Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Tɔnyi Kɔlongɔ Kɛkei Ma, Hindolui, kɛ Mbawo Yafei

Tɔnyi Kɔlongɔ Kɛkei Ma, Hindolui, kɛ Mbawo Yafei

NUNGA lɛnga ti langɔ la kɛ numu sawa mia Ngewɔ yia hu, Kɛkei, Hindolui, kɛ Mbawo Yafei. Tao tɛ ti jaangɔ kpɛlɛ ti mahɔɔngoi tao ti latoma ii na. Ti langɔ la kɛ Kɛkei, Hindolui, kɛ Mbawo Yafei Ngewɔ yia mia a tie.

Nungei nasia ti langɔ a ji, ti gbotoma ta ndeilɔ tɛ tɛɛ gu taa ti lanayei ji hugɛ a numu. Kɛɛ tuŋ ti giingɔ la kɛ hi mia Baibui ndeni. Kɛɛ kaa ji lɔ vui Baibui hu? Kɔ mu mɔli ji gbɛmbo, mu jia lɛ naa Baibu gbambi yia woma na nungei nasia ti langɔ a ji ta gayenge kɛ va kɛ kaa ji lɔ Baibui hu.

“NJIEI I YƐ A NGEWƆ LƆ”

Jɔn 1:​1 ndeilɔ yɛɛ: “Yetɔtogbelei Njiɛi i yɛlɔ na, kɛ Njiɛi ta Ngewɔ lɔ ti yɛ na, kɛ Njiɛi i yɛ a Ngewɔ lɔ.” Ngu yakpi ji hu, toomui Jɔn kɛilɔ kɛ “Njiei” yɛni a Yesu lɔ. (Jɔn 1:​14) Jifa i Njiei loini a Ngewɔ, na va mia nunga lɛnga ta nde tɛ Hindolui tia Kɛkei, Ngewɔ yia mia a tie.

Kungɔ bi nda nɛmahu kɛ Baibu yakei ji ti nyɛini Gliki yei hu lɔ. Na woma, kɔlɔ yawotebla ti gawoteilɔ kɛnyɛyia yekanga hu. Baibu yawotebla gbotoma tii nyɛini kɛ “Njiei Ngewɔ mia.” Gbɛva mia tii nyɛini hi? Gbɛva see, Gliki yei na ti Baibui nyɛini hu ti yɛ kɔɔ lɔ panda. Fale, ti gii lɔ la kɛ kungɔ ti gawote a pele yeka. Ti ye gawoteni? Tɔmasei lɛnga lɔ: “Logɔs [Njiei] yɛni a ngewɔ lɔ.” (A New Translation of the Bible) “Njiei yɛni a ngewɔ lɔ.” (The New Testament in an Improved Version) “Numui na ti yɛ a toli a Njiei i yɛ na lɔ. Tia Ngewɔ lɔ ti yɛ heini tawao tia Ngewɔ ti yɛ yakpe.” (Ngowili Yekpei Numu Kpɛlɛɛ Va) Baibui yawotengoi jisia ti kɛnga gboleiŋ kɛ Njiei yana Kpaya gbi Yewɔi a ngie. * Kɛɛ, jifa Njiei yalɛngɔ wa Jɛhova gbatɛ haiŋsia gbi lia, na  va mia ti ngi loini “a ngewɔ.” Kpambi ji ma, ji ti “Njiei” loini “a ngewɔ” i kɛma lɔ kɛ ngi “yalɛngoi.”

HINDEI YEPEKEI JƆN NDENI

Nunga gbotoma tii Gliki yei na gɔɔ ti Baibui nyɛini hu. Fale, numu a ye gu i na gɔɔ Jɔn yɛ ndeni? Gii lɛ a tɔmasei ji: Ina kamɔi ngi gaalupuisia gaailɔ a hinda, kɛɛ ti kpɛlɛ ti giiyei gba kɔlongɔ na ma i ti gaani la, gbɔɔ ta pie? Ma a hou lɔ ti ti kamɔ mɔli gbɔma kɔ i kpakiya lambo ti gama. Na a gbɔɔ ti ma ti gatɔ panda. Na bonda mia kungɔ bia bɛ bi pie. Kungɔ bi lɛ gulɔma a Jɔn gɔlɔ nyɛingoi gaa la, na a gbɔɔ bi ma kɔ bi Jɔn 1:​1 yatɔ vui panda.

Gii lɛ a na i lɛni gulɔma a nyɛin la Jɔn 1:​18: “Numu gbi ii ya Ngewɔ [Kpaya gbi Yewɔi] lɔni wati gbi ma.” Kɛɛ nunga ti Yesu lɔnga na yɛni a Ngewɔ Hindolui. Jɔn ndeilɔ gbɔma yɛɛ: “Njiɛi [Yesu] i woteilɔ a nduwu, i hei mu lia (kɛ mu ngi nɔlɔi lɔilɔ.)” (Jɔn 1:​14) Yesu tia Kpaya gbi Yewɔi tɛɛ gu ti yɛ a numu yia, gbɛva see Jɔn ndeilɔ yɛ Njiei tia “Ngewɔ lɔ ti yɛ na.” (Mua mia mu nyɛini hi) Numu tia numu ta ye yɛ hinda yia, i wote gbɔma a ye numui na? I gbɛɛ na ma, Yesu kɛilɔ gboleiŋ Jɔn 17:​3 (NY), kɛ nduahu lɔ ngi ma kɛ Ngewɔ. Ajifa i “tɔnya Yewɔ Yakpei,” loilɔ a ngi Kɛkɛ. Jɔn yamailɔ gbɔma i nde Jɔn 20:​31 yɛɛ: “Jisia ti nyɛingɔe, kɔ wu la la kɛ Yesu i yɛni a Kristi lɔ, Ngewɔ Hiindoloi; tao wu langa a ngie wu ndɛvu jɔɔ ngi biyɛi hu.” Kɔɔ kɛ kpambi ji ma, Jɔn ii Yesu loini a Ngewɔ, kɛɛ i ngi loini a Ngewɔ Hindolui lɔ. Hindei jisia kpɛlɛ mu kaanga Jɔn gɔlɔ nyɛingoi hu, ti gbɔnga mu ma mu kɔɔnga kɛ ji i ndeni Jɔn 1:​1 yɛ Yesu, Njiei, yɛni “a Ngewɔ lɔ,” na kɛma lɔ kɛ Yesu yalɛngoi, kɛɛ ii hitini Kpaya gbi Yewɔi hu.

MATIU KƐILƆ KƐ NA JƆN NDENI TƆNYI MIA

Gii lɛ gbɔma a kamɔi na tia ngi gaalupuisia. Ina i yamailɔ gbɔma i hindanga hugɛ a tie kɔlongɔ ye hinda yakpi na ma, kɛɛ tuŋ ti lɛnga lɔ kiti hu, gbɔɔ ta pie? Ta  kamɔ yeka mɔli lɔ kɔlongɔ ye hinda yakpi na ma. Ina ye kamɔi na hinda hugɛilɔ a tie sia lee ti kamɔ yɛ hugɛni la, ti gbotoma ta gbua lɔ kiti hu. Sia lee kaalupui nasia na, ina bia bɛ bi hu gitingoi lɛ tuŋ kɔlongɔ na ma Jɔn ndeni Yesu tia Kpaya gbi Yewɔi ti luahui ma, ba Baibu gɔlɔ nyɛinmɔ yeka layei gaa lɔ, kɔ bi tɔ na ta bɛ ndeni kɔlongɔ na ma. Tɔmasei mia a ji, Matui gɔlɔ nyɛingoi hu, ji ti Yesu mɔlini kɔlongɔ kɛlɛma vulisia ma, Yesu ndeilɔ yɛɛ: “Yefoloi na kɛ yekpelei na numu gbi ii kɔɔ, malikɛisia vuli bɛ ti aijɛnɛ tao Hiindoloi bɛ, kɛ lee Kɛkɛi yakpe.” (Matiu 24:​36) Njiei jisia ti ye kɛni kɛ Yesu Kpaya gbi Yewɔi yana a ngie?

Yesu kɛilɔ kɛ hindanga lɔ na nahi Kɛkei kɔɔngɔ, kɛɛ Hindolui ii kɔɔ. Ina Yesu tia Kpaya gbi Yewɔi numu yia mia a tie, a yɛɛ a hindei nasia kpɛlɛ hu gɔɔ ngi Kɛkɛ kɔɔngɔ. Fale, Kɛkei tia Hindolui ti ma ii hɔɔni. Kɛɛ nunga lɛnga ta ndeilɔ tɛɛ: ‘Jifa Yesu yɛ ndunyi ma na va mia i na leni.’ Kɛɛ ina bɛ hi mia hindei na, gbɛva mia ii yɛpɛni kɔlongɔ mbawo yafei ma? Ina mbawo yafei bɛ Ngewɔ mia sia nunga ti giingɔ la, gbɛva mia Yesu ii ndeni yɛ mbawo yafei bɛ hindei nasia hu gɔɔ lɔ Kɛkei kɔɔngɔ?

Sia ba yɛ lɛma gulɔma a Baibui gaa la, ba Baibu yakei yepekeisia lɔ lɔ ta yɛpɛ kɔlongɔ hindei ji ma. Ta tɔnyi gɛ lɔ a bie kɔlongɔ Kɛkei ma, Hindolui, kɛ mbawo yafei.—Saam 90:​2; Toobla ti Wiehindɛisia 7:​55; Kɔlɔsiabla 1:​15.

^ kɔlɔ wumbumi 3 Bi longa bi Jɔn 1:​1 yatɔ panda, Lugbu Yawui 1, 2008, Watchtower gaa kɔlɔ laa 24 kɛ 25, Jɛhova Jeliwuableisia mia ti kpatɛni.