Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NGU 9

Gbɔɔ A Kɛ Kɛ Ndunyi Ji Gbɔyɔma Sange?

Gbɔɔ A Kɛ Kɛ Ndunyi Ji Gbɔyɔma Sange?

1. Mua ye kɔɔ na wa ma wuema sina kulɔma?

BI WOLONGA gba vei ma lɛdui hu ɔɔ tɛlivisɔn hu, kɛ bi bia yekpe mɔlinga, ‘Ina mu ye lima?’ Pili na hinda nyamuisia ti wuema la ha ndunyi hu, a pie lɔ nunga gbotoma ti gii la kɛ ndunyi ji wa ma gbɔyɔma sange. Kɛɛ tɔnya mia kɛ ndunyi wa ma gbɔyɔma sange? Pele gbi lɔ na mua gu mu kɔɔ na wa ma wuema sina kulɔma? Ɔɔ. Sia bɛ nuuvuisia tɛɛ gu taa kɛ na wa ma wuema sina kulɔma, Jɛhova a gu lɔ. Tao i kɛnga a mue Baibui hu na wa ma wuema sina kulɔma.—Aisaia 46:​10; Jeems 4:​14.

2, 3. Gbɔɔ Yesu womabla ti longɔ yɛla ti kɔɔ? Yesu ye ti gbɛmboni?

2 Ji Baibui a yɛpɛ kɔlongɔ ndunyi gbɔyɔlei ma, ndɔɛ yana aa yɛ yɛpɛma kɔlongɔ ma, a yɛpɛ hinda nyamuisia ti gbɔyɔlei lɔ ma. Ji Yesu Klisi yɛ ndunyi ma, i ndeilɔ yɛ Ngewɔ Mahayei mia wa ma yɛma ndunyi ji kpɛlɛ mahu. (Luuk 4:​43) Ngi womabla ti longɔ yɛla ti kɔɔ wati na Ngewɔ Mahayei a wa, fale ti ngi mɔlilɔ tɛɛ: “Gbɛ lɔmaseli lɔ a bi walɛi gɛ, kɛ ndunyɛi gɛlɛmɛi?” (Matiu 24:​3) Yesu ii ye wati gɛni a tie, kɛɛ i kɛilɔ a tie hindei nasia ta wue pɛiŋ ndunyi aa ya gbɔyɔ. Tao ye hindei nasia lɔ naa wuema.

3 Mua hindanga gaa lɔ kɔlɔ ngui ji hu na a gbɔ mu ma mu kɔɔ kɛ ndunyi gbɔyɔma sange. Kɛɛ mu kaa  wue lɛ pɛiŋ kɔlongɔ kɔ yia ma, na gɔni ngelegohu. Na a gbɔɔ mu ma mu kɔɔ na va ndunyi hu nyamungɔ hi.

KOI NA GƆNI NGELEGOHU

4, 5. (a) Gbɔɔ wueni ngelegohu ji Yesu woteni a Mahin? (b) Sia Hinda Gɛngɔ 12:​12 ndeni la, gbɔɔ wueni ndunyi ma ji ti Setana wilini na?

4 Mu yɛ kaanga Ngu 8 hu kɛ 1914 mia Yesu Klisi woteni a Mahin ngelegohu. (Daniɛl 7:​13, 14) Hinda Gɛngɔ yɛpɛilɔ kɔlongɔ na ma wueni yɛɛ: “Kɔ gɔilɔ aijɛnɛ: Maikeɛl [ɔɔ, Yesu] tia ngi malikɛisia ti kɔ gɔilɔ a ndambɛi na: tao ndambɛi [Setana] tia ngi mablɛisia ti kɔ gɔilɔ.” * Setana tia ngi maikeisia ti baailɔ a ye koi na kɛ ti ti gbuanga ngelegohu ti ti wili ndunyi ji ma. Gii lɛ a kohunɛ na yɛ ngelegohu na woma! Kɛɛ ɔ ndunyi hu ta? Baibui ndeilɔ yɛ nimisa wa a yɛɛ na. Gbɛva le? Gbɛva see Setana liileengɔ wa le “ajifa i kɔlɔ kɛ wati wulo leke” mia longa ngi yeya.—Hinda Gɛngɔ 12:​7, 9, 12.

5 Setana waa a nimisa gboto ndunyi ji hu. Ngi liileengɔ wa le, gbɛva see i kɔɔ lɔ kɛ Ngewɔ wa ma kpɔyɔma a ngie sange. Mu yɛpɛ lɛ naa kɔlongɔ hindei nasia ma Yesu ndeni yɛ ta wue kɛlɛma vuisia ma.—Kɛlɛma Yɛpei 24 gaa na kɔlɔ laa 220 ma.

HINDEI NASIA TA WUE KƐLƐMA VUISIA MA

6, 7. Gbɛ mia mua nde kɔlongɔ koi kɛ ndɔlei ma?

6 Koi. Yesu ndeilɔ yɛ, kɛnyɛ “a hiyelɔ a kɛnyɛ, mahawu a hiye a mahawu.” (Matiu 24:​7) Ti nunga waanga koi hu mu nda wati ji hu i lee wati yeka gbi ma. Nunga lɛnga ta kaa wue kɔlongɔ hindeisia  ma ta wue ndunyi hu ti ndeilɔ tɛ i hinje 1914 ma nungei nasia ti ti waanga koi hu ti leengɔ miliɔn 100 ma. Nungei nasia ti ti waani koi hu i hinje 1900 ma haŋ i too 2000 ma, teengɔ poloŋ nasia ma ti ti waani pɛiŋ 1900 aa ya hiti. Gii lɛ a kpalei na kɛ ndiinyani na koi waa la nunga miliɔn gboto gama!

7 Ndɔlei. Yesu ndeilɔ gbɔma yɛɛ: “Ndɔlɛ a yɛlɔ na.” (Luuk 21:​11) Sia bɛ mɛhɛ gbotongɔ a wati ji, kɛɛ tuŋ nunga gbotoma mɛhɛ yekpe ii ti yeya mɛ va. Kɛɛ gbɛva le? Gbɛva see navo ii ti yeya mɛhɛ yeya va, ɔɔ ndɔɔma tuhaiŋ hiŋ va. Ndɔɔ lɛnga hu, nunga gbotoma ta yii a ndɔlei lɔ. Nasia ti looni kahugbua hindei gulɔ ndunyi hu kpɛlɛ, tɛ ndenga miliɔn gboto ta haa lɔ fo gbi jifa mɛhɛ yekpe ii na mɛ va.

8, 9. Gbɛ mia a kɛ kɛ na Yesu ndeni kɔlongɔ ndɔɛ gbɛlilei ma kɛ higbei, ta wuema?

8 Ndɔɛ gbɛlilei. Yesu ndeilɔ yɛɛ: “Ndɔlɔi a gbɛlilɔ wa.” (Luuk 21:​11) Nunga ti tɔnga kɛ fo gbi lee ndɔɛ a gbɛli lɔ.  I hinje 1900 ma, nungei nasia ti haanga ji ndɔɛ a gbɛli, ti leengɔ miliɔn fele ma. Tao sia bɛ sayɛnsibla ti hakanga gbatɛnga na a gbɔ ti ma kɔ ti gu ti ndɔɛ gbɛlilei magɔɔ pɛiŋ aa ya wue, nunga ti gbotongɔ tuŋ ta haa ji ndɔɛ a gbɛli.

9 Higbei. Yesu yɛ ndeilɔ yɛ “heegbɛisia” ta yɛɛ na. Higbɛ nyamu-nyamuisia ta yɛɛ na nahi ta vaya hu fulo tao ta nunga waa fulo. (Luki 21:​11NY) Sia bɛ nunga ti hale hindei hugɔɔnga wa, kɛɛ higbɛnga lɔ na tuŋ nahi tii ya hale majɔɔni ti va. Nunga lɛnga pɛiŋ tɛ fo gbi lee nunga miliɔn gboto ta haa lɔ higbɛ gɛwɛ-gɛwɛnga yeya sia nyikɔ tɔhɛbi na, gbelui, kɛ a-gbo-a-bali. I baa na ma, fo 40 leengɔ woma halebla ti higbɛ nina 30 wɔfɛgbuanga nahi ti lɛnga tii ya guni hale ma ti va.

NUNGA TI WUEHINDEISIA KƐLƐMA VUISIA MA

10. Hindei nasia II Timɔti 3:​1-5 yɛpɛni kɔlongɔ ma, tia wuema ha?

10 Baibui ndeilɔ II Timɔti 3:​1-5 yɛɛ: “Foloi yekɛlɛmayeisia  ma wati nyamu gbotoa ta walɔ.” Na woma, Pɔɔl yɛpɛilɔ kɔlongɔ pili na ma nunga ti wuehindeisia ta yɛ na kɛlɛma vuisia ma. I ndeilɔ yɛ nunga

  • ta lo lɔ a tia yekpe

  • ta lo lɔ a kani ɔɔ navui

  • ta wue lɔ a ngawobla kɛ mamanibla

  • ta faliailɔ a ti lebla

  • tɛɛ lo a ti bondeisia

  • ndiimabebla

  • nasia tɛɛ ti lii hou

  • ta wote lɔ a bayabla

  • ta lo lɔ a hinda nɛnɛsia i lee Ngewɔ ma

11. Sia Saam 92:​7 ndeni la, gbɛ mia wa ma wuema a nunga nyamuisia?

11 Kɛyi jisia bonda lɔ nunga hu mia bi na? Kɛyi jisia lɔ nunga gbotoma hu ndunyi hu. Ngewɔ wa ma sange hinda wuema kɔlongɔ nasia ma kɛyi ji ti hu. Baibui ndeilɔ yɛɛ: “Ji hinda nyamubla ta lola kia kpitii na, kɛ hinda nyamu wiebla ta wɔpɔ” ta mia Ngewɔ a “ti jukuu kunafɔ va.”—Saam 92:​7.

 HINDA YEKPI NASIA TA WUE KƐLƐMA VUISIA MA

12, 13. Hindei ye gbɛnga mia Jɛhova gbɔnga ngi mabla ma ti kɔɔnga kɛlɛma vui jisia ma?

12 Baibui ndeilɔ yɛ hinda nyamuisia kɛ kpagba a gboto lɔ wa kɛlɛma vuisia ma. Kɛɛ i baa na ma, i ndeilɔ gbɔma yɛ hinda yekpenga ta wue lɔ.

“Ngewɔ mahayɛi wowili yekpei ji ta ndelɔ ndunyɛi hu gbi.”—Matiu 24:​14

13 Nunga ta Baibui ye mbui gɔɔ lɔ. Daniɛl kɔlei nyɛin lɔ kɔlongɔ kɛlɛma vuisia ma. I ndeilɔ yɛɛ: “Hindahugɔɔlɛi a matolɔ.” (Daniɛl 12:​4) Ngewɔ a gbɔɔ ngi mabla ma kɔ ti Baibui yatɔ i lee kpɛlɛ ma. Tao 1914 hu mia vui Jɛhova tatoni a na wue la. Tɔmasei gɛ va, i gbɔnga ti ma ti tɔnyi gɔɔnga kɔlongɔ ngi biyei ma, na ngi longɔ la ndunyi ji va, tɔnyi kɔlongɔ ngumawo haiŋ ma, kɛyi na numu a yɛ hu ji a haa, kɛ hinje kambahuin. I gbɛɛ na ma, mu kaa wuenga kɛ Ngewɔ Mahayei mia lee a gu i hindeisia kpɛlɛ la loko ma ndunyi ji hu. Jɛhova mabla ti gaanga sia ta ye jia kɔ ti tia yekpe nafa tao ti wa a tato Ngewɔ gama. Tao ti kɔɔnga gbɔɔ Ngewɔ Mahayei le tao sia i ye wa ma hindeisia kpɛlɛ lama loko ma ndunyi ji ma. Kɛɛ gbɔɔ ti piema a hindei jisia kpɛlɛ ti kaanga? Mɔli ji gbɛmbo va, mu hindei yepekei na lɔ lɛ naa Baibui ndeni yɛ a wue kɛlɛma vuisia ma.—Kɛlɛma Yɛpei 2125 gaa na kɔlɔ laa 216 kɛ 221 ma.

14. Ndɔɔ lolɛ kɛ kɛnyɛyia lolɛ mia ha ti Ngewɔ layiei lema hu? Yeni mia ti ndema hu?

14 Ngewɔ layia lelei ndunyi hu kpɛlɛ. Ji Yesu yɛ yɛpɛma kɔlongɔ kɛlɛma vuisia ma i ndeilɔ yɛɛ: “Ngewɔ mahayɛi wowili yekpei ji ta ndelɔ ndunyɛi hu gbi.” (Matiu 24:​3, 14) Tao tia Ngewɔ layiei lema ndɔɔ gboto hu nahi teengɔ 230 ma, kɛ kɛnyɛyia gboto hu nahi teengɔ 700 ma. Ndunyi hu kpɛlɛ Jɛhova  Jeliwuableisia nahi ti gbuanga “kɛnyɛi gbi hu,” tia gbɔma nunga ma ti kɔɔ na Ngewɔ Mahayei le kɛ na i wa ma piema nuuvuisia va. (Hinda Gɛngɔ 7:​9) Tao tɛɛ ti pawa na va. Sia bɛ nunga gbotoma ti lolongɔ a tie tao ta juyei hitɛ ti woma, Ngewɔ layia lelei ji a lɛ lɔ gulɔma sia lee Yesu yɛ ndeni la.—Luuk 21:​17.

GBƆƆ NAA KUNGƆ BI PIE?

15. (a) Bi langɔ la kɛ mu kɛlɛma vuisia hu lɔ naa? Gbɛva le? (b) Gbɛ mia wa ma wuema a nasia tɛɛ golo Jɛhova wɛ, kɛ nasia ta golo ngi wɛ?

15 Bi langɔ la kɛ mu kɛlɛma vuisia hu lɔ naa? Hindei nasia kpɛlɛ Baibui ndeni yɛ ta wue kɛlɛma vuisia ma, ti gbotoma lɔ wuema ha. Jɛhova kɛlɛma wuma sange Ngewɔ layia lelei ma kɛ “yekɛlɛmɛi” wanga. (Matiu 24:​14) Ye kɛlɛmi a ye wa? A wa lɔ ji Ngewɔ a kpɔyɔ a hinda nyamui kpɛlɛ, a Amagɛdɔn goi huwue. Jɛhova a Yesu tia ngi maikeisia yayenge lɔ kɔ i kpɔyɔ a nasia kpɛlɛ tɛɛ golo Ngi wɛ tia ngi Lui. (II Tɛsaloniabla 1:​6-9) Na woma, Setana tia ngi maikeisia tɛɛ ya yɛna nuuvu yaka va. Kɛɛ nasia kpɛlɛ ta golo Ngewɔ bu kɛ ngi Mahayei ta yɛɛ na ji Ngewɔ a hindei nasia wue i yɛ lahedi wumbunga pie va sina kulɔma.—Hinda Gɛngɔ 20:​1-3; 21:​3-5.

16. Sia kɛlɛma vuisia mia naa mu hu, gbɛ mia kungɔ bi pie?

16 Setana lunyi ji gɛlɛma sange. Fale a nyande lɔ mu mua yekpe mɔli muɛ, ‘Gbɛ mia naa kungɔ ngi pie?’ Jɛhova longɔ bi lɛ gulɔma a kaa wue la kɔlongɔ na ma Baibui hu. Tao kungɔ bi ye kaa ji wuelei madihou. (Jɔn 17:​3) Komi nasia Jɛhova Jeliwuableisia ta hou wiki gbi, ta gbɔ lɔ nunga ma ti Baibui ye mbui gɔɔ. Fale lapi kɔ bi yaa li ye komi jisia hu.  (Hiibrublɛisia 10:​24, 25 gaa.) Ina bi tɔnga kɛ kungɔ bi bi wuehindeisia mawove, a nyande lɔ bi mawove. Sia lee ba yɛ bi wuehindeisia mawovema, hi mia bi ndiamɔyei a Jɛhova a yɛ kpau.—Jeems 4:​8.

17. Gbɛva mia nunga gbotoma ti lii ɛɛ yɛ ma ji wati a fo kɔ Ngewɔ i kpɔyɔ a nunga nyamuisia?

17 Toomui Pɔɔl ndeilɔ kɛ nunga gbotoma ti lii ɛɛ yɛ ma ji wati a fo nunga nyamuisia ti jukuu va, a wue lɔ sia lee “humamɔ na a kpindi.” (I Tɛsaloniabla 5:​2) Yesu bɛ ndeilɔ kulɔma kɛ sia bɛ nunga gbotoma ta hindei nasia hu lɔ lɔ na a kɛ kɛ mu kɛlɛma vuisia hu lɔ, tɛɛ la la. I ndeilɔ yɛɛ: “Kia wɔ Noa ngi voloisia ti yɛ na, hi bɛ Nuuhiindoloi ngi walɛi i wama wiema. Gbamaile kia wɔ yefoloi nasia ma nja velɛi gulɔ, ti yɛ a mɛhɛ mɛ, ta kpɔle wie, ta nyaha jɔɔ, ta nyaha ve sɔɔ va, i hiti foloi na ma Noa i wuani ndɛndɛ wai hu. Kɛ tii yɛ kɔɔni haa . . . kɛ njavei i wani, i yei a ti gbi; hi bɛ Nuuhiindoloi ngi walɛi a yɛ na.”—Matiu 24:​37-39.

18. Ndahi ye gbɛ mia Yesu feni muɛ?

18 Yesu ndahi veilɔ yɛ mua luma “fofula ta ndɔhou ta ndɛvui ji magbeisia” taa mu ya ndema. Gbɛva see yɛ ndunyi ji gbɔyɔlei a wue lɔ sia lee ji na numu a gɔwɔ a “manii.” Tao gbɔma yɛ “hi lɔ a guala nasia gbi ma ti ndunyɛi hu.” I ndeilɔ gbɔma yɛ “a manɛ wie a watii gbi, wu manɛnɛ wie [ɔɔ, wu hɛ a wu lii gbi], kɔ wu gu wu ma i bawo hindɛi jisia yeya ti wama wiema, kɛ wu gu wu lo Nuuhiindoloi gulɔ.” (Luuk 21:​34-36) Gbɛva mia kungɔ mu wolo ndahi ji ma Yesu feni? Gbɛva see Ngewɔ wa ma Setana lunyi ji gɛlɛma sange. Nasia lee ta Jɛhova liima hindei wue kɛ Yesu, tia mia ta bawoya jɔɔ tao ta yɛ ndunya nini hu kunafɔ va.—Jɔn 3:​16; II Pita 3:​13.

^ kɔlɔ wumbumi 4 Yesu biyei yepekei mia a Maikeɛl. Kɔ bi kaa wue kɔlongɔ ji ma, Kɛlɛma Yɛpei 23 gaa na kɔlɔ laa 220 ma.