Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 81

Isuɛlbleisia Ti Lilooilɔ Ngewɔ Ma

Isuɛlbleisia Ti Lilooilɔ Ngewɔ Ma

NASIA ti gbuani Babilɔn yama va Jelusalɛm ti gungɔ yɛla a taosi gboto. Kɛɛ ji ti foni Jelusalɛm, na nyaningɔ wa yɛla tao numu gbi ii yɛ na. Fale, Isuɛlbleisia ti tatoilɔ a Jelusalɛm loo la gbɔma.

Haala hindeisia ti pieni ye ngla nge yɛni a ji lɔ, ti saagbuami looilɔ saagbua va Jɛhova gama. Ngawu lɛnga leengɔ woma, ti tatoilɔ a hɛ wɛlei loo la. Kɛɛ Isuɛlbleisia ti juwuisia tii yɛ loni ti ye hɛ wɛlei loo. Fale, ti tatoilɔ a ti vawei la kɔ ti gbe ngingi na ma ti yɛ a pie, kɛɛ Isuɛlbleisia ti lumani ta gbe. Fale, ti juwuisia ti kɔlei nyɛilɔ Pasia mahin gama na ti ngi heini Sailɔs haangoi woma, kɔ i pie Isuɛlbleisia ti gbe a hɛ wɛlei loo la. Tao na mia wueni.

Fo 17 leengɔ woma ji Isuɛlbleisia ti gbuani Babilɔn, Jɛhova ngi lutuisia looilɔ Hegai tia Jakalia kɔ ti nde Isuɛlbleisia ma ti tato a hɛ wɛlei loo la gbɔma. Sia bɛ saa langɔ yɛla kɛ ii gui ti hɛ wɛlei loo, ti lii looilɔ Ngewɔ ma, kɛ ti lɛnga gulɔma a ye hɛ wɛlei loo la.

Fale, Pasia nuu wa yia na ta ngi loli a Tatenai, i lilɔ Isuɛlbleisia gama i ti mɔli ina ye mia kpayei veni ti wɛ hɛ wɛlei loo va. Isuɛlbleisia ti ndeilɔ ngi ma kɛ Sailɔs mia ndeni ti ma ji ti yɛ Babilɔn yɛɛ: ‘A yama Jelusalɛm wu wu Yewɔi Jɛhova hɛ wɛlei loo.’

Tatenai kɔlɔ nyɛilɔ naa i joyo Babilɔn mahin gama kɔ i kɔɔ ina Sailɔs vui mia yɛ ndeni kɔ Isuɛlbleisia ti hɛ wɛlei loo. Hu ii lɛmbini kɛ Pasia mahin kɔlei nyɛinga Tatenai gama i nde ngi ma yɛ Sailɔs vui mia yɛ ndeni. Ye kɔlei na hu, i ndeilɔ yɛɛ: ‘Gbe Isuɛlblei nasia ma ti ti Yewɔi hɛ wɛlei loo. Tao nya naa ndema bi ma kɔ bi gbɔ ti ma.’ Fo naani gohu, ti kpɔyɔilɔ a Ngewɔ hɛ wɛlei loo la tao Isuɛlbleisia ti gohunɛilɔ wa.

Fo 48 leengɔ woma ji Isuɛlbleisia ti kpɔyɔni a Ngewɔ hɛ wɛlei loo la, hinda gbɔndei yɛɛ ti ma tao Ngewɔ hɛ wɛlei ma ii yɛ gbatɛni. Kɛɛ Isuɛlblei nasia lia ti yɛ Babilɔn, ye ngla nge yɛɛ na nahi ngi biyei mia a Ɛjla, i hindei na ma gɔɔilɔ. Fale bi kɔɔ lɔ gbɔɔ i pieni?

Ɛjla lilɔ Pasia mahin Atasaksis gama i ye hindei na hugɛ a ngie. Maha yekpi ji haiŋ gboto veilɔ Ɛjla wɛ kɔ i li la Jelusalɛm. Ɛjla ndeilɔ Isuɛlblei nasia ma ti yɛ Babilɔn kɔ ti gbɔ ngi ma li va a ye hakei nasia Jelusalɛm. Nasia ti lumani li va, i loni kulo ti jikei i gu a 6,000. Kani gole tia kani gbɔlu kɛ haka yeka gbotonga ti yɛɛ na li va la.

Kɛɛ nunga nyamuisia ti yɛɛ pili na hu li va Jelusalɛm. Fale Ɛjla lii hɛɛilɔ wa kɛ tia hakei nasia gbua ti yeya pili hu kɛ ti ti waanga. Fale, Ɛjla numui kpɛlɛ lɛilɔ ma sia lee bi tɔ ma la pisoi ji hu, kɛ ti hɛnga Jɛhova gama kɔ i ti mahugbe haŋ ti fo Jelusalɛm.

Tao Jɛhova loilɔ ti mahugbe ma haŋ ti fo Jelusalɛm. Ngawu naani mia ti mbumbuni pili hu pɛiŋ taa ya fo. Bia bii gii la kɛ tɔmasei mia ji kɛ ma kɛ nasia ta ti lii loo Jɛhova ma a ti mahugbe lɔ kɛyi gbi lee ti yɛ hu?