Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 112

Ndɛndei Wuilɔ a Pɔɔlni

Ndɛndei Wuilɔ a Pɔɔlni

GBƆƆ bi giingɔ la wuema pisoi ji hu? Ndɛndei mia wunga a nunga. Ti lɛnga ti lapinga ti waa ngiyi ma, ye nasia lɔ lapi ma kɔ ti wa ngiyi ma. Mu tɔ lɛ sia ji ye wueni la.

Ji ti gbuani a Pɔɔl kpindi wɛlei bu Saselia, ti ngi wuilɔ ndɛndei hu tia kpindi wɛɛbublei yepekeisia kɔ ti li a tie Lom. Ji ti leweni Klit yatii ma, vivi wa gulailɔ ti ma. Vivi gbayailɔ wa nahi nunga tii yɛ a gu ta njei wuli. Tao tii yɛ a gu a fuli lɔ la a fuli kɛ ndumbekeisia a kpindi. Ji hindei ji wueni foo lɛnga va, ti kpɛlɛ ti gii lɔ la kɛ tii bawoma.

Kɛ Pɔɔl hinjenga i nde ti ma yɛɛ: ‘Wu lii aa nyani, numu yia bɛ ɛɛ haa mu lia. Ndɛndei mia lee a lo njei hu kɛ wu hakeisia. Gbɛva see ngi hengeilɔ a kpindi ji Ngewɔ maikei i nde nya ma yɛɛ, “Pɔɔl baa luwa, ba loo lɔ huɛŋ Lom mahin gulɔ Sisa. Tao Ngewɔ a nasia kpɛlɛ mabawo lɔ wua tieni wu ndɛndei ji hu.”’

Ji vivi ji gulani, jii 14 ma a kpindi liei, njawuibla ti tɔilɔ kɛ njei mahu tatonga a yei la. Ji pieilɔ ti luwa kɔ wue ndɛndei aa hɔɔ fawei hu, kɛ ti jɔwie yeinga. Ji ngee woni, ti nja jɔku yia lɔilɔ kɛ ti ndɛndei wui wotenga a na we kɔ ti li ye ŋanyakpa ma.

Ji ti yɛ foma na gblanga, ndɛndei heilɔ ŋanyi hu kɛ i gbanga. Kɛ nja gati tatonga a hɔɔhɔɔ la ndɛndei hu, kɛ i ndɛndei mblamblanga ndia. Na woma, kɔgɔgugbei na yɛ looni ti mahu i ndeilɔ yɛɛ: ‘Wua kinii wua gu a lapi la, wuɛso a wili njei hu wu lapi wu lɛ ngiyi ma, kɛ wua kinii wua lo, a wili njei hu wu hɛlɛ a ndɛndɛ gɛkɛsia wu lapi wu lɛ ngiyi ma.’ Tao na mia ti pieni. Ji huwue mia numu 276 nasia kpɛlɛ ti yɛ ndɛndei na hu ti mabawoni, sia lee maikei na yɛ ndeni la.

Ye njatii na biyei mia a Milta. Nungei nasia ti yɛ na ti gbekpeilɔ wa a nasia ndɛndei na wuni a tie. Ji vivi gbeni a vɛ la, njei i gɔlɛ, ti Pɔɔl wuilɔ ndɛndɛ yeka hu kɛ ti ya a ngie Lom.