Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 94

Yesu Loilɔ a Ndopo Mumuisia

Yesu Loilɔ a Ndopo Mumuisia

YESU lɔ lɛ sia i ye ndopowui ji gulunga la pisoi ji hu. Ji kɛ ma lɔ a mue kɛ Yesu longɔ yɛla a ndopo mumuisia. Hingei nasia ti ngi gbee ma, ngi gaalupuisia mia. Bi kɔɔ lɔ gbɔɔ Yesu nde ma ti ma? Mu tɔ lɛ.

Ji Yesu tia ngi womableisia ti yɛ lima Kapanium, ti yɛɛ a ndablei gbua ti nyɔunyɔu luahu. Ji ti foni, Yesu ti mɔli lɔ yɛɛ: ‘Gbɔɔ wu yɛ a ndablei gbua kɔlongɔ ma pii hu?’ Yesu yɛ kɔɔ lɔ vui gbɔɔ ti yɛ a ndablei gbua kɔlongɔ ma, kɛɛ ngi longɔ yɛla i kɔɔ ina ta hugɛ lɔ a ngie.

Kɛɛ toobleisia tii ngi gbɛmboni gbɛva see ti yɛ a ndablei gbua kɔlongɔ numui na ma lɔ a wote a tookulɔmui ti lia. Ti lɛnga ti longɔ yɛla ti tookulɔyia mɛ ti mbangeisia lia. Kɛɛ Yesu ye guni i nde ti ma kɛ ii gui numu i lapi tookulɔ yia mɛ va?

I hindo lopo yia loilɔ, kɛ i ngi loonga ti lia i nde ti ma yɛɛ: ‘Nya longɔ wu kɔɔ kɛ wuɛ waa Ngewɔ mahayei hu kɛlee wu wue sia jialenga na. Numui na lee a taikpe wue sia jialui ji na, ta mia numu waa a ngie Ngewɔ mahayei hu.’ Bi sabui na va gɔɔ lɔ Yesu ji leni?

Yesu ji leilɔ, gbɛva see jia lenga tɛɛ lapi tookulɔ yia mɛ va ti mbaangeisia lia. Fale, kungɔ yɛla toobleisia ti gaa sia ta ye wue sia jia lenga na. Ii gui ti ndabla gbua kɔlongɔ tookulɔ yia mɛ la ma.

Wati ji lee yana Yesu aa kɛ kɛ ngi longoi a jia lengeisia. Ngawu lɛnga leengɔ woma, ji nunga ti wani a ti lengeisia kɔ Yesu i ti luba, toobleisia ti ti hu houilɔ. Kɛɛ Yesu ndeilɔ ti ma yɛɛ: ‘A gbe ndopo mumuisia ma ti wa nya gama, wua ti mabali. Gbɛva see nasia ti wuengɔ sia jia lengei jisia ti na, tia mia ta waa Ngewɔ mahayei hu.’ Kɛ Yesu ye ndengei jisia gulunga ngi yaka hu i ti luba. Bi gohunɛingɔ ii le kɔɔ va kɛ Yesu longɔ a jia lengeisia?