Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 116

Mua Ye Kunafɔ Lɛvui Majɔɔ

Mua Ye Kunafɔ Lɛvui Majɔɔ

BI KƆƆ lɔ gbɔɔ nyahalui ji tia ngi ndiamuisia ti kaa ma? Bukui ji bi kaa ma ta mia tia bɛ ti kaa ma—Nya Baibu Lɔmɛ Bukui. Ndɔmi ji mia ti kaa ma.

Gbɔɔ kungɔ mu pie kɔ mu kunafɔ lɛvui majɔɔ? Haala, kungɔ mu kaa wue kɔlongɔ Jɛhova ma tia ngi lui Yesu. Baibui yɛɛ: ‘Ji lɔ kunafɔ lɛvui le. Kaa wue kɔlongɔ tɔnya Yewɔi yiakpi ma, kɛ ngi Lui Yesu Klisti na i ngi looni ndunyi ji ma.’

Kɛɛ mua ye kaa wue kɔlongɔ Jɛhova ma kɛ ngi lui Yesu? Ji mua Nya Baibu Lɔmɛ Bukui ji gaa i hinje ye tatomi haŋ i too ye kɛlɛmi, pele yia mia a na mua kaa wue kɔlongɔ ti ma. Bukui ji yɛpɛilɔ kpoto kɔlongɔ Jɛhova ma tia Yesu. Tao i yɛpɛilɔ gbɔma kɔlongɔ na ma ti pienga kɛ na ti wama pie ma. Kɛɛ bukui ji lee yana kungɔ mu kaa.

Bia bukui yepekei na lɔ ma laani ti gblanga? Baibui mia. Pie numu i Baibu yakei nasia gaa bi gama ti ndɔmɛ gbi lee hu bukui ji hu. Baibui mia a hugɛ a mue vui panda sia mua ye Jɛhova vɛi la kɔ mu kunafɔ lɛvui majɔɔ. Fale, kungɔ mu ya Baibui gaa a wati gbi lee.

Kɛɛ kaa wue la lee kɔlongɔ Jɛhova ma tia Yesu ii gui. Gbɛva see kaa na mua pie kɔlongɔ ti ma, ta lee yana a yɛ pie ma kɔ mu kunafɔ lɛvui majɔɔ. Bi kɔɔ lɔ gbɔɔ kungɔ mu pie gbɔma?

Kungɔ mu jia a na mua kaa. Ba gii lɔ a Judas Kaliɔtimui? I yɛ hinda gboto gɔɔ lɔ kɔlongɔ Jɛhova ma tia Yesu, gbɛva see i yɛni a Yesu gaalupuisia ye ngla nge lɔ. Kɛɛ gbɔɔ wueni a ngie? Wati lɛnga leengɔ woma, i Yesu majiailɔ a baaya ngi juwuisia gama kani golei 30 va. Fale, Judas ii kunafɔ lɛvui majɔɔ ma.

Ba gii lɔ gbɔma a Gehaji, kini na mu kaa wueni kɔlongɔ ngi ma Ndɔmi ye 69 hu. Ngi longɔ yɛla a haiŋ nasia na ngi wo ii le? Fale i ndɛɛ gulailɔ kɔ i ye haiŋ nasia majɔɔ. Jɛhova ngi yamɔnɛilɔ ndei na va i kulani. Tao mua bɛ, mui Jɛhova jaweisia houilɔ, a mu yamɔnɛ lɔ.

Kɛɛ na hu gbi, nunga ti yɛɛ na nahi ta jia a Jɛhova jaweisia. Tɔmasei ye ngla yɛni a Samuɛl lɔ. Sia mu kaa wueni la kɔlongɔ ngi ma Ndɔmi ye 55 hu, ngi gulongɔ yɛla ji i tatoni a yenge la Ngewɔ hɛ wɛlei bu. Bii gii la kɛ kungɔ mu too Samuɛl woma Jɛhova vɛi va i gɛ bɛ kɛ mu gulongoi?

Numui yepekei lɔ na kungɔ mu kpɛlɛ mu too ngi woma, i yɛni a Yesu lɔ. Sia mu kaani la Ndɔmi ye 87 hu, sia bɛ Yesu gulongɔ yɛla, i yɛɛ Ngewɔ hɛ wɛlei bu, a yɛpɛ nunga gama kɔlongɔ Jɛhova ma. Mua bɛ kungɔ mu yaa yɛpɛ nunga gama kɔlongɔ Jɛhova ma tia ngi lui Yesu Klisti. Mu hindei jisia kpɛlɛ wuenga, mua yɛɛ ndunyi ji ma kunafɔ va.