Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAKA 6

Hindei Nasia Ta Wue Ji Wua Tato A Ndenga Le La

Hindei Nasia Ta Wue Ji Wua Tato A Ndenga Le La

‘Ndengeisia lɔ a Ndemui ngi wohani.’—Saam 127:3

Ji wua ndui le a wote a kohunɛ wa lɔ wu gama, kɛɛ a wa lɔ a fawei mumunga heinyɔyei hu. Tao ye wati na mia vui wua kɔɔ kɛ ndo mahugbelei hinda wulo yana klobɛɛ va. Jii yekpe ɛɛ yɛ na tao wati lɛnga wua liilee lɔ wu nyɔunyɔu ma. Kungɔ wu venjɔ wu wu magbatɛ kɔ wu gu wu wu lui mahugbe tao wu heinyɔyei i lɛ gulɔma. Ndahi nasia ti Baibui hu ta ye gbɔ wu ma kɔ wu wu lui mahugbe panda, tao kɔ wu heinyɔyei i lɛ gulɔma?

 1 KƆƆ KƐ HINDEISIA TI MA A WOVE LƆ JI WUA NDUI LE

BAIBUI YƐƐ: “Ndoma a gulɔ kpalɛ bu.” Tao ndoma “ɛɛ ta yekpe ngi gbekpeyei lekee gɔli, ngi lii ɛɛ lewe fulo.” (1 Kɔlintiblɛisia 13:4, 5, NY) Ji ba bi haala lui le, ba lo lɔ bi bi nɛmahui kpɛlɛ wu ngi gama. Kɛɛ, kɛnga na a pie lɔ bi hini i tato a gii la kɛ bi lema ngi hinda ma. Fale nda nɛmahu kɛ ta bɛ a lo lɔ bi bi nɛmahui wu ngi gama. Kɛɛ ii guni bi liilee ngi ma, kungɔ bi pie i kɔɔ kɛ bi gbeengoi tuŋ ngi va tao pie i kɔɔ kɛ ta bɛ a gu lɔ i gbɔ bi ma wu wu lui mahugbe.

‘Wua, hinga . . . wua tieni a hei ndalongɔ hinda hugɔɔlei ma.’ (I Pita 3:7) Kungɔ bi kɔɔ kɛ wu lui mahugbelei lee mia naa a yɛ bi nyahin nɛmahu. Ngi ma yengei a gboto lɔ wa, tao jifa ndo mahugbelei hinda nina mia ngi va, wati lɛnga ngi gahu a gbɔyɔ lɔ wa, ɔɔ wati lɛnga ngi lii a nyani lɔ. Wati lɛnga a liilee lɔ pɛiŋ bi ma, kɛɛ kungɔ bi bi lii gɔlɛ, gbɛva see ‘numui na ngi lii ɛɛ lewe fulo ngi gbekpengoi kpayamui ma.’ (Saleisia 16:32) Hindei jisia la nɛmahu tao bi loko hei ngi bu.—Saleisia 14:29.

NA NYANDENGƆ PIE VA:

  • Kɛkeisia: A gbɔ wu nyahanga ma a wu lola mahugbe la i yɛ bɛ a kpindi. A nyande lɔ wu wati na mahugbua wua mbumbu hinda yekeisia wue va, kɔ wu wati majɔɔ wu nyahanga va kɛ wu lola

  • Njeisia: Wu hinga ti longa kɔ ti gbɔ wu ma a wu lola hou la, ɔɔ kɔ ti naapi yii ngi ma, wua mawai. Ina tii pieni panda, ii guni wu ti magbua, kɛɛ kungɔ wu kɛ a tie sia ta pie la

 2 A PIE WU NDIAMƆYEI I YƐ KPAU

BAIBUI YƐƐ: “Ti venjɔ ta yɛ a nduwu yakpe lɔ.” (Jɛnɛsis 2:24) Sia bɛ wu ndui majɔɔa, kungɔ wua bi nyahin ɔɔ bi hini wu kɔɔ kɛ “nduwu yakpe” mia a wue. Fale a na gbi lee wue wu gbayei hu kɔ wu heinyɔyei i lɛ gulɔma.

Hinjɔɔbla, kungɔ wu bagɔɔ kpɔmi na ma wu hinga ta pie wu ma. Ji ba pie bi hini i kɔɔ kɛ bi gohunɛingoi kpɔmi na va a pie bi ma, a wote a “kahugbua lɔ” ngi gama. (Saleisia 12:18) Nyahajɔɔbla, a pie wu nyahanga ti kɔɔ kɛ wu longoi a tie huleengɔ gboŋ tao a kɛ a tie kɛ wu bagɔɔ lɔ ti ma. A ti lato ngingi va ta pie bondei hu.—Saleisia 31:10, 28.

‘Numu gbi aa ta yekpe lekee ngi gbekpeyei gɔli, mahoungɔ i ngi mbaangeisia bɛ ti gbekpeyei gɔli.’ (1 Kɔlintiblɛisia 10:24, NY) Wati gbi lee, kungɔ bi na wue a nɛɛ bi hini ɔɔ bi nyahin wɛ. Kungɔ wu yaa wati gɔkoi kɔ wu hei wu yɛpɛ tao mahoungɔ wu wolo wu nyɔunyɔu ma. I gbɛɛ na ma, mahoungɔ wu yaa wu nyɔunyɔu lato. I wa a pɛɛbu hindei, ii guni bi gii a bi nda liima hindei lee, kɛɛ kungɔ bi gii a bi nyahin ɔɔ bi hini ndei. Baibui yɛɛ: ‘Wua wu nyɔunyɔu goma, ngiiyɛma wu lumangɔ.’ (I Kɔrintabla 7:3-5) A nyande lɔ wu hei wu yɛpɛ kɔlongɔ ye hindei ji ma. Wu wu lii gɔlɛnga tao wu gii a wu nyɔunyɔu, na a gbɔɔ wu ma kɔ wu heinyɔyei i yɛ kpau.

NA NYANDENGƆ PIE VA:

  • Kungɔ wu yaa wati la wu venjɔ va

  • Kungɔ bi yaa hinda mumunga wue bi nyahin ɔɔ bi hini gama kɔ i kɔɔ kɛ bi longoi vui a ngie

 3 SIA WUA YE WU LUI MAKƐ LA

BAIBUI YƐƐ: ‘I hiye bi lolangoi hu ma bi yɛɛ a kɔlɔ gayemangoisia gaa, na ta pie bi nɛmahu i lewe mbawoya majɔɔ va.’ (II Timɔti 3:15) A hugbatɛ wue wu lui gaa va, gbɛva see wati na bɛ vui ndui a yɛ ngi nje gohu a gu lɔ i kaa wue. A gu lɔ gbɔma i ngi nje wui gɔɔ tao ina ngi nje gohunɛingoi ɔɔ ii nɛini a kɔɔ lɔ. Kungɔ bi yaa kɔlei gaa ngi gama ngi lolangoi hu. Sia bɛ ɛɛ na yatɔ ba kaa ngi gama, kɛɛ a gbɔɔ ngi ma i lo a kɔɔ gaalei ji a jɛmbɛ.

Wua gii la kɛ wu lui gulongoi kaa wue va kɔlongɔ Ngewɔ ma. A nyande lɔ wu yaa hɛ ngeya kɔ ta bɛ i humɛi. (Dutɛrɔnɔmi 11:19) Wu yɛ bɛ loima wua tieni, kungɔ wu yɛpɛ kɔlongɔ Ngewɔ gbatɛ haiŋsia ma. (Saam 78:3, 4) Sia lee a yɛ jɛmbɛma, a tɔɔ kɛ wu longoi vui a Jɛhova tao na a gbɔɔ ngi ma kɔ ta bɛ i lo a ngie.

NA NYANDENGƆ PIE VA:

  • Kungɔ wu hɛ Jɛhova gama kɔ i wu gɔ a nɛmahulee kɔ wu gu wu wu lui makɛ

  • Wu yaa ngi gaama, kungɔ wu yaa jia hinda lɛnga woma kɔ ti gu ti la ngi nɛmahu panda