Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KƆLƆNGU 2

Gbɛva Mia Ta Mu Loi A Jɛhova Jeliwuableisia?

Gbɛva Mia Ta Mu Loi A Jɛhova Jeliwuableisia?

Noa

Eblaham tia Seela

Mojisi

Yesu Klisti

Nunga gbotoma ti giingoi la kɛ Jɛhova Jeliwuableisia ngewɔvɛi gbambi nina mia a tie. Fo 2,700 leengɔ woma, nasia ti yɛ a Ngewɔ vɛi a tɔnya, i ti loilɔ a ngi “Jeliwuabla.” (Aisaia 43:10-12) Pɛiŋ 1931 a ya a hiti, ti yɛɛ a mu loli a Baibu Gaalupuisia. Kɛɛ gbɛva mia mu mbiyei ji wumbuni?

Mbiyei ji kɛma lɔ Ngewɔ na mu ngi vɛi ma. Ji ti Baibui nyɛini hala, Ngewɔ biyei, Jɛhova, yɛɛ hu teengɔ heima 7,000 ma. Ji ti tatoni a Baibui yawote la, ti mbiyei ji gbuailɔ hu kɛ ti Ndemui, ɔɔ Ngewɔ nyɛinga na. Kɛɛ, tɔnya Yewɔwai ngi biyei gɛilɔ a Mojisi yɛɛ: ‘Nya mia Jɛhova a nge.’ (Ɛksodus 6:2, 3) Ngi biyei Jɛhova kɛma lɔ kɛ ta yakpe mia tɔnya Yewɔwai a ngie. Mu gohunɛingɔ wa jifa Ngewɔ ngi biyei heinga mu ma.

Mu biyei kɛma lɔ ngingi na mua pie. I hinje Ebɛl wati ma, nunga ti tatonga wɔɔ kpɔ a seliwua la kɔlongɔ ti lanayei ma Jɛhova hu. Ebɛl lee yana, nunga yekeisia bɛ lɔ na ti seliwuani kɔlongɔ ti lanayei ma Ngewɔ hu sia nyikɔ Noa na, Eblaham, Seela, Mojisi, Devidi, kɛ yepekanga. Famia Baibui ti loini a, “selibla ti vaha wai.” (Hiibrublɛisia 11:4; 11:6—12:1) Sia lee numui a seliwua numu va koti hu, himia mua bɛ mu mu magbatɛnga seliwua va kɔlongɔ Ngewɔ ma, nungeisia gama.

Mu Yesu lɔ lawokɔ ma. Yesu mia haala mui le seliwua va kɔlongɔ Ngewɔ ma, na va mia ti ngi loini Baibui hu a ‘seliwuamɔ lɔnyangoi.’ (Hinda Gɛngɔ 3:14) Yesu ndeilɔ yɛ ‘i pienga ti Ngewɔ biyei gɔɔnga,’ tao i ndeilɔ yɛ i wailɔ ndunyi ji hu, kɔ i “seliwua tɔnyɛi va” kɔlongɔ Ngewɔ ma. (Jɔn 17:26; 18:37) Nasia Klistimableisia a tie a tɔnya, kungɔ Jɛhova biyei i yɛ ti ma, tao kungɔ ti yɛpɛ nunga gama kɔlongɔ ye biyei ji ma. Ji mia Jɛhova Jeliwuableisia ti lapi ma pie va.

  • Gbɛva mia mu biyei ji wumbuni?

  • Ngewɔvɛi gbambi nina mia a Jɛhova Jeliwuableisia?

  • Ye mia haala mui le seliwuani kɔlongɔ Jɛhova ma?