Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 104

Yesu Yamailɔ Ngelegohu

Yesu Yamailɔ Ngelegohu

FOO 40 va pɛiŋ Yesu aa ya yama ngelegohu, i lɛilɔ gulɔma a gɛ la a ngi womableisia. Wati ye kɛlɛma yi i gɛni a ngi womableisia pɛiŋ aa ya yama ngelegohu, ti gungɔ yɛla a 500 nyikɔ. Bi kɔɔ lɔ gbɔɔ i yɛpɛni kɔlongɔ ma ji i gɛni a tie? I yɛpɛni kɔlongɔ Ngewɔ mahayei lɔ ma. Jɛhova Yesu yoyoilɔ ndunyi ji hu, kɔ i nunga gaa kɔlongɔ ngi mahayei ma. Yesu loilɔ ji wuema haŋ i haa, tao i lɛilɔ gulɔma a pie la ngi hinjengoi woma hei hu.

Ba gii lɔ a na mu kaani kɔlongɔ Ngewɔ mahayei ma? I yɛni a Mahayia lɔ na ngelegohu, Yesu mia Ngewɔ loko loonga ngi ma kɔ i wote a ye mahin. Sia mu yɛ kaani la, Yesu kɛilɔ kɛ maha yekpe wa mia a ngie ji i yɛ a nunga gɔ, a higbɛbla hale tao a haabla wu hei hu!

Ji Yesu wama wote ma a mahin ndunyi mahu fo taosi yia va, ndunyi ji kpɛlɛ a wote lɔ a alijɛnɛ. A wati na higbɛ ɛɛ ya yɛna, koi, hinda nyamui kɛ hei. Mu kɔɔ lɔ kɛ tɔnya mia a na, gbɛva see Ngewɔ ndunyi gbatɛilɔ kɔ nunga ti yɛna a kohunɛ kɛ ndilɛi kunafɔ va. Nava mia wɔɔ i kata nyande wai na gbatɛni ta toi a Idɛn. Tao Yesu a tɔɔ kɛ na Ngewɔ lima hindei le, a wue lɔ huɛŋ.

Yesu womableisia ti lailɔ la kɛ i hinjenga hei hu a tɔnya, gbɛva see i gɛilɔ a tie heima gboto va. Kɛɛ pɛiŋ aa ya lɛ ngelegohu, i ndeilɔ ngi womableisia ma yɛɛ: ‘A yɛ Jelusalɛm haŋ Ngewɔ yafa yekpi i yei wu ma.’ Ngewɔ yafa yekpi yɛni a kpayei na lɔ Ngewɔ yeya, na a njei ngi nunga ma kɔ ti na wue ngi longɔ la. Yesu ndeilɔ gbɔma ti ma yɛɛ: ‘Wua seliwua lɔ kɔlongɔ nya ma ndunyi hu kpɛlɛ.’

Ji Yesu kpɔyɔni a njɛpei ji le la, kabandema hinda wueilɔ. Bi kɔɔ gbɔɔ wueni? Yesu tatoilɔ a lɛ la ngelegohu sia lee bi tɔ ma la pisoi ji hu. Ji i lɛni haŋ, lugbui ngi magbɔlilɔ nahi ngi womableisia tii ya yɛ a ngi lɔ. Ji Yesu lɛni ngelegohu, i tatoilɔ a mahayei yayenge la ngi womableisia mahu ndunyi ji ma.