Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 109

Pita Lilɔ Kɔnilɔs Gama

Pita Lilɔ Kɔnilɔs Gama

PITA mia looni pisoi ji hu tia ngi ndiamuisia. Kɛɛ bi kɔɔ lɔ gbɛva mia kini na mawɛɛngɔ Pita gɔɔ bu? Mahoungɔ i mawɛɛ Pita gɔɔ bu? Bi ye kini ji gɔɔ lɔ?

Ngi biyei mia a Kɔnilɔs. Loma gɔgɔgugbei mia wɔɔ a ngie. Kɔnilɔs ii yɛ Pita gɔɔ, kɛɛ i hengailɔ ti nde ngi ma kɔ i Pita loli ngi ye pɛɛla. Mu tɔ lɛ sia na ye wueni.

Yesu womabla ye haala yisia ti yɛni wɔɔ a Juubla lɔ. Kɛɛ Kɔnilɔs ii yɛni a Juumɔ. Kɛɛ na hu gbi, ngi longɔ yɛla a Ngewɔ, tao i yɛɛ a ngi vɛi a yama a gbekpe a nunga. Foo yia ma, a fuli hu, Ngewɔ maikei gɛilɔ a ngie henga hu i nde ngi ma yɛɛ: ‘Ngewɔ gohunɛingoi bi ma, tao i bi hɛwuisia mɛinga. Nunga loo kɔ ti li ti Pita loli, ta Jɔpa Simɔn ye pɛɛla, gboyei gbla.’

Gama kɛ Kɔnilɔs nunga loonga kɔ ti li ti Pita gɔkoi. Fuli yepekei ma ji nungei jisia ti yɛ lala ma Jɔpa gbla, Pita yɛ ngeeya wɛlei ye mahui lɔ. Na mia Ngewɔ pieni i wue Pita gama sia lee bɛ ngili mia lowanga, a haka lɔ a yei sia lee bɛ kula lakpa wa na. Ye kulei na hu, fuhaiŋ lasi gbi yɛɛ hu. Sia Ngewɔ jawei yɛ ndeni la, ii gui ti ye fuhaiŋ nasia mɛ. Kɛɛ nahu gbi, Pita ngo mɛinilɔ i nde yɛɛ: ‘Pita, hinje bi paa bi mɛ.’

Kɛ Pita ndenga yɛɛ: ‘Ndemui aa yɛ hi. Gbɛva see ngii ya wɔɔ gba a manɔhɔ vuhaiŋ mɛni.’ Kɛ ngui ndenga ngi ma yɛɛ: ‘Haiŋ na Ngewɔ kia sɛwɛsɛwɛ ta mia bɛ manɔhɔngɔ?’ Heima sawa mia hindei ji wueni ngi gama. Pita loni gii ma a hindei ji lɔ, kɛ nungei nasia Kɔnilɔs ti looni ti fonga pɛɛla ti ngi hinda hu mɔli.

Kɛ Pita hintɛnga i nde ti ma yɛɛ: ‘Nya gbe, nya mia wu nya gɔkoi ma. Gbɛva mia wu wani?’ Ji nungei nasia ti ndeni Pita ma kɛ maikei mia ndeni Kɔnilɔs ma kɔ ti li ti ngi loli, i lumailɔ kɔ tia tieni ti li. Ji ngee woni, Pita tia ngi ndiamuisia ti gbuilɔ kɛ ti ya Kɔnilɔs gama Saselia.

Ji ti foni, ti maini Kɔnilɔs i ngi ndiamuisia kɛ ngi mabla lɛnga ma. Ji Kɔnilɔs Pita lɔni, i lilɔ i mawɛɛ ngi gɔɔbu sia lee bi tɔ ma pisoi ji hu. Kɛ Pita ndenga yɛɛ: ‘Hinje, nya bɛ vui nuuvu mia a nge sia lee bi na.’ A tɔnya, Baibui ndeilɔ kɛ ii gui mu wɛɛ numu gɔɔ bu ngi vɛi va. Jɛhova mia lekee kungɔ mu ngi vɛi.

Pita Ngewɔ layei leilɔ naa nungei nasia gama ti lɛni ma yɛɛ: ‘Ngi kɔɔnga naa kɛ Ngewɔ gohunɛingoi numu gbi lee ma nahi ngi longɔ i ngi vɛi.’ Pita loni yɛpɛ maa, kɛ Ngewɔ ngi yafa yekpi yeinga nasia ma ti yɛ a wolo ngi layei ma, kɛ ti tatonga a kɛnyɛya yekeisia le la. Ji gɔlailɔ wa Juublei nasia ma tia Pitani ti lini, gbɛva see ti yɛɛ a giila kɛ Juubleisia mia lee Ngewɔ gbeengɔ ti va. Kɛɛ ji kɛilɔ a tie kɛ Ngewɔ ɛɛ kɛnyɛwu gbi wumbu kpekpengɔ ii lee ngi mba ma. Bia bi giila kɛ hinda yekpe mia a ji nahi kungɔ mu ya giila?