Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 93

Yesu Nunga Taosi Gboto Gɔilɔ

Yesu Nunga Taosi Gboto Gɔilɔ

HINDA ma luwangɔ wa yia wueilɔ. Bi kɔɔ lɔ gbɛ le? Ti Jɔn nunga ti Baptaisimui lɔ waani. Mahin nyahin Hɛlodia, ii yɛ loni a Jɔn nunga ti Baptaisimui hinda. Fale, i pieilɔ mahin i Jɔn wui leenga.

Ji Yesu hindei ji humɛini, ngi lii nyanilɔ wa, kɛ i gbuanga i li dɔgbɔlambei ma. Kɛɛ nunga ti tooilɔ na ngi woma. Ji Yesu nunga lɔni, ti mamanu ngi lɔilɔ. Fale, i yɛpɛilɔ ti gama kɔlongɔ Ngewɔ mahayei ma, tao i nasia haleilɔ ti higbɛngɔ yɛla ti lia.

A kpɔkɔ vuli, ngi womableisia ti lilɔ ngi gama ti nde tɛɛ: ‘Kpindi lɔ wɛlɛma, tao hindei ji londongɔ wa le. Fale, pie nungei jisia ti li fuleisia ma kɔ ti mɛhɛ yeya ti mɛ.’

Kɛ Yesu ndenga ti ma yɛɛ: ‘Ma ii houni ti li, a ti gɔ a mɛhɛ ti mɛ.’ Kɛ i wotenga Filipi gama i ngi mɔli yɛɛ: ‘Mi mia mua mɛhɛ yeya na kɔ mu nungei jisia kpɛlɛ gɔ?’

Kɛ Filipi kpɛmbonga yɛɛ: ‘Kɔ mu nungei jisia kpɛlɛ gɔ navo wulo yana.’ Kɛ Andulu ndenga yɛɛ: ‘Bledi gbuha lɔɔlu kɛ nyɛ mumu fele lɔ hindolupui ji yeya, kɛɛ kulongɔ wa nungei jisia kpɛlɛ va.’

Kɛ Yesu ndenga yɛɛ: ‘A nde nunga ma ti hei kpiti hu.’ Ji nunga ti heini, Yesu sɛigbuailɔ naa Ngewɔ ma mɛhɛ va. Kɛ i tatonga a bledi kɛ nyiisia yangai la a fe ngi womableisia wɛ, kɛ ngi womableisia bɛ ti fenga nunga wɛ. Hinga ti 5,000 mia ti yɛ na kɛ nyaha taosi gbotonga kɛ ndenga. Ti kpɛlɛ ti mɛhɛ mɛilɔ ti go i ve kpaŋ. Ji ti kpɔyɔni a mɛhɛ mɛ la, ngi womableisia ti ye mɔnui lɛilɔ ma nahi kungɔ a samba 12.

Na woma, Yesu ndeilɔ ngi womableisia ma kɔ ti lɛ ndɛndei hu ti Galili Gboyei lewe. Ji kpindi wɛlɛni, vivi wa gulailɔ ti ma kɛ ndɛndei lɔ hɔhɔ ma hu. Ji pieilɔ nduwei i ngi womableisia hu venda kpaŋ. A kpindi liei, ti numui lɔilɔ a jia gboyei ya, a wa a ti mahu we. Kɛ ti yee wa gulanga gbɛva see tii yɛ kɔɔ ina ye mia.

Kɛ Yesu ndenga ti ma yɛɛ: ‘Wua luwa, nya mia!’ Kɛɛ tii yɛ lani la tuŋ kɛ ta mia. Fale, Pita ndeilɔ naa yɛɛ: ‘Ndemui, ina bia vui mia, kɛ nde nya ma ngi jia njei ya ngi wa bi gama.’ Kɛ Yesu ndenga ngi ma yɛɛ: ‘Wa!’ Kɛ Pita gbuanga ndɛndei hu, a jia njei ya! Kɛɛ ji i lini kulo, nduwei ngi hu vendeilɔ kɛ i tatonga a lɔmbu la. Kɛɛ Yesu ngi mabawoilɔ.

Na woma, Yesu nunga taosi gboto gɔilɔ gbɔma a bledi gbuha wɔfila kɛ nyɛ mumunga. Ye wati ji gbɔma, nunga ti mɛhɛ mɛilɔ i mɔnu. Bia bi gii la kɛ hinda manɛingɔ wa mia a na Yesu pieni nungei jisia va? Ji Yesu wama wote ma a mahin ndunyi ji mahu, muɛ yaa mɔnɛ gbɛogbɛ va.