Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 1

A Na Wue Ngewɔ Longɔ La kɔ Kohunɛ I Yɛ Heinyɔyei Hu

A Na Wue Ngewɔ Longɔ La kɔ Kohunɛ I Yɛ Heinyɔyei Hu

‘Numui na i ti gbatɛni ye tatomi i hindo lɔ gbatɛni kɛ nyaha.’—Matiu 19:4

Jɛhova * mia heinyɔyei ye haala yi hugbatɛni. Baibui ndeilɔ mu ma kɛ Ngewɔ haala nyahin gbatɛilɔ ‘kɛ i waa a ngie hindui’ gama. Adam gohunɛilɔ wa kɛ i ndenga yɛɛ: ‘Ji lɔ nya galeisia ti nda galei le, kɛ nya luwui ngi nda luwui le.’ (Jɛnɛsis 2:22, 23) Siahuna bɛ, Jɛhova longɔ heinyɔyabla ti yɛ kohunɛ hu.

Ji ba heinyɔyei wue, ba gii lɔ la kɛ hindei gbi a nɛɛ lɔ wa. Kɛɛ hi yana aa yɛ na, gbɛva see hindui na vui bɛ tia ngi nyahin ti longɔ wa a ti nyɔunyɔu, wati lɛnga ta yia lɔ. (I Kɔrintabla 7:28) Bukui ji hu, Baibui yɛpɛilɔ kɔlongɔ hindanga ma nahi heinyɔyabla ti jianga la, ta gu lɔ ti kohunɛ majɔɔ ti heinyɔyei hu.—Saam 19:8-11.

 1 A NA WUE JƐHOVA LONGƆ WU PIE

BAIBUI YƐƐ: ‘Hindui lɔ ngi nyahin wui a ngie.’ (Ɛfɛsubla 5:23) Fale, hindui mia looni bonda hindei gulɔ.

Ina nyahajɔɔmui mia a bie, Jɛhova longɔ bi bi nyahin hou panda. (I Pita 3:7) Ngewɔ ngi gbatɛilɔ kɔ i wote a kpɔmamɔ bi gama. Fale, ngi longɔ bi lo vui a ngie tao bi bagɔɔ ngi ma. (Jɛnɛsis 2:18) Kungɔ bi lo a bi nyahin nahi ba lo lɔ bi ngi nda liima hindei loo bi ndei gulɔ.—Ɛfɛsubla 5:25-29.

Ina hinjɔɔmui mia a bie, Jɛhova longɔ bi bagɔɔma wa ve bi hini wɛ tao bi gbɔ ngi ma kɔ i gu i na wue Jɛhova longɔ i pie. (I Kɔrintabla 11:3; Ɛfɛsubla 5:33) I kiti leenga kɔlongɔ hinda gbi ma wu heinyɔyei hu, kungɔ bi loko hei ngi bu a bi lii gbi. (Kɔlɔsiabla 3:18) Bi hindei jisia wuenga, bi hini a lo lɔ a bie huleengɔ gboŋ tao Jɛhova gohu a nɛɛ lɔ bi ma.—I Pita 3:1-6.

NA NYANDENGƆ PIE VA:

  • Bi nyahin ɔɔ bi hini mɔli sia ba ye gu bi wote a nyahajɔɔmɔ ɔɔ hinjɔɔmɔ yekpe. I yaa kpɛmboma, kungɔ bi wolo ngi ma panda, tao bi na gbi wue bi gbayei hu kɔ bi jia a na a nde

  • Kungɔ bi bi lii hou tao bi bi lii gɔlɛ, gbɛva see ii bɛbɛni kɔ wu gu wu na wue a wu nyɔunyɔu gohunɛ

2 GII A HINDEI NASIA TA NƐƐ ƆƆ TA GBALƐ BI HINI ƆƆ BI NYAHIN MA

BAIBUI YƐƐ: ‘Wua wu nda hindeisia leke mahugbe, kɛ wu kpɛlɛ a ngla-ngla wu yepekeisia ti ndeisia bɛ mahugbe.’ (Filipaibla 2:4) Kungɔ hindui tia ngi nyahin ti ti nyɔunyɔu hou panda, tao ti gii la kɛ Jɛhova longɔ ngi vɛibla ti ‘yaa a kpekpeya wue a numui gbi.’ (2 Timoti 2:24, NY) ‘Njianga nuu a nde a kɛwɛ ta nuu bɔ kia kɔbowa na: Kɛɛ nɛmahulewemui nɛi i yɛni a kahugbua lɔ.’ Fale, kungɔ bi bi layei mahugbe. (Saleisia 12:18) Jɛhova a gbɔɔ bi ma kɔ bi gu bi yɛpɛ bi hini ɔɔ bi nyahin gama panda a ndoma huwue.—Galesiabla 5:22, 23; Kɔlɔsiabla 4:6.

NA NYANDENGƆ PIE VA:

  • Hɛ Jɛhova gama kɔ i pie bi lii i gɔlɛ tao bi gu bi wolo a bi lii gbi ji wua bi nyahin ɔɔ bi hini wua yɛ yɛpɛma

  • Kungɔ vui bi gii a njɛpei na ba lo bi nde kɛ pili na huwue ba lo bi nde la

 3 KUNGƆ WU WU GIIYEI WU HINDA YIA

BAIBUI YƐƐ: Ji wua heinyɔyei wue, wua bi nyahin ɔɔ bi hini wua wote a ‘nduwu yia’ lɔ. (Matiu 19:5) Kɛɛ tuŋ numu fele mia a wue tao wu giiyei ɛɛ yɛ yia hindei gbi hu. Fale, kungɔ wu gaa a wu giiyei wu la hinda yia kɔ wu wo i yɛ yia. (Filipaibla 2:2) Ngooyei yaa wu luahu, wua gu lɔ wu kiti yekpe lee. Baibui yɛɛ: ‘Piehindei gbi a loo lɔ kpauŋ a nguhitɛ wue la.’ (Saleisia 20:18) Mu langɔ la kɛ Baibui a gbɔɔ wu ma kɔ wu gu wu kiti yekpe lee wua bi hini ɔɔ bi nyahin.—Saleisia 8:32, 33.

NA NYANDENGƆ PIE VA:

  • Kungɔ bi yɛpɛ bi nyahin ɔɔ bi hini gama kɔlongɔ na ma bi giingɔ la kɛ na bi lii hu

  • Pɛiŋ ba yaa hinda lɛnga wue, kungɔ wua bi nyahin ɔɔ bi hini wu hei wu yɛpɛ kɔlongɔ ma

^ kɔlɔ wumbumi 4 Baibui kɛilɔ kɛ Ngewɔ biyei mia a Jɛhova.