Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Haiŋ Gbi Lɔ Mu Hu Na Ɛɛ Haa Ta Toi A “Ngafei”?

Haiŋ Gbi Lɔ Mu Hu Na Ɛɛ Haa Ta Toi A “Ngafei”?

BI GIINGƆ la kɛ haiŋ gbi lɔ mu hu na ɛɛ haa? Nunga gbotoma ti langɔ la kɛ haiŋ lɔ nuuvuisia hu na ɛɛ haa. Ti giingɔ la kɛ numu haanga ye haiŋ na ta toi a “ngafei,” a gbua ngi hu i li hinda yeka. Jifa lanayei ji vayangɔ ha ndunyi hu gbi, a wote a kɔlama wa lɔ nunga gama ji ta tɔ kɛ Baibui ii ndeni hi klobɛɛ va. Kɛɛ gbɛ mia “ngafei” le sia Baibui ndeni la?

Baibu nyɛinbla ti Hiblu yei ji luʹak kɛ Gliki yei ji pɛnɛvʹma lɔ yayengeni ji ti yɛ yɛpɛma kɔlongɔ numui ma ɔɔ ndɛvu vɛfei. Ngewɔ Layei njiei jisia ye mbui gɛilɔ a mue. Tɔmasei mia a ji, Saam 104:​29 ndeilɔ yɛɛ: “Ba ndɛvu vɛfɛ [luʹak] gbua ti hokpa la kɛ ta ha, Ti wote gbɔma a ti vufulei.” Jeems 2:​26 ndeilɔ yɛɛ: “Mu luwui hangɔ a yɛla ina mu yafɛi [pɛnɛvʹma] ii hu.” Kpambi ji kɛma lɔ kɛ ndɛvu vɛfei ii yɛɛ numu hu, ngi haangoi. Baibu yawotebla gbotoma ti kɛilɔ kɛ njiei ji luʹak looni ndɛvu vɛfei lɔ va. Tɔmasei yɛni a na lɔ Ngewɔ ndeni Noa ma pɛiŋ a yaa wa a Njave Wai. I ndeilɔ yɛɛ: “Nga walɔ a njave wa ndunyɛi hu fuuhani kpɛlɛ jukuuva, nasia lee ndɛvu [luʹak] ti hu, ngele bu.” (Jɛnɛsis 6:​17; 7:​15, 22) Fale, ji Baibui a yɛpɛ kɔlongɔ numu yafei ma, a yɛpɛ kɔlongɔ ngi lɛvui lɔ ma.

Ndɛvui ii yɛɛ numu hu, ngi haangoi. Piengoi lee sia lɛdui na, ye na a yenge a bati, bati ii yɛɛ hu, ɛɛ yenge ɔɔ bati gbɔyɔnga lee hu, a gbe lɔ a yenge la. Lɛdui ye na bɛ a yenge a kɔlɛnti, bi kpua lee kɔlɛnti ma a gbe lɔ a yenge la. Hi mia mua bɛ mu na, ndɛvu  vɛfei mia a pie mu yɛ a funuvuisia. Sia lee bati ɔɔ kɔlɛnti na, ndɛvu vɛfei gbɔyɔnga lee mu hu, muɛ yaa hinda gbi gɔɔ gbɔma. Tao sia Baibui ndeni la, ndɛvu vɛfei gbua lee mu hokpa la, mua ‘ha kɛ mu wotenga gbɔma a fufuli.’

Ɛkkliisiastiis 12:​7 ndeilɔ yɛ numu haanga: “Fufule [ngi luwui] yama ndɔɔmɛi kia i yɛ na kɛ ngafɛi i yama Ngewɔ gama na i feni.” Ji ndɛvu vɛfei a gbua numu hu, a haa lɔ kɛ i yamanga ndɔɔmi mia i gbuani na. Ndɛvu vɛfei a yama numui na gama lɔ i feni, Ngewɔ. (Joob 34:​14, 15; Saam 36:​9) Ji ii kɛma klobɛɛ va kɛ ndɛvu vɛfei a gbua i li ngelegohu. Kɛɛ, i kɛma lɔ kɛ numu gbi haanga kɔ i gu ndɛvui ma gbɔma, Jɛhova mia lee kpayei ngi yeya ndɛvu ve va gbɔma ngi wɛ. Fale, Jɛhova gbayei huwue mia lee numu a gu i ndɛvu vɛfei majɔɔ gbɔma, kɔ i gu i yama ndɛvu hu.

Mu gohunɛingɔ wa kɔɔ va kɛ Ngewɔ wama haabla ti wuma hei hu. (Jɔn 5:​28, 29) A wati na, Jɛhova a ti wu hei hu a nduwu nina lɔ. Wati na a yɛ a kohunɛ ma wati lɔ.

Bi longa bi hinda hu gɔɔ i lee ji ma sia Baibui ye njiei ji “ngafɛi” yayengeni la, bukui ji gaa The Road to Everlasting Life—Have You Found It? i hinje kɔlɔ laa 12 ma i too kɔlɔ laa 14 ma, Jɛhova Jeliwuableisia mia ti kpatɛni.