Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE 9

Jɛlimaya Ii Gbeni A Yɛpɛ La Kɔlongɔ Jɛhova Ma

Jɛlimaya Ii Gbeni A Yɛpɛ La Kɔlongɔ Jɛhova Ma

Gbɛva mia nunga ti liileengɔ Jɛlimaya ma?

Jɛhova Jɛlimaya mabawoilɔ

Wati lɛnga, nunga ta mu yɛɛ lɔ ɔɔ ti liilee mu ma ji mua yɛpɛ ti gama kɔlongɔ Jɛhova ma. Ji a pie lɔ muɛ lo mu lɛ gulɔma a yɛpɛ la kɔlongɔ Ngewɔ ma. Hindei ji wuenga wɔɔ gba a bie?— Baibui yɛpɛilɔ kɔlongɔ foninge hindo yia ma nahi ngi longɔ a Jɛhova. Kɛɛ i loni kulo hiŋ i gbe a yɛpɛ la kɔlongɔ ngi ma. Ngi biyei mia a Jɛlimaya. Mu kaa wue lɛ kɔlongɔ ngi ma.

Wati na Jɛlimaya voningengɔ yɛla, Jɛhova ndeilɔ ngi ma i nunga lahin kɔ ti gbe a hinda nyamuisia wue la. Hindei ji gbakpaungɔ wa Jɛlimaya va tao i luwailɔ kɛ i ndenga Jɛhova ma yɛɛ: ‘ngii kɔɔ gbɔɔ nga nde. Ndopo wulo hiŋ mia a nge.’ Kɛɛ Jɛhova ndeilɔ yɛɛ: ‘Baa luwa. Nga gbɔɔ bi ma.’

 Na woma Jɛlimaya tatoilɔ a nunga lahin la yɛ tii gbeilɔ ti wuehinda nyamuisia ma, Jɛhova a ti yamɔnɛ lɔ. Bi giingɔ la nunga ti gbeilɔ a hinda nyamuisia wue la?— A-a, ti liileeilɔ ngi ma tao ti yɛɛ a ngi yɛɛ. Nunga lɛnga pɛiŋ ti yɛ ngi waama. Gbɔɔ bi giingɔ la Jɛlimaya pieni?— I liileeilɔ kɛ i ndenga yɛɛ: ‘Ngɛɛ ya yɛpɛ kɔlongɔ Jɛhova ma.’ Kɛɛ Jɛlimaya gbeilɔ vui a yɛpɛ la kɔlongɔ Jɛhova ma?— A-a ii gbeni. Jɛlimaya longɔ wa yɛla a Jɛhova nahi ɛɛ gu aa gbe a yɛpɛ la kɔlongɔ ngi ma. Tao jifa Jɛlimaya ii gbeni a yɛpɛ la kɔlongɔ Jɛhova ma, i ngi mahugbeilɔ.

Tɔmasei mia a ji. Wati yia, hinga nyamu lɛnga ti Jɛlimaya wuilɔ ndowei hu, hu vendangɔ a patei. I yɛ lɔ na nahi ɛɛ mahɛ mɛ tao ɛɛ nja gbɔli. Hingei nasia ti longɔ yɛla Jɛlimaya i lo ndowei na hu haŋ i haa. Kɛɛ Jɛhova pieilɔ ngi ma i bawo!

Gbɔɔ mua kaa kɔlongɔ tɔmasei na ma Jɛlimaya kɛni?— Sia bɛ wati lɛnga i yɛɛ a luwa, kɛɛ ii gbeni a yɛpɛ la kɔlongɔ Jɛhova ma. Ji ba yɛpɛ kɔlongɔ Jɛhova ma, nunga ta bi yɛɛ lɔ tao ta liilee lɔ bi ma. Na a pie lɔ bi wufe ɔɔ bi luwa. Kɛɛ baa gbe a yɛpɛ la kɔlongɔ Jɛhova ma. A gbɔɔ bi ma sia lee i gbɔni la Jɛlimaya ma.

BAIBU WUI JISIA GAA BI BAIBUI HU