Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NGU 19

Kɛ Kɛ Bi Longoi A Jɛhova

Kɛ Kɛ Bi Longoi A Jɛhova

1, 2. Ye gama mia ha mua kpɔma majɔɔ na?

GII lɛ kɛ bia jiama pili ma vivi wa a vɛ. Kɛ ngili ma gbindinga, kɛ mai mai tatonga a wue la, ngili a yia kɛ njei tatonga a wa la. Kɛ bia wimɛma ba hinda gɔkoi kɔ bi loo na. Gama kɛ bi pɛɛ yia lɔnga looni malɛngɔ panda, bɛɛ wimɛ kɔ bi jɔkɔ na kaka?

2 Ndunyi hu ha mu na piengoi lee bɛ vivi wa mia vɛma. Gbɛva see hinda nyamui wuma lɔ lee mahu. Kɛɛ kɛnga ba gii lɔ a mɔli ji, ‘Mi mia nga bawoya majɔɔ na?’ Saamimɔ yia ndeilɔ yɛɛ: “Nga ndelɔ kɔloni Ndemɔi ma ngɛ, Ta lɔ nya bawomɔi le ta nya gɔlɔi; Nya Yewɔi, na ngi nya lii loni ngi ma.” (Saam 91:​2) A tɔnya, Jɛhova a gbɔɔ mu ma kpagba gbi lee hu tao a mu gɔ lɔ a liilooma sina kulɔmi va.

3. Gbɔɔ mua pie kɔ Ngewɔ i wote a mu bawomui?

3 Jɛhova a ye mu mahugbe? A gbɔɔ mu ma kpagba gbi lee hu tao ngi gbayangɔ i lee nasia gbi ma ta lapi kɔ ti kpalɛ la mu ma. Ina bɛ kpalɛ gbi lailɔ mu ma siahuna, mu langɔ la kɛ Jɛhova a ye kpalei na gbua lɔ mu ma sina kulɔma. Baibui mu lii nɛpɔilɔ yɛɛ: ‘A wua yekpe mahugbe Ngewɔ lomɛi hu.’ (Juud 21) Mu longa kɔ Jɛhova i gbɔ mu ma ji mua yɛ kpagba hu, kungɔ mu yɛ a ngi ndiamɔ yekpe wa. Kɛɛ mua ye na wue?

JƐHOVA LONGƆ BI LO A NGIE

4, 5. Jɛhova ye kɛnga kɛ ngi longoi a mue?

4 Kɔ mu mua yekpe mahugbe Ngewɔ lomi hu,  kungɔ mu gohu i nɛi ndomi na va i kɛnga a mue. Gii lɛ a hindei nasia kpɛlɛ i pienga mu va. I ndunya nyandi ji venga mu wɛ kɛ haiŋ kpɛlɛ hu, i gbɛɛ mɛhɛ ma kɛ njei kpɔli va. Jɛhova mu gaanga a ngi biyei kɛ ngi hinda wuengoisia a Baibui huwue. Na teengɔ kpɛlɛ ma, i ngi Hindolo yakpi, Yesu, yoyoilɔ ndunyi ji hu kɔ i wa i haa mu jumbuisia va. (Jɔn 3:​16) Na ndiilooma venga mu wɛ sina kulɔmi va.

5 Jɛhova Mahaya hugbatɛnga ngelegohu, na wa ma gbɔyɔma sange a hinda nyamui kpɛlɛ. Ye Mahayei a pie lɔ ndunyi ji i wote a alijɛnɛ mia mua yɛ na ndiilɛi hu kɛ kohunɛ kunafɔ va. (Saam 37:​29) Pili yepekei i kɛnga la kɛ ngi longɔ a mue ta mia a ji i mu gaama kɔ kpekpeya i yɛ mu mahinda hu. I pienga gbɔma kɔ mu yaa hɛ ngi gama tao ngi gohunɛingɔ mu hɛwui mɛni va a wati gbi lee. Jɛhova kɛnga vui kɛ ngi longoi a mu kpɛlɛ.

6. Gbɔɔ ba pie ndomi na va Jɛhova kɛnga a bie?

6 Ji Jɛhova kɛnga kɛ ngi longoi a bie, ba ye hunyɔɔ ngi ma? Kɛ kɛ bi gohunɛingoi hindei kpɛlɛ va i pienga bi va. Nunga gbotoma ti na ha, tii sabu gɔɔ. Kɛɛ ha yana hindei ji a lato, Yesu nda wati hu bɛ vui sabu nyanibla ti yɛɛ na. Wati yia ji Yesu kpɔukpɔubla puu haleni, ye ngila mia lee wani i sɛigbua ngi ma. (Luuk 17:​12-17) A nyande lɔ mu gbua a kini na wani i sɛigbua Yesu ma. Mahoungɔ mu sɛigbua Jɛhova ma a wati gbi lee.

7. Mua ye lo a Jɛhova?

7 A nyande lɔ gbɔma mu kɛ kɛ mu longoi a Jɛhova. Yesu ndeilɔ ngi womableisia ma kɔ ti lo a Jɛhova a ti lii gbi, ti lɛvui gbi, kɛ ti nɛmahui gbi. (Matiu 22:​37 gaa.) Gbɛ mia na kɛma?

8, 9. Mua ye kɛ kɛ mu longoi a Jɛhova?

 8 Ji lee mua nde muɛ mu longoi a Jɛhova ta mia hindei le? A-a. Mu wuehindei mia a kɛ ina mu longoi vui a Jɛhova a mu lii gbi, mu lɛvui gbi, kɛ mu nɛmahui gbi. (Matiu 7:​16-20) Baibui ndeilɔ mu ma gboleiŋ kɛ ina mu longɔ a Ngewɔ mua ngi jaweisia hou lɔ. Kɛɛ mua gu lɔ vui mu ngi jaweisia hou? Ɔɔ. Gbɛva see Jɛhova “jawɛisia tii minini.”—I Jɔn 5:​3 gaa.

9 Mu golonga Jɛhova wɛ, mua ndiilɛi majɔɔ lɔ mu lɛvui hu. (Aisaia 48:​17, 18) Kɛɛ gbɔɔ a gbɔ mu ma mu golo Jɛhova wɛ? Mu tɔ lɛ.

LAPI KƆ NDOMI NA BI LII HU JƐHOVA VA AA GƆLƐ

10. Gbɛva mia kungɔ bi lɛ gulɔma a kaa wue la kɔlongɔ Jɛhova ma?

10 Ba ye wote a Jɛhova ndiamui? Sia lee ba yɛ Baibui gaama, hi mia ba Jɛhova gɔɔ tao hi mia ba wote a ngi ndiamui. Sia lee ba kɔwui mato ngɔmbui ya kɔ aa lufe, hi mia kungɔ bi lɛ gulɔma a kaa wue la kɔlongɔ Jɛhova ma kɔ ndiamɔyei na wua ta luahu i lɛ gulɔma a gbaya la.—Saleisia 2:​1-5.

Sia lee kɔwui a pie ngɔmbui a lɛ gulɔma a vo la, kungɔ mu hinda wue kɔ ndomi na mu lii hu Jɛhova va, i yɛ kpau

11. Hindei nasia ba kaa Baibui hu a gbɔɔ wue a bie?

11 Bi lɛnga gulɔma a Baibui gaa la ba hindanga gaa lɔ hu na a jaa a bi lii. Wati yia Yesu yɛɛ a hindanga hugɛ ti Baibui hu, a ngi gaalupuisia na ti lii wumbuni wa. Ti ndeilɔ tɛɛ: “Mu liisia tii yɛ hiyeni mu gohu a kohunɛ kia i yɛ njɛpɛi jisia lema mu ma pelei hu, kia i yɛ kɔlɔisia hugɛma a mue?”—Luuk 24:​32.

12, 13. (a) Mui mu mahugbeilɔ gbɔɔ a wue a ndomi na a yɛ mu lii Ngewɔ va? (b) Gbɛ mia kungɔ mu pie kɔ ndomi na mu lii hu Jɛhova va aa gɔlɛ?

12 Sia lee Ngewɔ Layiei jaani la a Yesu gaalupuisia ti  lii ji ti ye mbui gɔɔni, hi mia bia bɛ a wue a bie ji ba Baibui ye mbui gɔɔ. Ji a gbɔɔ bi ma bi Jɛhova gɔɔ tao bi lo a ngie. Tao ɛɛ nyande ina bi loilɔ heini ye ndomi ji i gɔlɛ.—Matiu 24:​12.

13 Sia bi wotenga a Ngewɔ ndiamui, kungɔ bi lapi vui gboŋ kɔ ndiamɔyei na wua ta luahu i lɛ gulɔma. Kungɔ bi lɛ gulɔma a kaa wue la kɔlongɔ Jɛhova ma kɛ Yesu Klisi tao bi gii sia ba ye jia a na bi kaanga. (Jɔn 17:​3) Bi Baibui gaanga, kungɔ bi hei bi gii a mɔli jisia bonda: ‘Gbɛ mia ji nya gaama la kɔlongɔ Jɛhova ma? Gbɛva mia kungɔ ngi lo a ngie a nya lii gbi kɛ nya lɛvui gbi?’—Saam 143:​5.

14. Hei a ye gbɔ mu ma kɔ ndomi mu lii hu Jɛhova va i yɛ kpau?

14 Wua bi ndiamɔ yekpi wu yaa yɛpɛma luahu na  a pie lɔ wua ta wu ndiamɔyei i yɛ kpau. Mu yaa a yɛpɛ pɛpɛ Jɛhova gama a hɛ huwue, mu ndiamɔyei a ngie a yɛɛ kpau. (I Tɛsaloniabla 5:​17 gaa.) Hei yɛni a sabu yekpe wa lɔ mu Kɛkɛ na ngelegohu i ndaa mu va. Fale kungɔ mu yaa mu lii hu yiei le ngi ma a wati gbi. (Saam 62:​8) Ii guni mu njia yia yia le ji mua yɛ hɛma, kungɔ mu hei i gbua mu lii hu. A tɔnya, mu yaa Baibui gaama mua hɛ Jɛhova gama a mu lii gbi, na a pie lɔ ndomi na mu lii hu ngi va i yɛ kpau.

YƐPƐ NUNGA GAMA KƆLONGƆ JƐHOVA MA

15, 16. Bi ye Ngewɔ layia lelei lɔni?

15 Mu longa kɔ ndiamɔyei na mu luahu a Jɛhova i lɛ gulɔma, kungɔ mu yaa yɛpɛ nunga gama kɔlongɔ na ma mu langɔ la. Kɔ mu yɛpɛ nunga gama kɔlongɔ Jɛhova ma i yɛni a hinda wa lɔ. (Luuk 1:​74) Tao ngenge mia a ji Yesu feni tɔnya Klisimableisia kpɛlɛ wɛ. Fale kungɔ mu kpɛlɛ mu ngowi yekpi le kɔlongɔ Ngewɔ Mahayei ma. Bi ji wuenga gba?—Matiu 24:​14; 28:​19, 20.

16 Toomui Pɔɔl Ngewɔ layia lelei wumbuilɔ a hinda yekpe wa, i toilɔ pɛiŋ a “kpatɛ wai.” (II Kɔrintabla 4:​7) Ngenge gbi ii na ba pie na a hiti ji hu ba yɛpɛ nunga gama kɔlongɔ na ma Jɛhova longɔ la. Bi yengenga Jɛhova wɛ a pili ji bonda, a mbumbu lɔ a hinda wa. (Hiibrublɛisia 6:​10) Ngewɔ layia lelei a bi nafa lɔ kɛ nasia ta wolo bi ma, a pie lɔ wua tieni wu lala Jɛhova gbilanga tao wu kunafɔ lɛvui majɔɔ. (I Kɔrintabla 15:​58 gaa.) Ngenge gbi lɔ na a bi gɔ a ndiilɛi i lee ji ma?

17. Gbɛva mia Ngewɔ layia lelei magbeengɔ wa le?

 17 Ngewɔ layia le yingi magbeengɔ wa le. Fale, Baibui yɛ mu yaa Ngewɔ layiei le, mua “wati o wati” hunyani. (II Timɔti 4:​2) Kungɔ nunga ti ngowi yiei humɛni kɔlongɔ Ngewɔ Mahayei ma. Baibui yɛɛ: “Ndemɔi volo wai lɔ kpla, ta lɔ kpla,” tao “i humbuma wa,” hu “ɛɛ ya lɛmbi.” (Sɛfanaia 1:​14; Habbakuk 2:​3) A tɔnya, wati ma ii ya guani kɔ Jɛhova i Setana lunyi ji jukuu. Kɛɛ pɛiŋ na aa ya wue, kungɔ mu gbɔ nunga ma kɔ ti Jɛhova vɛi.

18. Gbɛva mia kungɔ mu gbɛɛ tɔnya Klisimableisia ma Jɛhova vɛi va?

18 Jɛhova longɔ mu gbɛɛ tɔnya Klisimableisia ma ngi vɛi va. Na va mia Baibui ndeni yɛɛ: “A mu mu nyɔunyɔu wote ndoma kɛ piehinda yekpea gama. Maa gbaha a yandɔla hinda yila, kia ti tɛnga ti wiehindɛi i na, kɛ a mu mu nyɔunyɔu lahi; tao a wu lahi yiɛi mato panda, kia lɛ wu tɔma kɛ yefoloi lɔ lukpema kpla.” (Hiibrublɛisia 10:​24, 25) Kungɔ mu lapi kɔ komɛ gbi aa lee mu ma. Ji mua yandɔ hinda yia Jɛhova vɛi va, na a mu gɔ lɔ a sabu yekpe mu nyɔunyɔu lii nɛpɔ va kɔ mu loo kpauŋ.

19. Gbɛ mia a gbɔ mu ma kɔ mu lo a mu ndee Klisimabla?

19 Bi yaa mu gomisia hu, ba ndiamɔ yekpenga majɔɔ lɔ ta gbɔ bi ma kɔ bi Jɛhova vɛi. Ba bɛ lɔ mu ndee hinga kɛ nyahanga ma ta lapi gboŋ kɔ ti Jɛhova vɛi sia lee bi na. Tao sia lee bi na tia bɛ jumbubla mia a tie, fale ta kpulanganga wue lɔ. Ti nyamunga a bie, bi magbatɛngɔ i yɛla manu va ti ma. (Kɔlɔsiabla 3:​13 gaa.) Sia baa ti hinda nyamuisia gbee, bi yami i yɛ ti wuehinda yekpisia ma, na a gbɔɔ bi ma kɔ bi lo a tie tao kɔ bi lala Jɛhova gbilanga.

 NDƐVUI NA NDƐVUI LE A TƆNYA

20, 21. Gbɛ mia a “ndɛvui na . . . ndɛvui le a tɔnya”?

20 Jɛhova longɔ ngi ndiamuisia kpɛlɛ ti ndɛvui yanɛɛ yi gɔɔ vui panda. Baibui kɛilɔ kɛ pili na mua ndɛvui yanɛɛ yi gɔɔ la kulɔma a yɛ leeni poloŋ pili na ma ha mu nganɛɛma la.

Jɛhova longɔ bi ndɛvui na majɔɔ “na ndɛvui le a tɔnya.” Ba lo lɔ bi majɔɔ?

21 Sina kulɔma mua yɛɛ na kunafɔ va, muɛ yɛ na lee fo 70 ɔɔ 80 va kɛ mu haanga. Mua “kunafɔ lɛvui” majɔɔ lɔ ndunyama Alijɛni hu a kohunɛ kɛ kahugbua yekpe. Na mia Baibui toini a “ndɛvui na . . . ndɛvui le a tɔnya.” Jɛhova lahedi wumbunga ye ndɛvui ji ve va mu wɛ, kɛɛ kungɔ mu “hou kpaŋ” ma.—I Timɔti 6:​12, 19.

22. (a) Mua ye gu mu “kunafɔ lɛvui hou kpaŋ”? (b) Gbɛva mia mua nde kɛ muɛ gu mua pawa waa kunafɔ lɛvui va?

22 Mua ye gu mu “kunafɔ lɛvui hou kpaŋ”? Kungɔ mu “hinda yekpe wie” tao mu “gbatɛ piehinda yekpeisia hu.” (I Timɔti 6:​18) Ji kɛma lɔ kɛ kungɔ mu jia a hindei nasia mua kaa Baibui hu. Kɛɛ na mua pie ta yana aa yɛ mu mahouma ndɛvui na majɔɔ va ndɛvui le a tɔnya. Muɛ gu mua pawa waa kunafɔ lɛvui va. I yɛni lee a “fehanii” gbama lɔ na Jɛhova lahedi wumbunga fe va nasia wɛ ta wɔna a ngie, sia bɛ tii ma ii houni majɔɔ va. (Romablɛisia 5:​15) Jɛhova longɔ vui i kunafɔ lɛvui ve ngi mablei nasia wɛ ta wɔna a ngie.

23. Gbɛva mia mahoungɔ mu kiti yekpe lee siahuna?

23 Bia yekpe mɔli a mɔli ji, ‘Nya Ngewɔ vɛima a pili na ngi gohunɛingɔ ma?’ Ina bi tɔnga kɛ kungɔ bi mawovenga wue, a nyande lɔ bi pie yakpe. Mu mu lii gbi vaanga Jɛhova ma, tao mu hindei gbi wue ngi gohunɛ va, a yɛlɔ a mu bawomui. Jɛhova a gbɔɔ nasia  ma ta wɔna a ngie kɔ ti lee Setana lunyi ji hu. Tao Jɛhova a tɔ lɔ kɛ mu kunafɔ lɛvui majɔɔnga ndunyama Alijɛni hu, sia le i yɛ lahedi wumbunga pie va. A tɔnya, ba ndɛvui na majɔɔ lɔ na ndɛvui le a tɔnya, ina bi kiti yekpe leeilɔ siahuna!