpɔma wue nunga ma

I ngi gbayei yayengeilɔ kɔ i gbɔ nunga yekeisia ma. Yesu gbeengɔ wa yɛla nunga va, i yɛɛ a ngi gbayei yayenge kɔ i wa a nafa ti gama. Foo yia ma, i ndeilɔ yɛɛ: “Ngi fahɛi mamamau lɔa, gbamaile . . . mɛhɛ gbi ii ti yeya taa mɛ.” (Maak 8:​2) Na woma, i kabandema hinda wueilɔ kɔ nasia ti yɛ a wolo ngi ma ti gu mɛhɛ ma mɛ va.

Yesu yɛɛ gbɔma a leetee tateisia hu a nunga gaa tao “a hegbɛ lasiisia gbi bawo kɛ kahu nyamuisia gbi ti yɛ nunga ma.” (Matiu 4:​23) Fale, nunga gboto ti yɛɛ a too ngi woma, tao “ti yɛlɔ a lapi jaava a ngie, ajifa kpaya i yɛlɔ a gbua ngi hu a ti gbi bawo.” (Luki 6:19, NY) A tɔnya, Yesu “ii wani kɔwɛi ti kpeegbua ngiɛ, kɛ kɔ ta i kpeegbua tiɛ, kɛ kɔ i ngi lɛvui ve a ngumawo-hani ti gbotoma va.” (Matiu 20:​28) * Nuuvu mahin ye gbɛ mia a hindei na bonda wue?

Yesu longɔ yɛla a ndopo mumuisia

Ngi longɔ yɛla a pɔna hindei sia lee Ngewɔ na. Yesu yɛɛ a jia a Ngewɔ jaweisia kɛ ndahi nasia ti yɛ ye saweisia woma. Sia Kayema Bukui ndeni la, ngi giiyei gbuangɔ yɛla a Devidi ndei, na ndeni yɛɛ: “Nya liimahindɛi lɔ na wieva bi longɔ la, O nya Yewɔi; Tɔnya le, bi jawɛi lɔ nya lii hu.” (Saam 40:​8) Yesu yɛɛ a nunga kpɛlɛ hou sia lee Ngewɔ a ti hou la. I yɛɛ a bagɔɔma ve ti kpɛlɛ wɛ tao ii yɛ a nduahu gɛ numui na ma ngi gbatɛngɔ ɔɔ ngi nyaningɔ, hindo ma ɔɔ nyaha, jialo ma ɔɔ kpako. Wati yia, Yesu womableisia ti yiailɔ ndeblei nasia ma ti yɛ a li a ti lenga Yesu gama. Kɛɛ i ndeilɔ ngi womableisia ma yɛɛ: “Gbɛ ndopo mumuisia ti wa nya gama; waa ti mabali; gbamaile jisia nyɔkɔisia ti wo lɔ a Ngewɔ mahayɛi.”—Maak 10:​14.

I nɛmahulee na yayengeilɔ Ngewɔ feni ngi wɛ. Yesu yɛ nuuvuisia gɔɔ lɔ vui panda. Kayema Bukui yɛpɛilɔ kɔlongɔ ngi ma yɛɛ: “Ta yekpe i numui gbi lii hu vaa gɔilɔ.” (Jɔn 2:​25) Ji ngi juwuisia ti nunga looni kɔ ti ngi hou, ye nungeisia vui bɛ ti ndeilɔ tɛɛ: “Kia wɔɔ gba numu gbi ii yaa yɛpɛni kia tamɔi na i na!” Mi mia i nɛmahulee na majɔɔni na? Ta yekpe vui ndeilɔ yɛɛ: “Na nga nungaa gaa la nya woo ii le; Ngewɔ na i nya loni ta lɔ ngi woo le.”—Jɔn 7:​16, 46, NY.

Yesu yɛɛ a hingbɛbla hale jifa i yɛɛ a ti mamanu lɔ

 I gaailɔ Ngewɔ ma a ndoma gɛlei. Yesu yɛɛ a nunga ti mamanu lɔ, tao i yɛɛ a hinda wue gbɔ va ti ma. “Kpɔukpɔumɔ yila lɔ i yɛ na ngi hegbɛngɔ wa” na Yesu manɛnɛni yɛɛ: “Ndemɔi, ina bi lumangɔ le, ba gulɔ bi nya bawo.” Yesu ngi mamanu lɔilɔ “kɛ i ngi lokoi lamboa, i ja a ngie, yɛ, ngi lumaa; bawo. Kɛ yakpe kpɔukpɔui bawoa ngi ma.” (Luuk 5:​12, 13; Maak 1:​41, 42) A tɔnya, Yesu longɔ yɛla vui kini na i laha majɔɔ fale i ngi hailɔ.

Bi giingɔ la kɛ Yesu gbeengoi bia bɛ va? Ɔɔ, jifa ta yekpe vui ndeilɔ yɛɛ: “A wa nya gama, wua kinii wu mɔnɛma tao wu lii nyaningɔ, nga pie lɔ wu gu ndiilɛi ma. A nya booma gbewei wumbu tao wu gaa nya ma, ajifa nya lii gɔlɛngɔ tao nya hu ii wɔlɔni, wu na wuenga wua ndiilɛi majɔɔ lɔ.”—Matiu 11:​28, 29, NW.

Yesu Maha yekpe wa mia nahi ngi nyikɔ gbii na. Na va mia i ndeni mu ma yɛ a “gaa nya ma.” Ba lumaa bi ye kaa na wue? Bi pienga, ba kohunɛ majɔɔ lɔ.

^ kɔlɔ wumbumi 6 Kɔ bi hinda hugɔɔ i lee ji ma kɔlongɔ ngumawo-haiŋ ma, ngu 5 gaa bukui ji hu, Gbɔɔ Vui Baibui Ndeni?