Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NGU 8

Gbɛ Mia Ngewɔ Mahayei Le?

Gbɛ Mia Ngewɔ Mahayei Le?

1. Gbɔɔ Yesu ngi womableisia gaani la? Mɔli ye gbɛnga mia mu wa ma yɛpɛma kɔlongɔ ma?

YESU ngi womableisia gaailɔ sia ta ye hɛ la. Tao ye hei na kpekpengɔ wa le. Hindei ye gbɛnga mia i hɛni fa? Gbɛva mia ye hei ji magbeengɔ wa ha mu va?

2. Hinda sawei ye gbɛnga mia Yesu ndeni yɛ mu hɛ fa?

2 Yesu ndeilɔ yɛɛ: “Hi nyɔkɔ lɔ wa hɛ, wuɛ: Mu Kɛkɛ bi aijɛnɛ, Bi biyɛi ma i gaye. Bi mahayɛi i wa. Bi liima hindɛi i wie ngele bu, kia a wie la aijɛnɛ.” (Matiu 6:​9-13 gaa.) Gbɛva mia Yesu ndeni yɛ mu hɛ hinda sawei jisia va?—Kɛlɛma Yɛpei 20 gaa na kɔlɔ laa 216 ma.

3. Gbɛ mia mu wa ma kaama kɔlongɔ Ngewɔ Mahayei ma?

3 Mu yɛ kaanga kɛ Ngewɔ biyei mia a Jɛhova. Tao mu yɛ kaa wuenga kɔlongɔ na ma Ngewɔ longɔ la nuuvuisia va, kɛ ndunyi ji. Kɛɛ gbɛ mia Yesu yɛ a yɛpɛ kɔlongɔ ma ji i ndeni yɛɛ: “Bi mahayɛi i wa”? Mu wa ma naa kaa wuema kɔlongɔ na ma Ngewɔ Mahayei le, na i wa ma piema, kɛ sia ye mahayei na a pie Ngewɔ biyei magaye.

GBƐ MIA NGEWƆ MAHAYEI LE?

4. Gbɛ mia Ngewɔ Mahayei le? Ye mia ye Mahin le?

4 Jɛhova Mahaya hugbatɛilɔ ngelegohu kɛ i loko loonga Yesu ma kɔ i yɛ a ye Mahin. Ye Mahayei na mia Baibui toini a Ngewɔ Mahayei. Yesu mia “mahangɛisia ti Mahɛi [le], kɛ ndemɔisia ti Lemɔi.”  (I Timɔti 6:​15) Nafei na Yesu a gu i nuuvuisia nafa la funuuvu mahaya gbi ɛɛ gu aa ti nafa la. Tao bi nuuvu mahangeisia kpɛlɛ wu bɛ hinda yia, ti gbayei ɛɛ hiti Yesu ndei hu.

5. Mi mia Yesu yɛma na a mahayei yayenge ndunyi ji mahu?

5 Folo 40 woma ji Yesu wuni hei hu, i yamailɔ ngelegohu. Wati lɛnga leengɔ woma Jɛhova ngi woteilɔ a Mahin Ngi Mahayei hu. (Toobla ti Wiehindɛisia 2:​33) Yesu yɛma ngelegohu lɔ a mahayei yayenge ndunyi ji mahu. (Hinda Gɛngɔ 11:​15) Na va mia Baibui ye mahayei na loini a “aijɛnɛ [ɔɔ, “ngelegohu,” NW] Mahayɛi.”—II Timɔti 4:​18.

6, 7. Yesu ye yɛ gba nuuvu mahangeisia kpɛlɛ ma?

6 Baibui yɛ Yesu yalɛngɔ i lee poloŋ nuuvu mahangeisia gbi ma gbɛva see “ta yakpe [mia] kunafɔ lɛvui . . . ngi hu.” (I Timɔti 6:​16) Nuuvu maha yakpe bɛ ii na nahi ɛɛ haa, kɛɛ Yesu ta ɛɛ haa kunafɔ va. Ji kɛma lɔ kɛ Yesu gbekpeyei ɛɛ gbɔyɔ kunafɔ va.

7 Baibui yɛpɛilɔ kɔlongɔ Yesu ma kulɔma yɛ a wote lɔ a Maha wɔnangɔ tao kɛ a nunga ti mamanu lɔ lɔ. Ji mia i ndeni yɛɛ: “Ndemɔi yafɛi a yɛlɔ ngi ma, nɛmahulewe kɛ hindahugɔɔla yafɛi, nguhitɛ kɛ kpaya yafɛi, hindagɔɔla kɛ Ndemɔi maluwa yafɛi; kɛ ngi gohunɛ a yɛ Ndemɔi ngi maluwɛi hu lɔ: kɛ ɛɛ kpɛmbo wua a ngi yama yɛyii, tawao ɛɛ nuu lɛ a ngi woli mɛniyii: kɛ a pɔna hinda lɔ a nyanibla gbɛmbo la.” (Aisaia 11:​2-4) Ba lo lɔ numui na bonda i wote a maha bi mahu?

8. Mu ye kɔɔni kɛ Yesu yakpe yana aa yɛ mahayei yayengema?

8 Ngewɔ loko loonga nunga lɛnga ma kɔ tia Yesu-ni ti mahayei yayenge ngelegohu. Tɔmasei gɛ va toomui  Pɔɔl ndeilɔ Timoti ma yɛɛ: “Ina muii gbahai a gula hinda gbɔugbɔu bu, mua tieni ma mahayɛi mɛlɔ gbɔma.” (2 Timoti 2:​12, NY) Kɛɛ nunga ti lolɛ mia ta gbɛɛ Yesu ma mahayei na yayenge va?

9. Nunga ti lolɛ mia tia Yesu-ni ta mahayei yayenge? Migbe mia Ngewɔ tatoni a loko loo la ti ma?

9 Sia mu yɛ kaanga la Ngu 7 hu, hinda magɛilɔ a Jɔn, i Yesu lɔilɔ Mahayei hu ngelegohu tia maha yekanga nahi ti gungɔ a 144,000. Kɛɛ yeni mia numu 144,000 jisia a tie? Jɔn ndeilɔ yɛ “[Yesu] lɛi kɛ ngi Kɛkɛ lɛi nyɛingɔ yɛla ti lawɛi ma.” Tao i ndeilɔ gbɔma yɛɛ: “Ti yɛni a nasia ta to Mbala Loi woma mia gbi a li na. Jisia [lɔ] i ti wumawonga nunga lia.” (Hinda Gɛngɔ 14:​1, 4 gaa.) Numu 144,000 jisia ti yɛni a Klisimabla wɔnangɔnga lɔ nahi Ngewɔ loko loonga ti ma kɔ ti yɛ “mahayahu dunyei maahu” tia Yesu-ni. Ti haanga, Ngewɔ a ti wu lɔ hei hu ti li ngelegohu. (Hinda Gɛngɔ 5:​10, NY) I hinje toobla ti wati hu ma, Ngewɔ lɔ tuŋ loko looma Klisimablei nasia ma ti wɔnangɔ kɔ ti yɛ maha 144,000 jisia lia.

10. Gbɛva mia mua nde kɛ ndoma wa mia Jɛhova kɛni ji i hugbatɛ wuenga kɔ Yesu tia nuu 144,000 nasia ti mahaya mɛ nuuvuisia mahu?

10 Jɛhova gbeengɔ wa mu va na va mia i hugbatei na wueni kɔ nuuvuisia ti gbɛɛ Yesu ma mahayei yayenge va. Yesu a wote lɔ a Maha yekpe wa mu va gbɛva see i mu gɔɔ lɔ huleengɔ gboŋ. I kɔɔ lɔ gbɛ mia kinii a la nuuvuisia ma. Pɔɔl ndeilɔ yɛ Yesu a mu mamanu lɔ lɔ tao ii yɛni a numu “na ɛɛ mu mɔnɛisia yati gɔ,” gbɛva see ti ngi gɔlɛilɔ a “pelei gbi hu wee.” (Hiibrublɛisia 4:​15; 5:​8) Nuu 144,000 nasia bɛ ti kɔɔ  lɔ na kinii a la nuuvuisia ma. Tia bɛ jumbubla mia yɛla a tie tao ti yɛɛ a higbɛ. Fale mu langɔ la kɛ Yesu tia nuu 144,000 jisia ta mu mɔnisia yati gɔɔ lɔ.

GBƐ MIA NGEWƆ MAHAYEI WA MA PIEMA?

11. Gbɛva mia Yesu ndeni ngi womableisia ma yɛ ti hɛ kɔ Ngewɔ liima hindei i wue ngelegohu?

11 Yesu ndeilɔ ngi womableisia ma yɛ ti hɛ kɔ Ngewɔ liima hindei i wue ngelegohu. Gbɛva le? Sia mu yɛ kaani la Ngu 3 hu, Setana wasuilɔ a Jɛhova. Na woma, Jɛhova gbeilɔ Setana ma kɛ maikei yepekei nasia ti gbɛɛni ta ngi Setana ma, kɔ ti yɛ ngelegohu wati wulo va. Fale maikeisia lɛnga tii ya yɛ a Ngewɔ liima hindei wue ngelegohu. Mu wa ma lɛma gulɔma a kaa wue la Ngu 10 hu kɔlongɔ Satana ma kɛ maika nyamui jisia.

12. Hinda fili ye gbɛnga mia Hinda Gɛngɔ 12:​10 yɛpɛni kɔlongɔ ma?

12 Baibui kɛilɔ kɛ sia lee Yesu woteni a Mahin Ngewɔ Mahayei hu, i kɔ wɛɛilɔ Setana ma. (Hinda Gɛnga 12:​7-10 gaa.) Hinda Gɛngɔ 12:​10 yɛpɛilɔ kɔlongɔ hinda magbeengɔ felenga ma ti wueni. Yesu woteilɔ a Mahin Ngewɔ Mahayei hu, kɛ i Setana gbuanga ngelegohu i ngi wili ndunyi ji ma.

13. Gbɛ mia wueni ngelegohu ji ti Setana gbuani na?

13 Baibui yɛpɛilɔ kɔlongɔ kohunɛ na ma yɛ maika wɔnangoisia ma ji ti Setana tia ngi makeisia gbɛni ngelegohu. I ndeilɔ yɛɛ: “A kohunɛ wie, O aijɛnɛ, kɛ nasia wu heini na.” (Hinda Gɛngɔ 12:​12) Ndiilɛi kɛ ngooyia wa lɔ naa ngelegohu ajifa nasia kpɛlɛ ti na tia Ngewɔ liima hindei wuema.

I hinje wati na ma ti Setana tia ngi maikeisia gbuani ngelegohu ti ti wili ndunyi ji ma, hinda nyamu lee mia wuema ndunyi hu. Kɛɛ na kpɛlɛ wa ma gbɔyɔma sange

14. Gbɛ mia wuema ndunyi ji ma jifa ti Setana wilinga na?

 14 Kɛɛ pili na hindeisia ti na ndunyi ma i gba poloŋ. Hinda nyamu lee mia lama nunga ma “jifa Setan i yeinga” ndunyi ma tao “ngi lii lewengɔ ajifa i kɔlɔ kɛ wati wulo leke” mia longa ngi yeya. (Hinda Gɛngɔ 12:​12) Setana liima vulangɔ wa, gbɛva see ti ngi gbua ngelegohu tao i kɔɔ lɔ kɛ wati wulo hiŋ mia longa kɔ Ngewɔ i ngi jukuu. Na va mia i lapima kɔ kpundɛ hindei, mɔni, kɛ kpagba i yɛ ndunyi hu kpɛlɛ.

15. Gbɛ mia Ngewɔ longɔ la yɛla ndunyi ji va?

15 Kɛɛ na Ngewɔ longɔ la yɛla ndunyi ji va, ma ii ya woveni. Ngi longɔ tuŋ nunga ti yɛ ndunyama Alijɛni hu kunafɔ va nahi jumbu gbi ii ti ma. (Saam 37:​29) Kɛɛ Ngewɔ Mahayei a ye pie hindei ji i wue?

16, 17. Gbɔɔ Daniɛl 2:​44 ndeni kɔlongɔ Ngewɔ Mahayei ma?

16 Kulɔma yei na nyɛingɔ Daniɛl 2:​44 ndeilɔ yɛɛ: “Mahayɛi nasia ti yefoloisia ma Aijɛnɛ Yewɔi lɔ a mahaya yila lo, na ɛɛ hunyani kunafɔ va, tawao yemahayɛi ɛɛ ya lo nunga wekaa yeya; kɛ a mahayɛi jisia gbi wolongololɔ, i ti hunyani fɔ, kɛ a lolɔ kunafɔ va.” Gbɔɔ kulɔma yɛpei ji ndema kɔlongɔ Ngewɔ Mahayei ma?

17 Haala, i ndema lɔ kɛ mahaya yekanga ta yɛɛ na a wati na Ngewɔ a ngi Mahayei hugbatɛ. Ye fili, i ndeilɔ kɛ Ngewɔ Mahayei a yɛlɔ na kunafɔ va tao ɛɛ lee numu yeka gbi gama. Ye sawei, kɔ a wua lɔ Ngewɔ Mahayei luahu tia ndunyama mahangeisia. Ngewɔ Mahayei mia a ye koi na gbua. Na woma, ta yakpe mia a yɛ ndunyi mahu. A wati na nuuvuisia ta yɛɛ mahaya bu nahi ngi nyikɔ gbi ii na.

18. Kɛlɛma goi na wa ma gulama Ngewɔ Mahayei luahu a ndunyama mahangeisia ta ye toi?

 18 Ngewɔ Mahayei a ye ndunyama mahangei jisia gbua? Pɛiŋ kɛlɛma goi na ta toi a Amagɛdɔn aa ya gɔ, ngafa nyamuisia ta ndei gula lɔ “mahangɛisia gbi gama ti ndunyi hu ti yandɔva kɔ gɔmɛi Ngewɔ kpayɛi gbi Yewɔi ngi volo wai ma.” Na lɔ lɛ, nuuvu mahanga ta gɔ a Ngewɔ Mahayei.—Hinda Gɛngɔ 16:​14, 16; Kɛlɛma Yɛpei 10 gaa na kɔlɔ laa 210 ma.

19, 20. Gbɛva mia mu gbeengɔ Ngewɔ Mahayei va?

19 Gbɛva mia mu gbeengɔ Ngewɔ Mahayei va? Sabu sawei jisia va mia. Haala, jumbubla mia a mue, fale mua higbɛ lɔ tao mua haa lɔ. Kɛɛ Baibui ndeilɔ yɛ mu ya Ngewɔ Mahayei bu, mua yɛɛ na kunafɔ va. Jɔn 3:​16 ndeilɔ pɛiŋ yɛɛ: “Ngewɔ loilɔ gboŋ a ndunyɛi, nahi i ngi Hiindolo yakpei veilɔ, kɔ numui na gbi a liilo ngi ma aa jukuu, kɛ i kunafɔ lɛvui ma jɔɔ.”

20 Sabui ye fili na va mu gbeengɔ Ngewɔ Mahayei va ta mia a ji, nunga nyamunga lee mia ti mu galangɔ. Sia nyikɔ ndɛ gulabla na, humabla, kɛ ngatibabla. Muɛ gu mua gbɛogbɛ wue kɔ mu ti gbua mu lia, Ngewɔ mia lee a gu. Tao i wa ma nunga nyamuisia kpɛlɛ jukuuma Amagɛdɔn goi hu. (Saam 37:​10 gaa.) Sabui ye sawei yɛni a ji lɔ, nuuvu mahangeisia ti lukui lɔ guyuguyu hindeisia hu, ti luhu haangɔ, tao ti liima bengɔ. I baa na ma, tɛɛ gbɔ nunga ma Ngewɔ liima hindei wue va. Baibui yɛpɛilɔ kɔlongɔ pili na ma ti mahayei mɛngɔ la ti nyɔunyɔu mahu yɛɛ: “Numu a kpaya majɔɔ ngi mbaanga mahu, i ti yamɔnɛ haŋ i  taikpe gbalɛ.”—Ɛkkliisiastiis 8:​9, NW.

21. Ngewɔ Mahayei a ye pie Ngewɔ liima hindei i wue ndunyi hu?

 21 Amagɛdɔn leengoi woma, Ngewɔ Mahayei a pie lɔ Ngewɔ liima hindei i wue ndunyi ji ma. A Setana gbua lɔ ndunyi ji ma tia ngi yafa nyamuisia. (Hinda Gɛngɔ 20:​1-3) Na woma numu gbi ɛɛ ya higbɛ ɔɔ haa. Jifa Ngewɔ yɛ mu wumawonga, nasia kpɛlɛ ti wɔnangɔ ta gu lɔ ti yɛ ndunyama Alijɛni hu kunafɔ va. (Hinda Gɛngɔ 22:​1-3) Mahayei ji a pie lɔ Ngewɔ biyei ma i gaye. Gbɔɔ ji kɛma? I kɛma lɔ kɛ nasia kpɛlɛ ta yɛ Ngewɔ Mahayei bu, ta Jɛhova biyei lato lɔ.—Kɛlɛma Yɛpei 21 gaa na kɔlɔ laa 216 ma.

MIGBE MIA YESU WOTENI A MAHIN?

22. Mu ye kɔɔni kɛ Yesu ii yɛ Maha ya hu ji i yɛ ndunyi ji ma tao kɛ ii woteni a Maha gama-gama ji i lɛni ngelegohu?

22 Yesu ndeilɔ ngi womableisia ma kɔ ti hɛ tɛɛ: “Bi mahayɛi i wa.” Na kɛma lɔ kɛ a wati na Ngewɔ Mahayei ii ya wani. Kungɔ yɛla pɛiŋ Ngewɔ i ngi Mahayei hinda hugbatɛ tao i Yesu wote a ye Mahin. Kɛɛ sia lee Yesu lɛni ngelegohu ta mia i woteni a Mahin? A-a, i mawoilɔ kulo. Wati lɛnga woma ji Yesu lɛni ngelegohu, Pita tia Pɔɔl ti pieilɔ mu  hindei ji magɔɔ ji ti yɛ yɛpɛma kɔlongɔ kulɔma yei na ma nyɛingɔ Saam 110:​1 ti too Yesu ma. Ye kulɔma yei na hu Jɛhova ndeilɔ na yɛɛ: “Hei nya yejalokoi ma, ngiiyɛkɛ, nga bi gɔnyɔisia wie a bi gɔwɔloma wului.” (Toobla ti Wiehindɛisia 2:​32-35; Hiibrublɛisia 10:​12, 13) Kɛɛ fo lolɛ va mia Yesu mawoni pɛiŋ Jɛhova aa ya ngi wote a Mahin?

Ngewɔ Mahayei a pie lɔ Ngewɔ liima hindei i wue ndunyi ji ma

23. (a) Migbe mia Yesu woteni a Mahin Ngewɔ Mahayei hu? (b) Gbɔɔ mu wa ma kaama ngui ye na hu?

23 Fo gboto leengɔ woma pɛiŋ 1914 aa ya hiti, Baibu gaalupuisia ti kɔɔilɔ kɛ hinda wa yia Baibui yɛ yɛpɛnga kɔlongɔ ma a wue 1914 hu lɔ. Pili na hindeisia ti wuema la ndunyi hu i hinje 1914 ma, i kɛnga kɛ tɔnyi mia ti ndeni. Fui na mia Yesu tatoni a Mahayei yayenge la. (Saam 110:​2) Sia lee na wueni, ti Setana gbuailɔ ngelegohu ti ngi wili ndunyi ji ma tao “wati wulo leke” mia naa longa ngi yeya. (Hinda Gɛngɔ 12:​12) Ngui ye na hu, mua lɛ lɔ gulɔma a yɛpɛ la kɔlongɔ hindanga ma ta kɛ vui kɛ mu kɛlɛma vuisia hu lɔ naa. Mua tɔɔ gbɔma kɛ Ngewɔ Mahayei wa ma sange piema Ngewɔ liima hindei i wue ndunyi ji ma.—Kɛlɛma Yɛpei 22 gaa na kɔlɔ laa 217 ma.