Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 111

Pɔɔl Hindolopo Yia Wuilɔ Hei Hu

Pɔɔl Hindolopo Yia Wuilɔ Hei Hu

BI KƆƆ lɔ gbɔɔ wuenga pisoi ji hu? Hindolupui na laani ndɔɔmi ta mia haanga. I gbuani ngeeya wɛlei na la lɔ a windei la wue i gula. Pɔɔl mia bi ngi lɔ ma looni pɛɛ na la nungei naisia gulɔ. Timɔti mia looni ngi gblanga lampui houni ngi yeya.

Pɔɔl njɛpɛ huguangɔ wa veilɔ toopomableisia gama Toas. Gbɛva see kungɔ yɛla i li a fuli yepekei tao i yɛ kɔɔ lɔ kɛ tia tieni tii lɔ ma wati huguangɔ va. Fale, i loilɔ yɛpɛ ma ti gama haŋ ngee i wo.

Kpindi liei mia hindolupui ji gbuani ngeeya wɛlei la i gula ji Pɔɔl yɛ a yɛpɛ toopomableisia gama. Hindolupui ji biyei mia yɛla a Yutikɔs. I yɛ heini windei la lɔ kɛ jii leenga a ngie, kɛ i gbendanga na i gula. Ji nunga ti gɔɔgbɛilɔ ti bu, kɛ ti gbujanga kaka kɔ ti ngi wumbu, kɛɛ ti maini i haanga.

Ji Pɔɔl tɔni kɛ hindolupui ji haanga, i lailɔ ngi mahu kɛ i ngi gulunga i nde yɛɛ: ‘Wu lii aa nyani, gbɛogbɛ gbii ngi ma.’ Pɔɔl kabandema hinda wueilɔ kɛ hindolupui ji yamanga ndɛvui hu. Ji nunga ti gohunɛilɔ wa.

Nunga kpɛlɛ ti yamailɔ naa ngeeya wɛlei bu kɛ ti mɛhɛ mɛnga. Na woma, Pɔɔl lɛilɔ gulɔma a yɛpɛ la ti gama haŋ ngee i wo. Yutikɔs ii ya yiini gbɔma. Ji ngee woni, Pɔɔl tia Timɔti kɛ ti mba jiabla ti wuilɔ ndɛndei hu kɔ ti li. Bi mia gɔɔ lɔ ti yɛ lima na?

Ti yɛ lima ngi ye ta hu lɔ. Heima ye sawei lɔ naa i jianga li va teisia hu Ngewɔ layei le va. Fo sawa mia kinii Pɔɔl mbumbuni Ɛfisɔs. Fale, jiei ye sawa yi i kani, i lɛmbini hu ii lee ye fele yi ma.

Ji ndɛndei gbuani a tie Toas, ti looilɔ kulo Mailitɔs. Kɛɛ jifa Mailitɔs hu ii yɛ guani wa a Ɛfisɔs, Pɔɔl nunga looilɔ na kɔ ti li ti kpakuisia loli jamaa hu kɔ ti wa tia tieni ti yɛpɛ. Ji wati foni kɔ Pɔɔl i li, kpakuisia ti lii nyani lɔ wa.

Na kpɛlɛ leengɔ woma, ndɛndei foilɔ a tie Saselia. Wati na va Pɔɔl yɛ Saselia, i yɛ Filipi ye pɛɛla lɔ. Na mia Ngewɔ lutu yia Agabɔs ngi mɛini na kɛ i ndenga ngi ma yɛ i yaa Jelusalɛm, ta ngi waalɔ kpindi wɛlei bu. Tao na mia wueni a Pɔɔl. Pɔɔl yɛɛ kpindi wɛlei bu fo fele va kɛ ti ya a ngie Lom kɔ Sisa i ngi gbɛmbo. Mu tɔ lɛ naa gbɔɔ wueni ji ti yɛ lima a Pɔɔl Lom.