Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 88

Jɔn Yesu Baptaisilɔ

Jɔn Yesu Baptaisilɔ

BIA kini ji lɔ ma haiŋ guwi ji yei ma ngi wumba sia lee bɛ ŋɔni na? Yesu mia. Ngi vui yɛni a fo 30 lɔ. Jɔn mia looni ngi gblanga, mu yɛ hinda wulo gaanga kɔlongɔ ngi ma. Ba gii lɔ a ndui na gbavoni Ilijabɛt gohu ji Mɛɛli lini va ma ngi ma? Ndui na yɛni a Jɔn lɔ. Kɛɛ bi kɔɔ lɔ gbɔɔ Jɔn tia Yesu ti piema pisoi ji hu?

Jɔn i Yesu baptaisinga lɔ lee sange Jɔdan Yei hu. I ngi lɔmbuilɔ njei hu kɛ i ngi gbua. Himia ta numui baptaisi. Ti yɛɛ a Jɔn loli a Jɔn Baptaisimui, gbɛva see i yɛɛ a nunga baptaisi. Kɛɛ gbɛva mia Jɔn Yesu baptaisini?

Gbɛva see Yesu mia lini ngi gama i nde ngi ma kɔ i ngi baptaisi. Nasia ti yɛ a woove ti wuehinda nyamuisia ma, tia mia Jɔn yɛ a ti baptaisi. Kɛɛ Yesu hinda nyamu gbi wueilɔ nahi kungɔ i woove ma? Ɔ-ɔ, ii hinda nyamu gbi wueni, gbɛva see Ngewɔ hindolui mia a ngie na gbuani ngelegohu. Fale, hinda yeka va mia Yesu lini Jɔn gama kɔ i ngi baptaisi. Mu tɔ lɛ gbɛva le.

Pɛiŋ Yesu aa ya li Jɔn gama kɔ i ngi baptaisi, i yɛ a kapinda yingi lɔ wue. Kapindei yɛni a numui na lɔ a kpukoi gbakpa, heiwuisia kɛ hakei yepekeisia. Mɛɛli hini Josɛfi yɛni wɔɔ a kapindei lɔ, ta mia Yesu gaani kɔ ta bɛ i wote a kapindei. Kɛɛ kapinda yenge va yana Jɛhova aa Yesu loo ndunyi ji hu. Ngenge yekpe wa yɛɛ Jɛhova yeya Yesu va, tao wati foilɔ naa kɔ Yesu i tato a ye ngingi wue la. Fale, kɔ i kɛ kɛ ngi magbatɛngoi ye ngingi wue va, i lilɔ Jɔn gama kɔ i ngi baptaisi. Bi giingoi la kɛ ji Ngewɔ gohunɛilɔ?

Ɔɔ ngi gohunɛilɔ wa, gbɛva see ji Jɔn Yesu lɔmbuni njei hu i ngi gbua, ngo gbuailɔ ngelegohu i nde yɛɛ: ‘Nya hindolui lɔ a ji, na nya gohunɛingɔ ngi va.’ I wueilɔ sia lee bɛ ngelegohu lawongɔ yɛla, kɛ haiŋ yeinga Yesu ma sia lee bɛ ŋɔni na. Kɛɛ ŋɔni vui yana, Ngewɔ yafa yekpi mia yɛla.

Yesu baptaisingoi woma, i lilɔ hinda yia nahi na ya louŋlouŋ, gbɛva see hinda gboto yɛɛ ngi nɛmahu gii va la. I yɛɛ na folo 40 kɛ kpindi 40 va. Na mia Setana ngi maini na kɛ i ngi hugɔnga. Setana Yesu hugɔilɔ heima sawa va kɔ i Ngewɔ jaweisia nyani. Kɛɛ Yesu ii lumani ngi va klobɛɛ va.

Na woma, Yesu yamailɔ tei hu kɛ i hinga lɛnga mɛinga kɛ ti wotenga a ngi womabla ye haala yisia. Ye hingei jisia ti lɛnga mia a Andulu, Pita (na ta ngi loli gbɔma a Saimɔn), Filipi kɛ Nataniɛl (na ta ngi loli gbɔma a Batalomi). Yesu tia ngi womablei jisia ti lilɔ naa Galili lɔlei hu, kɛ ti heinga Nataniɛl yetahu ta na loli a Kena. Na mia Yesu kabandema hindei ye haala yi wueni na heinyɔya gomɛ wa yia hu. Bi kɔɔ lɔ gbɔɔ i pieni? I njei lɔ woteni a ndoi.