Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KAA YE MATUI

Njiei Nasia Daniɛl Nyɛini Kɔlongɔ Mɛsayei Walei Ma

Njiei Nasia Daniɛl Nyɛini Kɔlongɔ Mɛsayei Walei Ma

FO 500 leengɔ woma pɛiŋ ta yaa Yesu le ndunyi ji ma, Ngewɔ lutui Daniɛl yɛɛ na. Jɛhova hinda magɛilɔ a Daniɛl na a kɛ wati na a Yesu mali kɔ i wote a Mɛsayei, ɔɔ Klisti. I ndeilɔ Daniɛl ma yɛɛ: “Fale, kɔɔ bi hugbe, kɛ i hiye sawa gbualɛi ma Jɛrusalɛm yamava kɛ lova i to yemalimɔi ma, yesamɛi, hoki wɔfela ta lewelɔ: kɛ hoki nuu sawa gbɔyɔngɔ mahu fele gohu.”—Daniɛl 9:​25.

 Kɔ mu gu mu wati na gɔɔ Mɛsayei a gɛ, kungɔ mu wati na gɔɔ mua tato a kpawei waa la tooma ngi walei ma. Sia Daniɛl ndeni la, a “hiye sawa gbualɛi ma Jɛrusalɛm yamava kɛ lova.” Kɛɛ mi gbe mia ti sawei gbuani? Sia Baibu gɔlɔnyɛinbla ye ngla Nɛhɛmaia nyɛini la, ti sawei gbɔilɔ Jelusalɛm ma gɔlei loo va, “mahɛi Aataksaaksiis vooi yenuu yila gbɔyɔngɔi hu.” (Nɛhɛmaia 2:​1, 5-8) Njia wova nyɛinbla ti kɛilɔ kɛ 474 B.C.E. hu mia Atasaksis guni a fo yia mahayei hu. Fale, fo 455 B.C.E. mia i woteni a fo 20 mahayei hu. Mu mia gɔɔnga naa kungɔ mu tato na a kpawei waa la.

Daniɛl kɛilɔ wati na a mbumbu pɛiŋ Mɛsayei aa ya gɛ, i hinje 455 B.C.E. ma. Daniɛl gɔlɔ nyɛingoi kɛilɔ kɛ “hoki wɔfela a lewelɔ: kɛ hoki nuu sawa gbɔyɔngɔ mahu fele,” na ye jikei mia a wiki 69. Wati lolɛ mia wiki 69 ji a mbumbu? Baibui yawotengoi gbotoma ti kɛnga kɛ wiki jisia ti looni foisia va lɔ. Fale, wiki yia gbi looni fo wɔfila lɔ va. Juublei nasia ti yɛ na wɔɔ, wati lɛnga hi mia ti yɛɛ a foi gbawa. Tɔmasei gɛ va, ti yɛ a Sabati hou foi ye wɔfilei hu, sia lee ti yɛ a hou jii ye wɔfilei ma. (Ɛksodus 23:​10, 11) Fale mu wiki 69 jisia gbawanga heima wɔfila mu pu hinda yia, mua gu fo 483 lɔ ma.

Mu fo 483 gbawanga i hinje 455 B.C.E. ma, a wa a mue 29 C.E. lɔ. Tao foi na hu mia Yesu baptaisini kɛ Ngewɔ ngi malinga kɔ i wote a Mɛsayei. * (Luuk 3:​1, 2, 21, 22) Ji ɛɛ pie mu lala kɛ na gbi lee Baibui ndeni a wue lɔ sia lee a nde la?

^ kɔlɔ wumbumi 2 I hinje 455 B.C.E. ma i too 1 B.C.E. ma, fo 454 mia. I hinje 1 B.C.E. ma i too 1 C.E. ma, fo yia mia. I hinje 1 C.E. ma i too 29 C.E. ma, fo 28 mia. Mu fui jisia wunga hinda yia, mua gu fo 483 lɔ ma. (454+1+28=483) Ti Yesu wani 33 C.E. hu lɔ. (Daniɛl 9:​24, 26) Bi longa bi hinda hu gɔɔ i lee ji ma bukui jisia gaa, Pay Attention to Daniel’s Prophecy! ngu 11, kɛ Insight on the Scriptures, Bukui 2, kɔlɔ laa 899 i too kɔlɔ laa 901 ma. Jɛhova Jeliwuableisia mia ti fenjɔ gbatɛni.