Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 99

Tewemahu Gomi Ye Kɛlɛma Yi Yesu Houni

Tewemahu Gomi Ye Kɛlɛma Yi Yesu Houni

JII fele leengɔ woma Alikamisa gbindi ma, Yesu tia ngi gaalopouisia nahi ti gungɔ a 12, ti Tewemahu Gomi houilɔ ngeeya wɛɛ lumu lakpawa yia hu. Kini na bi ngi lɔ ma gbua ma lumui hu, Judas mia, Kalɔtimui. I li ma saagbuableisia gama lɔ kɔ i hugɛ a tie sia ta ye gu ti Yesu hou.

Kɛɛ pɛiŋ Judas aa ya ndi ji wue, i lilɔ saagbuableisia gama i ti mɔli yɛɛ: ‘Gbɔɔ wua fe nya wɛ ina ngi gbɔilɔ wu ma kɔ wu Yesu hou?’ Kɛ ti ndenga tɛɛ: ‘Kani gole numu gbɔyɔngɔ mahu puu.’ Sia lee bi tɔ ma la pisoi ji hu, Judas lilɔ i ti mɛi kɔ i li a tie mia ta Yesu hou na. Bia bii gii la kɛ hinda nyamu wa mia a na?

Ji ti kpɔyɔni a Tewemahu Gomi hou la, Yesu tia ngi gaalupuisia ti kɔmɛ yeka houilɔ nahi teengɔ kpɛlɛ ma. Ye komi na hu, Yesu bledi wumbuilɔ i gali, i fe ngi gaalupuisia wɛ i nde ti ma yɛɛ: ‘A mɛ, gbɛva see ji looni nya luwui lɔ va, na ngi wama fe ma wu va.’ Kɛ i yama i bolei ve ti wɛ ndoi hu i nde ti ma yɛɛ: ‘A kpɔi, gbɛva see ji looni nya ŋami va lɔ, na ngi wama kpuama a saa wu va.’ Baibui ye komi ji loilɔ a ‘Ndemui gbɔkɔ mɛhɛ,’ ɔɔ ‘Ndemui mɛhɛ.’

Isuɛlbleisia ti yɛɛ a Tewemahu Gomi hou kɔ ti gili a wati na Ngewɔ maikei leweni ti wɛleisia mahu, kɛ i Iijiptbla ti haala hinga lengeisia waanga. Kɛɛ Yesu longɔ yɛla naa ngi womableisia ti yaa gii a ngie, tao sia i ye ngi lɛvui veni la ti va. Na va mia i ndeni ti ma kɔ ti yaa Ndemui mɛhɛ mɛ gomi hou fo gbi hu.

Ji ti kpɔyɔni a Ndemui Gbɔkɔ Mɛhɛ mɛ la, Yesu ndeilɔ yɛ ti lii i loo tao ti lanayei i yɛ kpau. Na woma, Yesu tia ngi womableisia ti ngulisia yaailɔ Ngewɔ gama kɛ ti gbua pɛlei bu. A wati na kpindi wɛɛngɔ wa yɛla. Mu tɔ lɛ mia ti lini na.