Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 108

Yesu Yɛpɛilɔ Sɔɔl Gama Ji I Yɛ Lima Damaskɔs

Yesu Yɛpɛilɔ Sɔɔl Gama Ji I Yɛ Lima Damaskɔs

BI NUMUI na gɔɔ lɔ laani ndɔɔmi? Sɔɔl mia. Ta mia Sivin waabla ti guleisia mahugbeni. Fofo wai na lɔ lɛ! Gbɔɔ bi giingɔ la wuema?

Ji ti Sivin waani, Sɔɔl looilɔ Yesu womableisia ti yakpɛlei gulɔ kɔ i kpalɛ la ti ma. I yɛɛ a leetee pɛɛsia la a ti gɔkoi. Ji i yɛ a ti lɔ, i yɛ a ti gɛndɛ, a ti gbua ti wɛɛsia bu a ti wili kpindi wɛlei bu. Na pieilɔ Yesu womableisia gbotoma ti wila, ti li tei yepekeisia hu kɛ ti tatonga a ‘ngowi yekpi’ le la ye tei nasia hu. Sɔɔl yɛɛ gbɔma a li ta yekeisia hu Yesu womableisia gɔkoi va. Foo yia ma ji i yɛ li ma Damaskɔs, kabandema hinda wa yia wueilɔ. Bi kɔɔ gbɛ le?

Fofo wa gbuailɔ ngelegohu i vo Sɔɔl ma, kɛ i gulanga ndɔmi sia lee bi tɔ ma la piosoi ji hu. Kɛ i ngui mɛinga i nde yɛɛ: ‘Sɔɔl, Sɔɔl, gbɛva mia bi kpalɛ la ma nya ma?’ Hingei nasia tia Sɔɔlni ti yɛ a li, ti fufui lɔilɔ, tao ti ngui mɛilɔ, kɛ na ngui na ndeni, tii gatɔni.

Kɛ Sɔɔl mɔlinga yɛɛ: ‘Ye lɔ a bie, Ndemui?’

Kɛ ye ngui ndenga yɛɛ: ‘Nya mia Yesu, numui na bi ngi gbalɛ ma.’ Yesu njiei ji leilɔ gbɛva see ji Sɔɔl yɛ a kpalɛ la ngi womableisia ma, i yɛɛ a wue sia lee bɛ ta vui mia Sɔɔl kpalei la ma ngi ma.

Kɛ Sɔɔl i Yesu mɔlinga yɛɛ: ‘Gbɔɔ naa nga pie Ndemui?’

Kɛ Yesu ndenga yɛɛ: ‘Hinje bi li Damaskɔs, na mia ta hugɛ na a bie na kungɔ bi pie.’ Ji Sɔɔl hinjeni i ngi yami vo, i gbɛogbɛ lɔni. Hingei nasia tia tieni ti yɛ a li, ti houilɔ ngi lukui ma kɛ ti ya a ngie Damaskɔs.

Yesu yɛpɛilɔ naa ngi womamɔ yia gama Damaskɔs, i nde ngi ma yɛɛ: ‘Ananayas, hinje bi li pele yia ma ta loli a Pele Wɔnangoi. Bi li Judas ye pɛɛla, bi fonga naa bi kena yia hinda humɔli na ngi biyei mia a Sɔɔl. Ngi loko loonga ngi ma nya magbee gbua va.’

Ananayas lilɔ. Ji i Sɔɔl miani, i loko lailɔ ngi ma kɛ i ndenga yɛɛ: ‘Ndemui mia nya loonga kɔ ngi pie bi kulɔ lɔ gbɔma tao kɔ Ngewɔ yafa yekpi i yei bi ma.’ Gama kɛ hani gbuanga Sɔɔl yama sia nyɛgei na kɛ i hinda lɔnga gbɔma.

Ngewɔ gbɔilɔ Sɔɔl ma kɔ i ngowi yekpi le kɛnyɛwu gbotonga ma. Ta mia ti yɛ a ngi loli a Pɔɔl. Mu wama kaa wue ma kɔlongɔ ngi ma vui panda. Kɛɛ mu tɔ lɛ pɛiŋ, na Ngewɔ Pita looni pie va.