Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Pundui Hu Mia Ti Yesu Leni?

Pundui Hu Mia Ti Yesu Leni?

BAIBUI ii kɛni wati na ti Yesu leni. Kɛɛ i gbɔilɔ mu ma mu kɔɔ kɛ Pundui hu yana taa ngi le.

Mu yɛpɛ lɛ kɔlongɔ kɛyi na ma hindei yɛna Bɛtilɛm, mia ti Yesu leni na. Juubleisia ti yawui na ta toi a Kislɛv (mu gama a yɛ Lugbu Yawui kɛ Pundui luahu lɔ) ngawu mia nahi njei yɛ a wa tao kɔlei a hei. Ngawui ji haanga, Tebɛt yawui (mu gama a yɛ Pundui kɛ Pɛɛgbaa luahu lɔ) mia a la. Ye ngawui ji hu, hindei a gɔlɛ lɔ wa tao wati lɛnga lugbui a heilɔ. Mu tɔ lɛ na Baibui bɛ ndeni kɔlongɔ kɛyi na ma hindei a yɛna Kislɛv yawui hu, mia ti Yesu leni na.

Baibu gɔlɔ nyɛinbla ye ngla na yɛni a Ɛsla, i kɛilɔ kɛ njei yɛɛ a wa wa Kislɛv yawui hu tao kɛ kɔlei yɛɛ a hei wa. Ɛsla ndeilɔ yɛ ji nunga ti lɛnima Jelusalɛm “ngalui yetauyei [Kislɛv] mia, foloi yenuu yila gbɔyɔngɔi ma nglui hu,”  nunga ti yɛɛ a “gbɛli . . . hama wawai va.” Ye nungei nasia bɛ ti gomɛni ti ndeilɔ tɛɛ: ‘Hami wɔlɔngoi, muɛ gu mua loo ngitiya.’ (Ɛsra 10:​9, 13; Jɛrɛmaia 36:​22) Na va mia mbala mahugbeblei nasia ti yɛ kakei na ma, tii yɛ a lo ngitiya a kpindi tia ti balanga, Pundui hu.

Kɛɛ Baibui ndeilɔ pɛiŋ kɛ kpindi na ti Yesu leni, mbala mahugbebla ti yɛɛ ngitiya a ti balanga. Baibui kɛilɔ kɛ wati na ti Yesu leni, mbala mahugbebla ti yɛɛ ‘a yii foni hu [“ngitiya,” NW], ta ti balangeisia mahugbe a kpindi.’ (Luuk 2:​8-12) Kɔɔ kɛ Baibui ii ndeni kɛ tee lee gbama mia ti yɛ a pie foni hu a fui, kɛɛ yɛ ti yɛ a yii foni hu lɔ. Ti yɛɛ ngitiya a ti balangeisia a kpindi. Kɔlei na bonda yɛɛ a hei Bɛtilɛm Pundui hu, bi giingɔ la kɛ nunga ta yɛɛ ngitiya a wati na bonda? Ɔ-ɔ, na ɛɛ gu aa wue. Hindei jisia kpɛlɛ ti kɛnga gboleiŋ kɛ tii Yesu leni Pundui hu klobɛɛ va. *

Ngewɔ Layei wati na gɛilɔ Yesu haani, kɛɛ ii hinda gboto leni kɔlongɔ wati na ma ti ngi leni. Na a pie lɔ mu gii a na Baibui ndeni yɛɛ: ‘Nda yekpe fisangoi siahale bagbangɔ ma; kɛ haa vuli nuu le vuli ma.’ (Ɛkkliisiastiis 7:​1) Fale, ii gualani mu ma ji Baibui ii hinda gboto leni kɔlongɔ wati na ma ti Yesu leni, kɛɛ i hinda gboto hugɛilɔ kɔlongɔ na ma i pieni ji i yɛ ndunyi ji ma, kɛ ngi haalei.

Wati na ti Yesu leni, mbala mahugbebla ti yɛɛ ngitiya, foni hu ta ti balangeisia mahugbe a kpindi

^ kɔlɔ wumbumi 1 Bi longa bi hinda hu gɔɔ ii lee ji, bukui ji gaa Reasoning From the Scriptures, i hinje kɔlɔ laa 176 ma i too kɔlɔ laa 179, Jɛhova Jeliwuableisia mia ti kpatɛni.