Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Kungɔ Mu Loko Wui Komi Nasia Hu Nunga Ta Maga?

Kungɔ Mu Loko Wui Komi Nasia Hu Nunga Ta Maga?

KOMI gbotongɔ wa ha nunga ta maga ndunyi hu. Kɛɛ ye komi jisia kpɛlɛ Baibui ii yɛpɛni kɔlongɔ ti ma. Tao bi bukui nasia gaanga ta yɛpɛ kɔlongɔ ye komi jisia  ma, na ba kaa hu, a ŋanya wu lɔ bi yɔngɔ ya. Mu kaa wue lɛ naa kɔlongɔ ye komi jisia lɛnga ma.

Ista Gomi. Buku yia ta toi a The Encyclopædia Britannica ndeilɔ yɛɛ: “Hinda gbi ii na Hinda Yangilingɔ Nini (Matiu haŋ i too Hinda Gɛngɔ) hu, na a kɛ kɛ haala Klistimableisia ti yɛɛ a Istei maga.” Kɛɛ Ista magalei ye latoni? I gbuani nasia gama lɔ ti yɛ a ndɛ yewɔisia vɛi. Nunga tɛ ta komi ji hou lɔ kɔ ti gii a Yesu wulei hei hu, kɛɛ hindei nasia ta pie ye komɛ wati ji hu tii Baibui hu klobɛɛ va.

Fo Nina Yawote Gomi. Wati na ta Fo Nina Yawote Gomi hou, kɛ kɛyi na ta hou la yakpe yana ndɔɛsia kpɛlɛ hu. Buku yia ta toi a The World Book Encyclopedia kɛilɔ sia komi ji magalei ye latoni la. I ndeilɔ yɛɛ: “46 B.C. hu, Loma mahin Jiliɔs Sisa ndeilɔ yɛ ti yaa Fo Nina Yawote Gomi hou Pɛɛgbaa 1. Lomableisia ti fui ji wumbuilɔ ti yewɔisia ye ngla lato va na ngi biyei mia a Janus, na yɛ looni tei magɔlei ye ndamisia va, pɛɛ lamisia, kɛ hinda latolei va. Janus yambui yɛ fele, ye ngla a kulɔ gbee, yepekei a poma gbee.” Fale ndɛ yewɔvɛibla mia ti wani a Fo Nina Yawote Gomi.

Komɛ Vui Yepekeisia. Muɛ gu mua yɛpɛ kɔlongɔ komi nasia kpɛlɛ ma nunga ta maga ndunyi hu. Jɛhova gohu ɛɛ nɛi klobɛɛ va komi nasia ma nunga ta maga bagɔɔma ve va nuuvuisia wɛ ɔɔ ti hugbateisia. (Jɛrɛmaia 17:​5-7; Toobla ti Wiehindɛisia 10:​25, 26) Komɛ gbi bi loko wuima hu, kungɔ bi gii a ngi gbuami tao ina a Ngewɔ gohunɛilɔ. (Aisaia 52:​11; Hinda Gɛngɔ 18:​4) Hindei nasia mu kaanga bukui ji ye Ngu 16 hu, ta gbɔɔ bi ma bi kɔɔ sia Ngewɔ ye komi yepekeisia magalei wumbuni la.