Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 9

Wua Bi Wɛɛbubla A Jɛhova Vɛi a Ngooyia

Wua Bi Wɛɛbubla A Jɛhova Vɛi a Ngooyia

‘A ngi vɛli na i ngelegohu gbatɛni kɛ ndunyi.’—Hinda Gɛngɔ 14:7, NY

Sia bi kaanga la bukui ji hu, ndahi gbotonga lɔ Baibui hu nahi a gbɔ bi ma wua bi wɛɛbubla. Jɛhova longɔ wu yɛ kohunɛ hu. I lahedi wumbunga kɛ wu ngi vɛi hindei loonga hindei gbi gulɔ, ‘a haiŋ yekei jisia gbi ve lɔ wu wɛ.’ (Matiu 6:33, NY) Ngi longɔ vui wu wote a ngi ndiamuisia. Kungɔ wu lapi kɔ wu ndiamɔyei a Ngewɔ i lɛ gulɔma. Ndiamɔya gbi ii na wua majɔɔ a hiti Ngewɔ nda ndiamɔyei hu.—Matiu 22:37, 38.

 1 A PIE WUA JƐHOVA WU NDIAMƆYEI I YƐ KPAU

BAIBUI YƐƐ: “Nga yɛlɔ a wu Kɛkɛ, kɛ wua yɛlɔ a nya hinga lengeisia kɛ nya nyaha lengeisia,’ himia kpaya gbi Yewɔi ndenga.” (II Kɔrintabla 6:18) Ngewɔ longɔ wu wote a ngi ndiamɔ yekpenga. Pele yia huwue wua gu wu ji wue, yɛni a ji lɔ wua hɛ ngi gama. Jɛhova longɔ wu hɛ ngi gama “kpema gbi.” (1 Tɛsalonikablɛisia 5:17, NY) Jɛhova longɔ wu wu lii hu yeisia le ngi ma. (Filipaibla 4:6) Bi yaa hɛma wua bi wɛɛbubla, pili na ba hɛ la a kɛ lɔ a tie kɛ bi langoi la vui kɛ Ngewɔ lɔ na, tao kɛ bi lii valangoi ngi ma.

Ii baa ji ma wua yɛpɛ Ngewɔ gama, kungɔ wua bɛ wu wolo ngi ma. Wua wolo lɔ Jɛhova ma ji wua ngi Layei gaa, kɛ bukui nasia ta gbua ngi hugbatei hu. (Saam 1:1, 2) Kungɔ wu gii a na wua kaa. (Saam 77:11, 12) Wua wolo lɔ gbɔma Ngewɔ ma, ji wua li komisia va Mahaya Wɛɛ la a wati gbi.—Saam 122:1-4.

Ji wua yɛpɛ nunga gama kɔlongɔ Jɛhova ma, pili yepekei mia a na wu ndiamɔyei a Jɛhova a yɛ kpau. Wu lɛnga gulɔma a ji wue la, wu ndiamɔyei a Jɛhova a lɛ lɔ gulɔma.Matiu 28:19, 20.

NA NYANDENGƆ PIE VA:

  • A wati la kɔ wu yaa Baibui gaa foo gbi tao wu yaa hɛ Ngewɔ gama

  • Kungɔ wua bi wɛɛbubla wu Ngewɔ yenge wuelei loo wu nda hindeisia gbi gulɔ, sia nyikɔ fimi hugbeelei na kɛ hindei yepekeisia

2 A WATI LA BONDA YEWƆVƐI VA

BAIBUI YƐƐ: “A lukpe Ngewɔ gbla, kɛ a lukpelɔ wu gbla.” (Jeems 4:8) Kungɔ wu hugbatɛ wue kɔ wu yaa bonda yewɔvɛi wue wiki gbi lee, tao wu tɔ kɛ wua piema. (Jɛnɛsis 18:19) Kɛɛ, na lee yana kungɔ wu pie. Wu yaa hinda gbi wuema, kungɔ wu gii a Ngewɔ. Wua bi wɛɛbubla wu ndiamɔyei a Ngewɔ a yɛɛ kpau, ji wua lɛ gulɔma a yɛpɛ la kɔlongɔ ngi ma, ‘ji wua yɛ heini wu wɛlei bu, ji wua yɛ jiama pili hu, kɛ ji wua yɛ lama, kɛ ji wua hiye wu loo.’ (Dutɛrɔnɔmi 6:6, 7) Kungɔ bi bi lii hu yii sia Jɔsua na ji i ndeni yɛɛ: ‘Nya va mua nya wɛɛbubla, mua Ndemui magbee lɔ gbua.’—Jɔsua 24:15.

NA NYANDENGƆ PIE VA:

  • Kungɔ hugbatɛ wuengɔ i yɛ na bonda yewɔvɛi wue va wiki gbi tao wu yɛpɛ kɔlongɔ na ma a numui gbi nafa bondei hu