Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE 13

Timɔti Longɔ Yɛla I Gbɔ Nunga Ma

Timɔti Longɔ Yɛla I Gbɔ Nunga Ma

Timɔti foninge mia yɛla a ngie nahi ngi gohunɛingɔ gbɔ va nunga ma. I lilɔ hinda gboto kɔ i gbɔ nunga ma. Na va mia ngi gohunɛingɔ wa yɛla ngi lɛvui hu. Ba lo lɔ bi kaa wue kɔlongɔ ngi ma?—

Timɔti ngi nje tia ngi mama, ti ngi gaailɔ kɔlongɔ Jɛhova ma

Timɔti makɛni ta yia hu lɔ ta na loli a Listla. Wati na ngi gulongɔ yɛla, ngi mama Lɔis tia ngi nje Yunis, ti tatoilɔ a ngi gaa la kɔlongɔ Jɛhova ma. Ji i lakpani, ngi longɔ yɛla i gbɔ nunga ma kɔ ti kaa wue kɔlongɔ Jɛhova ma.

Wati na ngi voningengɔ yɛla, Pɔɔl ndeilɔ ngi ma kɔ tia ta ti yaa li tei yepekeisia hu Ngewɔ layei le va. Timɔti lumailɔ yɛɛ: ‘ɔɔ!’ Ngi magbatɛngɔ yɛla gbɔ va nunga ma.

 Timɔti tia Pɔɔl ti lilɔ ta yia hu ta na loli a Tɛsalonaika, na yɛ masidonia lɔlei hu. Kɔ ti fo na, ti jiailɔ huguangɔ kɛ ti ndɛdei wumbunga. Ji ti foni, ti gbɔilɔ nunga gboto ma kɔ ti kaa wue kɔlongɔ Jɛhova ma. Kɛɛ nunga gbotoma ti liileeilɔ ti ma tao ti yɛ kpalɛ lama ti ma. Fale Pɔɔl tia Timɔti ti lilɔ hinda yeka kɔ ti Ngewɔ layei le na.

Timɔti kohunɛ majɔɔilɔ ngi lɛvui hu

Ngawu lɛnga leengɔ woma, Pɔɔl Timɔti mɔli lɔ kɔ i yama Tɛsalonaika, i ngi ndeengeisia lɔ, i tɔ sia ti ye Ngewɔ hindei wuema. Kɔ numu i yama ta nyamui na bonda hu, kɛ lee ngi lii i loo! Timɔti pieilɔ jifa ngi lii hɛɛngɔ yɛla ngi ndeenga va. Ji i lini, i yamailɔ Pɔɔl gama a ngowi yekpe. Ti ndeengei nasia ti yɛ Tɛsalonaika, ti yɛɛ a Ngewɔ hindei madihou.

Timɔti tia Pɔɔl ti yengeilɔ fo gboto va. Wati yia, Pɔɔl kɔlei nyɛilɔ kɛ Timɔti mia vui ngi mahoungɔ kɔ i yaa ngi yoyo jamaasia hu. Timɔti longɔ yɛla a Jɛhova tao ngi longɔ yɛla a nunga.

Bi longoi a nunga tao ba lo lɔ bi gbɔ ti ma kɔ ti kaa wue kɔlongɔ Jɛhova ma?— Ina bi na wueilɔ, ba kohunɛ majɔɔ lɔ bi lɛvui hu sia Timɔti yɛ na.