Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 101

Ti Yesu Waailɔ

Ti Yesu Waailɔ

PISOI ji gbe lɛ bi tɔ gbɔɔ wue ma na. Ti Yesu lɔ gbakpanga nguli ma kɔ i haa. Kɛɛ gbɛva mia ti ji bonda wueni a ngie?

Gbɛva see nunga lɛnga ti juyangɔ yɛla a ngie. Bi ye nungei nasia gɔɔ lɔ? Ye ngila yɛni a Setana lɔ. Na pieni Adam tia Iv ti Jɛhova layei gbua hu. Ta mia pieni Yesu juwuisia ti ngi waa a pili ji bonda.

Kɛɛ pɛiŋ taa ya Yesu gbakpa ngui ma, ngi juwuisia ti hinda nyamu gboto wueilɔ a ngie. Sia mu kaani la, nunga ti wailɔ Gɛtsimani kɛ ti ngi hounga ti li a ngie. Kɛɛ bi ye nungei nasia gɔɔ lɔ? Ngewɔvɛi gbakuisia mia. Mu tɔ lɛ naa gbɔɔ wueni na woma.

Ji ngewɔvɛi gbakuisia ti Yesu houni, ngi gaalupuisia ti luwailɔ kɛ ti wila ti ngi lo ta yiakpe tia ngi juwuisia. Kɛɛ ngi gaalopo felenga, Pita tia Jɔn, tii lini kuama. Ti tooilɔ ti woma kɔ ti tɔ gbɔɔ a wue a Yesu.

Saagbuableisia kɛ nunga ti lilɔ a Yesu kena wova yia gama ta ngi loli a Anas, na yɛni wɔɔ a saagbuamɔ wai. Kɛɛ tii lɛmbini na, kɛ ti gbuanga na ti li a ngie Kaifas gama na yɛni a saagbuamɔ wai. Ti maini ngewɔvɛi gbakuisia gboto ma ti lɛnga ma na.

Ti Yesu ma mɔlilɔ naa, kɛ nunga lɔ wama ta ndɛ yɛpɛnga le kɔlongɔ ngi ma. Na woma, ngewɔvɛi gbakuisia kpɛlɛ ti ndeilɔ naa tɛɛ: ‘Kungɔ tamui ji i haa.’ Kɛ ti tatonga a ndayei vai la ngi yama, ta ngi leendee.

Ji hindei ji kpɛlɛ yɛ a wue, Pita yɛ heini katei hu lɔ tia nunga yekeisia ta gɛwo, gbɛva see kɔlɛ wati mia yɛla. Ji ti yɛ heini ta gɛwo, bɔilopo nyaha yia Pita gbeeilɔ kɛ i ndenga ngi ma yɛɛ: ‘Kini ji yɛɛ Yesu woma.’

Kɛ Pita ndenga yɛɛ: ‘A-a ngii yɛ ngi woma.’

Heima sawa mia kinii nunga ti ndeni Pita ma kɛ i yɛɛ Yesu woma, kɛɛ wati gbi lee ti yɛ a nde ngi ma, i yɛɛ a mawali ma yɛ ii ngi gɔɔ. Ji i mawalini ngi ma heima ye sawei, Yesu woteilɔ i ngi gbee. Pita lii nyanilɔ wa ndei va i kulani kɛ i gbua katei hu i wɔɔ gboŋ.

A ngenda vuli jumi ma, saagbuableisia ti lilɔ a Yesu ti gomɛmi, kɛ ti wuhitɛnga kɔlongɔ na ma ta pie a Yesu. Na woma, ti lilɔ a ngie Pailet gama, na yɛ looni Juda lɔlei mahu.

Kɛ saagbuableisia ti ndenga ngi ma tɛɛ: ‘Numu nyamu wa lɔ, kungɔ i haa.’ Yesu mɔlingoi woma, Pailet ndeilɔ yɛɛ: ‘Ngii hinda nyamu gbi lɔni kini ji hu.’ Kɛ Pailet Yesu yoyonga Galili mahin gama Hɛlɔd Antipas na yɛ heini Jelusalɛm kɔ i ngi mamɔli. Kɛɛ Hɛlɔd bɛ ii nyamu gbi lɔni Yesu hu. Fale, i ngi yamailɔ Pailet gama.

Pailet longɔ yɛla i gbe Yesu ma. Kɛɛ Yesu juwuisia ti longɔ yɛla Pailet i gbe numu yeka ma sia aa gbe Yesu ma. Ye numu yekei ji yɛni wɔɔ a humamɔ lɔ ta ngi loli a Balabas. A fuli hu, Pailet Yesu gbuailɔ giti ya kɛ i ndenga nunga ma yɛɛ: ‘Wu mahin gbe.’ Kɛ saagbuabla wawaisia ti ndenga a yele wa tɛɛ: ‘A gbua a ngie mbei! A li wu ngi waa!’ Na woma, ti gbuailɔ a Yesu kɔ ti li ti ngi waa kɛ Pailet gbenga Balabas ma.

Sia lee bi tɔ ma la pisoi ji hu, ti Yesu gbakpailɔ naa ngui ma. Tia humabla falenga mia ti ti gbakpani, ye ngila ngi yeja ma lukui hu, ye pekei ngi gɔwɔ ma lukui hu. Kɛɛ ye humablei nasia tia tii pisoi ji hu. Pɛiŋ Yesu aa ya haa, humablei nasia ye ngila ndeilɔ ngi ma yɛɛ: ‘Ndaeile, gii a nge ji ba waa bi mahayei hu.’ Kɛ Yesu ndenga ngi ma yɛɛ: ‘Nya nde ma bi ma ha, kɛ ba yɛɛ nya gblanga Alijɛnɛ.’

Bia bi gii la kɛ lahedi yekpe wa mia a na? Bi alijɛni na gɔɔ lɔ Yesu yɛ a yɛpɛ kɔlongɔ ma? Alijɛni na Ngewɔ kpatɛni haalei bi mia gɔɔ lɔ i yɛ na? A tɔnya, ndunyi ji ma mia. Ji Yesu wama wote ma a mahin ndunyi ji mahu, a kini ji wu lɔ hei hu kɔ i yɛ ndunyama alijɛni hu a kohunɛ. Mu gohu ii nɛni na va?