Guma gbakuisia, Klistimabla ti lato gbi

Kɔlei na gbuanga guma gbakuisia gama, ta mia ti kaa ma

Klistimablei nasia ti yɛ wɔɔ na haalei, ti nda wati hu, ‘toobleisia kɛ kpakuisia’ ti yɛ Jelusalɛm tia mia ti woteni a guma gbakuisia, tao tia mia ti yɛ a kiti lee Klistimableisia kpɛlɛ luahu Ngewɔ ngi yafa yekpi yeini ti ma. (Toobla ti Wiehindɛisia 15:2) Kɔ ti jia a pili na Ngewɔ yafa yekpi yɛ a kɛ, ti yɛ a Ngewɔ Layei hu vɛsɛ pɛiŋ ta yaa kiti lee. (Toobla ti Wiehindɛisia 15:25) Himia lɔ ha bɛɛ i wue ma.

Ngewɔ loko loonga ti ma kɔ ti ngi yingi lɛ gulɔma. Guma Gbakui nasia ti looni Jɛhova hugbatei gulɔ, ti longɔ a Ngewɔ Layei tao ti nɛmahu leengɔ a gayenge la. Ta gomɛ lɔ wiki gbi hu kɔ ti yɛpɛ kɔlongɔ na ma ti ndeengeisia ta gbee fa ndunyi hu kpɛlɛ. Sia lee wɔɔ i yɛ a wue la, ta ndahinga nyɛilɔ na ta kpua Ngewɔ Layei hu, tao mua majɔɔ a kɔlɔ huwue lɔ ta nyɛin jamaasia gama, ɔɔ a mahugbeblei nasia huwue ta jia jamaasia mahu, ɔɔ a kpakui nasia ti jamaasia mahu. Ji a gbɔ mu ma kɔ mu giiyei, kɛ mu wuehindei i yɛ yia. (Toobla ti Wiehindɛisia 16:4, 5) Guma Gbakuisia mia ta Ngewɔ layia le hindeisia kpɛlɛ mahugbe. Sia nyikɔ mu buku gbatɛlei na, loko loo va mu ndeenga ma kɔ ti kpee gbua Jɛhova hugbatei hu. Tao ta mu lii nɛpɔ lɔ kɔ mu Ngewɔ layia lelei hou panda.

Ta jia a pili na Ngewɔ yafa yekpi a kɛ a tie. Guma Gbakuisia, ta Jɛhova lɔ gama gbe pele gɛ va tie, kɛ Yesu nahi ta mia looni jamaasia gulɔ. (I Kɔrintabla 11:3; Ɛfɛsubla 5:23) Ye Guma Gbakuisia jisia, tɛɛ tiɛkpe yalɛ Ngewɔ mabla ti mahu. Tia Klistimablei nasia Ngewɔ loko loonga ti ma li va ngelegohu, ‘ti yɛni a nasia lɔ ta too Mbala Loi [Yesu] woma mia gbi a li na.’ (Hinda Gɛngɔ 14:4) Guma Gbakuisia, ti gohu a nɛi lɔ ji mua hɛ ti va, kɛ ngingi na va ti pie ma.

  • Yeni mia wɔɔ guma gbakuisia yɛ a tie, Klistimableisia ti lato gbi?

  • Gbɛ mia Guma Gbakuisia ta pie, kɔ ti too pele na ma, Ngewɔ a kɛ a tie?