Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 90

Yesu tia Samelia Nyaha Yia

Yesu tia Samelia Nyaha Yia

JI YESU tia ngi womableisia ti foni Samelia lɔlei hu, i heilɔ nja lowa yia gblanga kɔ i lɛvu. Kɛ ngi womableisia ti ya tei hu kɔ ti mɛhɛ yeya. I loni heini na lɔ kɛ Samelia nyaha yia ya na njei lala va. Kɛ Yesu ndenga ngi ma yɛɛ: ‘Nya gɔ njei hu ngi kpɔli.’

Hindei ji woteilɔ a kɔlama wa nyapui gama. Bi kɔɔ lɔ gbɛva le? Jifa i yɛni a Sameliamɔ lɔ, kɛɛ Yesu ta yɛni a Juumɔ lɔ. Tao Juubleisia gboto ma tii yɛ loni a Sameliabla ti hinda. Tao tii yɛ a yɛpɛ ti gama! Kɛɛ Yesu longɔ yɛla a numu gbi lee. Fale i ndeilɔ yɛɛ: ‘Ina bi yɛ kɔɔ lɔ ye mia bi vɛima a njei kpɔli va, baa yɛɛ a ngi vɛi tao a yɛɛ a bi gɔ a njei na a ndɛvui ve numu wɛ.’

Kɛ nyapui ngi mɔlinga yɛɛ: ‘Kini, faji gbi ii bi yeya, tao ndowei hu bɔngɔ. Ba ndɛvu ve yei ji gbua mi lɔ?’

Kɛ Yesu kpɛmbonga yɛɛ: ‘Nungei nasia ta njei gbɔli a gbua ndowei ji hu, ti buli hu a be lɔ gbɔma, kɛɛ numui na gbi lee nga njei ve ngi wɛ a kunafɔ lɛvui majɔɔ lɔ.’

Kɛ nyapui ndenga ngi ma yɛɛ: ‘Kini, nya gɔ njei ji hu! Kɔ nya bolohu aa ya be, tao kɔ ngaa ya wa gbɔma mbeindo nja lala va.’

Nyapui yɛɛ a gii la kɛ kpɔiyei vui mia Yesu yɛ a yɛpɛ kɔlongɔ ma. Kɛɛ i yɛ a yɛpɛ tɔnyi lɔ ma kɔlongɔ Ngewɔ ma kɛ ngi Mahayei. Ye tɔnyi ji wuengoi lee sia ndɛvu ve yei na, gbɛva see a numu gɔ lɔ a kunafɔ lɛvui.

Yesu ndeilɔ naa ngi ma yɛɛ: ‘Li bi bi hini loi wu wa mbei.’

Kɛ nyapui potenga yɛɛ: ‘Hindo gbii nya yeya.’

Kɛ Yesu ndenga yɛɛ: ‘Tɔnyi mia bi ndenga, hindo lɔɔlu mia bi heinga ti va, tao ye na bi yeya siahuna, bi hini yana.’

Hindei ji ngi hu gitilɔ wa, gbɛva see na kpɛlɛ Yesu ndeni kɔlongɔ ngi ma, i yɛni a tɔnya lɔ. Yesu ye ji kpɛlɛ hugɔni? I ji kpɛlɛ hugɔilɔ gbɛva see, ta mia yɛni a numui na Ngewɔ yɛɛ ndeni yɛ a ngi loo. Tao Ngewɔ mia hindei ji hugɛni a ngie. Ji Yesu womableisia ti wani ti mɛi a yɛpɛ Samelia nyahin ji gama, ti hu gitilɔ wa.

Gbɔɔ mua kaa kɔlongɔ ji ma? Ji kɛma lɔ a mue kɛ Yesu ii yɛ a numu huwɔyɔ, fale ii gui mua bɛ mu numu huwɔyɔ. Tao ii gui mu gii la kɛ mu gbekpengɔ i lee nunga yekeisia ma jifa mua tieni mui gbuani hinda yia. Yesu longɔ nunga kpɛlɛ ti tɔnyi gaa na a ti gɔ a kunafɔ lɛvui. Mua bɛ kungɔ mu gbɔ nunga ma kɔ ti tɔnyi gaa.