Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 3

Pili Na Kungɔ Wu Wu Luahu Hindeisia Hugbatɛ La

Pili Na Kungɔ Wu Wu Luahu Hindeisia Hugbatɛ La

‘A lo a wu nyɔunyɔu hulewengɔ, ajifa wu longa a wu nyɔunyɔu, wu magbatɛngɔ a yɛla kpele gbi manu va wu nyɔunyɔu ma.’—1 Pita 4:8NY

Wua bi hini ɔɔ bi nyahin wu heinga a nina, fawei mumunga ta yɛɛ na. Kɛnga na a wa a ye fawei jisia ta yɛ a kɛyi na lɔ wua gii la, ɔɔ pili na wua hindeisia wue la, gbɛva see wui makɛni hinda yia. Kɛnga gbɔma ta gbua wu bondeisia gama lɔ ɔɔ hindei nasia wui magaani.

Ji ye fawei jisia ta wa, kɛnga wuɛ lo pɛiŋ wu yɛpɛ kɔlongɔ ti ma. Kɛɛ Baibui mu lahi lɔ kɛ hindei jisia bonda ti wuenga, kungɔ mu hei mu mu luahu yei hugbatɛ. (Matiu 5:23, 24) Wua gu lɔ wu wu luahu hindei hugbatɛ ji wua jia a sawei nasia kɛ ndahi nasia ti Baibui hu.

 1 A HEI WU YƐPƐ KƆLONGƆ WU LUAHU HINDEISIA MA

BAIBUI YƐƐ: ‘Wati lɔ na . . . njia le va.’ (Ɛkkliisiastiis 3:1, 7) Kungɔ wua bi nyahin ɔɔ hini wu hei wu yɛpɛ kɔlongɔ hindei nasia ma ta wu vawei. Pie bi hini ɔɔ bi nyahin i kɔɔ na vui bi lii hu kɛ na bi giiyei le kɔlongɔ ye hindei ma. Wati gbi lee, kungɔ bi ‘tɔnyi le’ bi hini ɔɔ bi nyahin ma. (Ɛfɛsubla 4:25) Ina bɛ bi hini ɔɔ bi nyahin hinda nyamu wa lɔ wueni a bie na guangɔ wa bi ma, ii guni bi njia nyamu le ngi ma ɔɔ bi gbundɛ ngi ma a ndapi. Kungɔ bi bi lii gɔlɛ tao bi yɛpɛ panda ngi gama, na a pie lɔ njia ɛɛ wa wu luahu.—Saleisia 15:4; 26:20.

Ina bɛ i njɛpɛ gbi leilɔ nahi bii kulunima, ii guni bi liilee ngi ma. Kɛɛ kungɔ bi bagɔɔ ngi ma tao bi yɛpɛ ngi gama panda a ndoma huwue. (Kɔlɔsiabla 4:6) Kungɔ wu wu luahu hindeisia hugbatɛ kaka tao kungɔ wu yaa yɛpɛ wu nyɔunyɔu gama, ii guni wu londo wu nyɔunyɔu wo bu.

NA NYANDENGƆ PIE VA:

  • A wati la kɔ wu yɛpɛ kɔlongɔ wu luahu hindeisia ma

  • Bi hini ɔɔ bi nyahin yaa yɛpɛma kungɔ bi wolo ngi ma, ii guni bi njɛpɛ lee ngi la, bi nda wati a foo lɔ yɛpɛ va

 2 WOLO PANDA TAO BI LAPI KƆ BI KƆƆ NA NUMUI YEPEKEI NDEMA

BAIBUI YƐƐ: ‘A lo panda a wu nyɔunyɔu; a bagɔɔ wu nyɔunyɔu ma mbɛlɛhei hu.’ (Romablɛisia 12:10) Fale, a nyande lɔ kɔ bi wolo panda ji bi nyahin ɔɔ bi hini a yɛ yɛpɛma. Kungɔ bi lapi bi ‘manuma gɛ . . . tao bi bi lii mayei,’ bi nyahin ɔɔ bi hini va ji a yɛ ngi lii hu yei lema. (I Pita 3:8; Jeems 1:19) Baa kɛ lee kɛ bia woloma, kɛɛ kungɔ bi wolo a bi lii gbi. Ina ba gu lɔ, a nyande lɔ bi gbe na kpɛlɛ ma bi piema, bi wolo bi nyahin ɔɔ bi hini ma a bi lii gbi. Ina bi bi hini ɔɔ bi nyahin wumbuilɔ a bi ndiamɔ yekpe wa, na a pie lɔ bɛ ‘liilee fulo’ ngi ma.—Ɛkkliisiastiis 7:9.

NA NYANDENGƆ PIE VA:

  • Lɛ gulɔma a wolo la a bi lii gbi, ina bɛ na bi nyahin ɔɔ bi hini ndema ii nɛini bi wo hu

  • Lapi kɔ bi na gɔɔ i ndema. Lii hei pili na ma i yɛpɛma la, kɔ bi kɔɔ sia ngi lii gama ye na

3 A JIA A NA WU VENJƆ WU NDENGA

BAIBUI YƐƐ: ‘Ngengi gbi lɔ a nuu nafa: Kɛɛ ndaguluisia ti yɛpei a wue lɔ fɛlihinda.’ (Saleisia 14:23) Kɔ wu luma lee hinda wue va ii guni, kɛɛ kungɔ wu jia a na wu venjɔ wu ndenga wuɛ wua pie. Kɔ wu ji wue ii bɛbɛni, kɛɛ wua nafa wa majɔɔ lɔ. (Saleisia 10:4) Wu yengenga a ngooyia, wua ‘pawa yekpe’ majɔɔ lɔ.—Ɛkkliisiastiis 4:9.

NA NYANDENGƆ PIE VA:

  • A yɛpɛ kɔlongɔ na ma numu gbi a gu a pie la, kɔ wu wu luahu hindeisia hugbatɛ

  • A nyande lɔ wu yaa wua yekpe hugbɛkpɛ, kɔ wu tɔ sia wu ye jiama a na wu ndeni