Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KƆLƆNGU 4

Gbɛva Mia Mu New World Translation gbatɛni?

Gbɛva Mia Mu New World Translation gbatɛni?

Kongo (Kiŋsasa)

Luwanda

Simakɔs Baibu yawotengoi nahi Ngewɔ biyei nyɛingɔ Saam 69:31 hu, fo 300, ɔɔ 400 leengɔ woma ji ti Yesu leni.

Fo gboto leengɔ woma naa, Jɛhova Jeliwuableisia ti Baibu gboto gbatɛnga tao ti kɔɛkɔɛnga nunga gboto ma. Kɛɛ mu tɔilɔ kɛ kungɔ mu Baibui gbatɛ kɛnyɛyei na hu, nahi a gbɔ nunga ma, kɔ ‘ti tɔnyi gɔɔ,’ gbɛva see, na mia Ngewɔ longɔ la numui kpɛlɛ va. (I Timɔti 2:3, 4) Na va mia 1950 hu, mu tatoilɔ a Baibui yawotela pu yei hu, mua toi a New World Translation. Mu ye Baibui ji yawotenga kɛnyɛyia gboto hu nahi teengɔ 130 ma. Kɛɛ, mui yaa gawoteni mɛnde yei hu.

Mu tɔilɔ kɛ kungɔ Baibui i yɛ kɛnyɛyei nahu nunga ta gu ti kaa, tao bɛbɛngɔ ngatɔ va. Jifa kɛnyɛyeisia ti ma a wove sia lee wati a yɛ lima, njɛpeisia lɔ na Baibui gbotoma hu, nahi nunga tɛɛ gu ta kaa tao tɛɛ gu ta ngatɔ. Nunga ti gɔfɛgbua wueilɔ kɔlongɔ kɛnyɛyei nasia ma ti Baibu gɔleisia nyɛini hu, tao na mia gbɔni ti ma ti kɔɔ na nyɛingɔ yɛla ye kɔlei nasia hu. Na gbɔilɔ ti ma ti gu ti Baibui yawote panda.

Mu tɔilɔ kɛ kungɔ Baibui i yɛna nahi tɔnyangɔ. Kungɔ Baibu yawotebla ti tɔnyi nyɛin Baibui hu, sia lee nyɛingɔ yɛla haala gɔlɔ nyɛingoi nasia hu. Ii gui ti kpuama ɔɔ ti mato. Kɛɛ nahugbi, Baibu yawotengoisia gbotoma hu, ti Ngewɔ biyei gbua hu.

Mu tɔilɔ kɛ kungɔ Baibui i yɛna nahi a bagɔɔma ve Ngewɔ wɛ. (II Samuɛl 23:2) Nasia ti New World Translation yawoteni, ti Ngewɔ biyei, Jɛhova nyɛin lɔ mia lee wɔɔ nyɛingɔ yɛla na haala Baibu gɔlɔ nyɛingoi nasia hu, nahi a loklo i hinti 7,000 hu. Tɔmasei gɛngoi kɔlɔla ji ma, ye mbui, a gɔwɔ hu we. (Ɛksodus 6:3) Ti fo gboto wumbuilɔ gɔfɛgbua wue va ye Baibu gɔlɔ nyɛingɔ wovei nasia hu, kɔ ti gu ti Ngewɔ Layei nyɛin a tɔnya. Na va mia New World Translation gaa la ɛɛ gbɔu. Ina bɛɛ New World Translation ii bi yeya, kungɔ bi kɛ a bi magbee Ngewɔ Layei gaa va a folo gbi.—Jɔsua 1:8; Saam 1:2, 3.

  • Gbɛva mia mu New World Translation gbatɛni?

  • Nasia ti longɔ ti Ngewɔ liima hindei wue, gbɛ mia kungɔ ti pie folo gbi lee?

ÖNB/Wien, G 39777