Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KƆLƆNGU 3

Ti Ye Gbɔma Tɔnyi Wɔfɛgbuani Baibui Hu?

Ti Ye Gbɔma Tɔnyi Wɔfɛgbuani Baibui Hu?

Baibu Gaalupuisia 1870 ni hu

“Manɛgɔti” ye haala yii, 1879 hu

“Manɛgɔti” na ti kpatɛ ma ha

Baibui ndeilɔ yɛ Yesu haangoi woma, nunga ta gbua ngi mableisia lia, ta ndɛgula yɛpeisia le kɔlongɔ Baibui ma kɔ ti nunga yaka. (Toobla ti Wiehindɛisia 20:29, 30) Wati leengɔ woma, na mia wueni. Ndɛgulablei nasia ti Yesu gaa hukpɔilɔ, a nasia tii tɔnya Yewɔwai gɔɔ. Himia ndɛgula Klistimableisia ti hindei latoni. (II Timɔti 4:3, 4) Mua ye gu mu kɔɔ kɛ na mu kaa ma i gbuama vui Baibui hu lɔ?

Wati hiti lɔ kɔ Jɛhova i tɔnyi gɛ a nunga. Jɛhova ndeilɔ yɛ, ‘kɛlɛma wati ma, hinda hugɔɔlei a matolɔ.’ (Daniɛl 12:4) Nunga lɛnga ti kɔɔilɔ 1870 hu kɛ sɔsisia gbotoma ti gaa ii lɔnyani. Na mia wueni ti tatoni a gɔfɛgbua wue la, kɔ ti kɔɔ na vui Baibui kɛma. Tao Jɛhova gbɔilɔ ti ma kɔ ti tɔnyi gɔɔ.

Nasia tɔnyi yɛ ti lii hu, ti Baibui hu gbɛkpɛilɔ. Sia lee ha mua hindeisia wɔfɛgbua la Baibui hu, himia Baibu Gaalupuisia ti yɛ a pie. Ji ti yɛ a Baibui gaa, ti hinda gbi lɔnga Baibui hu nahi kpaukpaungɔ kɔ ti ngatɔ, ta Baibui wui yepekeisia hugbe lɔ, kɔ ti kpaki yalambo. Ji ti yɛ a tɔnyi lɔ na hu ti yɛ a gɔfɛgbua, tao kɛ ti tɔnga kɛ himia i na Baibui hu, ti yɛɛ a nyɛin. Ji gbɔilɔ ti ma kɔ ti tɔnyi gɔɔ kɔlongɔ Ngewɔ biyei ma kɛ ngi Mahayei. Ti guilɔ gbɔma ti kɔɔ na Ngewɔ longɔ la mu va, kɛyi na mua yɛ hu ji mua ha, tao kɛ Ngewɔ wama haabla wumaa hei hu.Gɔfɛgbue ji gbɔilɔ ti ma ti gbua ndɛ yewɔvɛi gbambi ma.—Jɔn 8:31, 32.

Baibu Gaalupuisia ti kɔɔilɔ 1879 hu, kɛ wati fonga kɔ nunga ti tɔnyi gɔɔ ndunyi hu kpɛlɛ. Ye fo yakpi na hu mia ti tatoni a bukui ji gbatɛ la, ta toi a Manɛgɔti Na Yɛpɛ Ma Kɔlongɔ Jɛhova Mahayei Ma. Mua nunga gaama a tɔnyi kɔlongɔ Ngewɔ ma ndɔɔ gboto hu, nahi kungɔ a 240, kɛ kɛnyɛyia gboto hu nahi a gu a 750. Sia wɔɔ gba, haala wati lɔ kɔ ji bonda i wue.

  • Yesu haangoi woma, gbɛ mia wueni a tɔnyi na i kɛni a ngi womableisia?

  • Gbɛ mia gbɔnga mu ma, kɔ mu tɔnyi wɔfɛgbua Baibui hu?