Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Sabui Na Va Tɔnya Klistimableisia Tɛɛ Klɔsi Yayenge Ngewɔ Vɛi Va

Sabui Na Va Tɔnya Klistimableisia Tɛɛ Klɔsi Yayenge Ngewɔ Vɛi Va

NUNGA miliɔn gboto ti longoi a klɔsi tao bagɔɔma wa lɔ ti yeya fa. Buku yia ta toi a Encyclopædia Britannica, i ndeilɔ yɛɛ: “Klɔsi yɛni a bagɔɔma haiŋ wa lɔ Klistimableisia lia.” Kɛɛ tɔnya Klistimableisia tɛɛ klɔsi gayenge Ngewɔ vɛi va. Gbɛva mia tɛɛ gayenge?

 Sabu yekpe wa yia yɛni a ji lɔ, klɔsi ma yana Yesu aa haa na. Gliki yei na ti gawoteni a “Klɔsi” yɛni a stalɔs lɔ. Ye mbui mia a “ngulu wɔnangoi.” Buku yia ta toi a The Companion Bible, i ndeilɔ yɛɛ: “[Stalɔs] ii gɛni kɛ ngulu mia ti kpekpani ngi mbaa mahu . . . Hinda gbi na Baibu yakei na hu ti nyɛini Gliki yei hu [Hinda Yangilingɔ Nini] a kɛ kɛ ngu fele mia ti kpekpani.”

Hinda lɛnga Baibu hu, ti njia yeka lɔ yayengeni Gliki hu haiŋ na gɛ va Yesu haani ma. Ye njiei mia a “sailɔn,” na ye mbui mia a “gbembe” ɔɔ “ngui.”—Toobla ti Wiehindɛisia 5:​30; 10:​39; 13:​29; Galesiabla 3:​13; I Pita 2:​24.

Buku yia ta toi a The Cross and the Crucifixion, i sabui na gɛilɔ na va tii yɛ a ngui gbekpa numu hɛɛ va ma. I ndeilɔ yɛɛ: “Hindei nasia ti yɛ a nunga waa na, na kpɛlɛ ii le nguisia ti yɛna. Fale, ngulu yia mia ti yɛ a too sawa nyanibla waa va ma. Ti yɛɛ a ti lukuisia lɛ ngele ya, kɛ ti ti gɔweisia wunga hinda yia kɛ ti giinga ɔɔ ti kpakpa a lɔntimi.”

Sabui yena teengɔ kpɛlɛ ma, ta mia a na Ngewɔ Layei ndeni kɔlongɔ ji ma. Toomui Pɔɔl ndeilɔ yɛɛ: “Kristi i mu wumawonga sondui yeya na Sawei a wala, ji i woteni a sondumamɔ mu va; ajifa Ngewɔ Gɔlɛi yɛ, ‘Numu gbi lekee ti ngi waani ti ngi hɛlɛ ngulii ma, Ngewɔ jondii lɔ ngi ma.’” (Galesiablɛisia 3:​13, NY) Kpambi ji ma, Pɔɔl yɛ a yɛpɛ kɔlongɔ na ma lɔ nyɛingɔ Dutɛrɔnɔmi 21:​22, 23, na yɛpɛni kɔlongɔ numu hɛɛlei ma ngui ma, kɛɛ klɔsi ma ii le. Jifa numu gbi ta ngi hɛɛ ngui ma a gɛ lɔ bɛ sondumamɔ mia a ngie, ɛɛ nyande kɔ Klistimableisia ti haiŋ gbi hɛɛ ti ye pɛɛ bu, na a Yesu gɛ ngi hɛɛngɔ klɔsi ma.

Hinda gbii na a kɛ kɛ fo 300 leengɔ woma ji Yesu haani, ngi womableisia ti yɛɛ a klɔsi yayenge Ngewɔ vɛi va. Kɛɛ fo 400 leengɔ woma, Loma maha yia na ngi biyei mia a Kɔnsatin, na yɛ a ndɛ yewɔisia vɛi, i woteilɔ a Klistimamui. Ngi wotengoi woma a Klistimamui, hu mia i wani a  klɔsi yayengelei Ngewɔ vɛi va. Sia bɛ mui sabui na va gɔɔ Kɔnsatin ji wueni, kɛɛ klɔsi ma yana taa Yesu Klisti gbakpa na. Klɔsi yayengelei gbuani ndɛ yewɔvɛi gbambi ma lɔ. Buku yia ta toi a New Catholic Encyclopedia, i ndeilɔ yɛɛ: “Nunga ti yɛɛ a klɔsi yayenge pɛiŋ Klistimabla ti hindei aa ya lato.” Nunga yekeisia ti ndeilɔ tɛ nasia ti yɛ a ndɛ yewɔisia vɛi, tia mia ti yɛ a klɔsi yayenge ti yewɔisia vɛi va tao ti yɛɛ a nyaha hindei kɛ hindo hindei wue ti yewɔisia gɔɔ bu.

Kɛɛ gbɛva mia Klistimableisia ti lumani klɔsi yayengelei ma Ngewɔ vɛi va? Ti ji wueilɔ kɔ nasia ti yɛ a ndɛ yewɔisia vɛi, ti wote a Klistimableisia. Kɛɛ Baibui kɛilɔ gboleiŋ kɛ ii guni mu loko wui hinda gbi hu kpɛɛngɔ ndɛ yewɔvɛilei ma. (II Kɔrintabla 6:​14-18) Baibui kɛilɔ gbɔma kɛ ma ii houni mu haiŋ mahawangɔ gbi yayenge Ngewɔ vɛi va. (Ɛksodus 20:​4, 5; I Kɔrintabla 10:​14) Sabui jisia va mia tɔnya Klistimableisia, tɛɛ klɔsi yayenge Ngewɔ vɛi va. *

^ kɔlɔ wumbumi 5 Bi longa bi hinda hu gɔɔ i lee ji ma kɔlongɔ klɔsi ma, bukui ji gaa Reasoning From the Scriptures kɔlɔ laa 89 i too kɔlɔ laa 93 ma, Jɛhova Jeliwuableisia mia ti kpatɛni.