Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 79

Daniɛl tia Kɔlinga

Daniɛl tia Kɔlinga

PISOI ji gbee lɛ. Bia Daniɛl lɔ ma kɔlinga ti pui hu? Kɛɛ tii gbɛogbɛ wue ma a ngie. Bi kɔɔ gbɛva le? Bi kɔɔ ye mia Daniɛl wilini kɔlingei jisia ti pui hu? Mu tɔ lɛ.

Ji ti Bɛlsasa waani, Dailɔs mia woteni a Babilɔn mahin. I loilɔ wa a Daniɛl hinda, gbɛva see Daniɛl hinda manɛngɔ wa yɛla tao ngi nɛmahu leengɔ wa. Fale, Dailɔs ngi woteilɔ a nuu wa ngi mahawui hu. Ji pieilɔ Daniɛl mbangeisia ti juya a ngie. Fale, bi kɔɔ lɔ gbɔɔ ti pieni?

Ti lilɔ naa Dailɔs gama ti nde tɛɛ: ‘O mahin Dailɔs, mu mahangeisia kpɛlɛ mu nguhitɛ wuenga, kɔ bi saa la kɛ numui na gbi lee i ngewɔ yeka ɔɔ i numu yeka vɛlinga i baa bi ma folo 30 va, ti ngi wili kɔlinga ti pui hu.’ Kɛɛ Dailɔs ii yɛ kɔɔ sabui na va nungei jisia ti longɔ yɛla i saa ji la. Kɛɛ i tɔilɔ kɛ hinda yekpe mia, fale i ye saa lailɔ. Tao kpaya gbi ii ya yɛ numu gbi yeya ye saa ji mawove va.

Ji Daniɛl ji ma gɔɔni, i lilɔ ngi ye pɛɛ la, i wombi gbakpa i hɛ Ngewɔ gama sia lee i yɛ a pie la ngovama. Nunga nyamui nasia ti yɛ kɔɔ lɔ kɛ Daniɛl ɛɛ gbe a Jɛhova vɛi la. Ti gohunɛilɔ wa, gbɛva see i yɛ ti nɛmahu kɛ ti gunga Daniɛl ma.

Ji Mahin Dailɔs kɔɔni sabui na va ti saa na lani, ngi lii nyanilɔ wa Daniɛl va. Kɛɛ kpaya gbii ya yɛ ngi yeya ye saa na mawove va. Fale, i ndeilɔ yɛ ti Daniɛl wili kɔlinga ti pui hu. Kɛɛ mahin ndeilɔ naa Daniɛl ma yɛɛ: ‘O Daniɛl, nya langoi la kɛ bi Yewɔi na ba ngi vɛli, a gulɔ i bi mabawo.’

Hindei ji pieilɔ Dailɔs lii i nyani haŋ nahi ii guni a yii a kpindi na. Sia lee ngee woni, i wimɛilɔ i li yakpe kɔlinga ti pui la. Bia ngi lɔ ma mia wɛɛni kɔlinga ti pui la pisoi ji hu? Dailɔs ndeilɔ naa ngeeya yɛɛ: ‘O Daniɛl, tɔnya Yewɔwai ngi bɔilupui! Bi Yewɔi na ba ngi vɛli, i guilɔ i bi mabawo kɔlinga ti yeya?’

Kɛ Daniɛl kpɛmbonga yɛɛ: ‘Ngewɔ ngi maikei yoyoilɔ kɛ i kɔlinga ti la gbɔunga kɔ taa nya mɛ.’

Mahin gohunɛilɔ wa, kɛ i ndenga yɛ ti Daniɛl gbua kɔlinga ti pui hu. Na woma, i ndeilɔ yɛ ti nunga nyamui nasia kpɛlɛ hou ti ti wili kɔlinga ti pui hu, tia ti mabla. Ji ti ti wilini pui hu, tii foni pui ye mbui, kɛ kɔlinga ti ti hounga ti ti hu mblambla.

Na woma, Mahin Dailɔs kɔlei nyɛilɔ nunga kpɛlɛ gama ngi mahawui hu yɛɛ: ‘Nya naa nde ma wu ma kɔ numui gbi i bagɔɔma ve Daniɛl Yewɔi wɛ. Gbɛva see i kabandema hinda wa wuenga. I Daniɛl mabawonga kɔlinga ti yeya.’