Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

Baibui Ye Yɛpɛni Kɔlongɔ Fui Ji Ma—​1914?

Baibui Ye Yɛpɛni Kɔlongɔ Fui Ji Ma—​1914?

Baibui Ye Yɛpɛni Kɔlongɔ Fui Ji Ma—1914?

FO 40 nyikɔ va pɛiŋ 1914 aa ya hiti, Baibu gaalupuisia ti ndeilɔ tɛ hindanga ta wue lɔ ye fui ji hu. Hindei ye gbɛnga mia ti yɛpɛni kɔlongɔ ma, tao hinda wai ye gbɛ mia wueni 1914 hu?

Sia nyɛingɔ la Luuk 21:​24 (NY), Yesu ndeilɔ yɛɛ: “Kɛnyɛblaa wekangaa tii Ngewɔ gɔɔ ta Jelusalɛm niwaniwalɔ ti gɔwɔbu haaŋ i to yeekɛnyɛisia ti watii gbɔyɔ-gbelei ma.” Jelusalɛm mia yɛla ta wai le Juubleisia va tao na mia maha heimi yɛna  mahangei nasia kpɛlɛ va ti gbuani Devidi le gbambi ma. (Saam 48:​1, 2) Ye mahangei jisia ti yɛ gba mahanga kpɛlɛ ma ti yɛna. Gbɛva see, ti heilɔ “Ndemɔi [“Jɛhova,” NW] ngi maha heimɛi” sia Ngewɔ yama jɔngɔ gbuabla na. (I Krɔnikls 29:​23; Jɛrɛmaia 3:​17) Jelusalɛm yɛ looni Jɛhova mahayei lɔ va.

Mi gbe mia kɛnyɛbla ti tatoni a Ngewɔ mahayei niwaniwa la, tao ti ye niwaniwani? Ti tatoni 607 B.C.E. hu lɔ, ji Babilɔnbleisia ti kɔ wɛɛni Juubleisia ma ti ti gbua, kɛ ti Jelusalɛm hu nyaninga. Jɛhova “maha heimɛi” wopoilɔ naa, gbɛva see numu gbi ii yɛ heini na tao maha gbi i yaa yɛ a gbua Devidi le gbambi ma. (II Kiŋs 25:​1-26) Kɛɛ kɛnyɛbla ta lɛ lɔ gulɔma a Jelusalɛm niwaniwa la kunafɔ va? Ɔ-ɔ, gbɛva see Isikiɛl yɛpɛilɔ kɔlongɔ Jelusalɛm mahin ye kɛlɛma yi ma, Sɛdikaya, yɛɛ: “Bɔlɔ wai gbua, maha bɔlɔi gbua: . . . Ji gbɔma ɛɛ yɛna gboŋ, haa . . . ngiyɛkɛ i wa na ngi wo a ji; kɛ nga  fe lɔ ngiɛ.” (Ɛsiikiɛl 21:​26, 27) Numui na ngi wo a Devidi maha bɔlei yɛni a Klisti Yesu lɔ. (Luuk 1:​32, 33) Jelusalɛm niwaniwalei a gɛlɛ lɔ ji Yesu a wote a mahin.

Mi gbe mia ji a wue? Yesu kɛilɔ kɛ kɛnyɛbla ta mahaya yayenge lɔ wati lɛnga va. Na nyɛingɔ Daniɛl ngu 4 a gbɔɔ mu ma mu kɔɔ wati na ti mahayei a gɛlɛ. I yɛpɛilɔ kɔlongɔ kulɔma hindei nasia ma Babilɔn mahin Nɛbukanaisa hengani la. Ye hengei na hu, i tɔilɔ ti ngulu lakpawa wɔ. Ye ngukpi ii guni aa vale, gbɛva see ti ma yililɔ a kɔli kɛ kani gbɔlu. Kɛ maika yia ndenga yɛɛ: “Gbɛ watiisia ti wɔfela ti lewe ngi mahu.”—Mua mia mu nyɛini hi; Daniɛl 4:​10-16.

Wati lɛnga ji Baibui a yɛpɛ kɔlongɔ ngui ma, a yɛpɛ kɔlongɔ mahayei lɔ ma. (Ɛsiikiɛl 17:​22-24; 31:​2-5) Ngui na ti pɔni, i kɛma lɔ kɛ wati a hiti lɔ nahi numu ɛɛ ya yɛ hei Ngewɔ maha heimi ngi yama jɔngɔ gbua va. Kɛɛ Daniɛl hengei kɛilɔ gbɔma kɛ Ngewɔ maha heimi ɛɛ lo hi kunafɔ va, kɛɛ watisia ti wɔfila ta lewe lɔ pɛiŋ numu a yaa hei na. Kɛɛ wati lolɛ mia ji a mbumbu?

Hinda Gɛngɔ 12:​6, 14 kɛilɔ kɛ wati sawa kɛ ye kutu a gu a “folo taosin yila kalɛ hɔndɔ fele kalɛ nuu sawa gbɔyɔngɔ” lɔ. Ji kɛma lɔ kɛ “watiisia ti wɔfela” a gu a folo 2,520 lɔ. Jelusalɛm nyaningoi woma, folo 2,520 va yana lee kɛnyɛbla taa Ngewɔ maha heimi niwaniwa. Ji kɛnga gboleiŋ kɛ wati ji leengoi folo 2,520 ma. Nɔmbɛisia 14:​34 kɛ Ɛsiikiɛl 4:​6 ti folo yia wumbuilɔ fo yia va. Fale, “watiisia ti wɔfela” a gu a fo 2,520 lɔ.

Fo 2,520 latoni Galui hu lɔ 607 B.C.E., ji Babilɔnbleisia ti Jelusalɛm hu nyanini kɛ ti mahin gbua mahayei hu na gbuani Devidi le gbambi ma. Jelusalɛm niwaniwalei gɛlɛni Galui hu lɔ, 1914. Wati na mia ‘kɛnyɛisia ti wati’ gbɔyɔni, kɛ Ngewɔ Yesu Klisti wotenga a Maha ngelegohu. *Saam 2:​1-6; Daniɛl 7:​13, 14.

 Hindei nasia kinii Yesu ndeni yɛ ta wue ji a wote a Mahin ngelegohu tia ha wuema, sia nyikɔ koi na, ndɔlei, ndɔɛ gbɛilei, kɛ fitinisia. (Matiu 24:​3-8; Luuk 21:​11) Pili na hindei jisia ti wueni la 1914 hu, i kɛnga gboleiŋ kɛ fui ji hu mia Ngewɔ Yesu woteni a Mahin ngelegohu tao kɛ wati ma ii ya guani kɔ Ngewɔ i kɛlɛma wu Setana lunyi ji ma.—II Timɔti 3:​1-5.

^ kɔlɔ wumbumi 4 I hinje Galui ma 607 B.C.E. i too Galui ma 1 B.C.E. fo 606 mia. I hinje Galui ma 1 B.C.E. i too Galui ma 1914 C.E. fo 1,914 mia. Mu fo 606 gbɛɛnga fo 1,914 ma, mua gu fo 2,520 lɔ ma. (606+1,914=2,520) Bi longa bi hinda hu gɔɔ i lee ji ma kɔlongɔ Jelusalɛm nyanilei ma 607 B.C.E., kɔlɔ wui ji gaa “Chronology” bukui ji hu Insight on the Scriptures, Jɛhova Jeliwuableisia mia ti kpatɛni.