Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 68

Hinga Lenga Felenga Ti Yamailɔ Ndɛvui Hu

Hinga Lenga Felenga Ti Yamailɔ Ndɛvui Hu

INA ndui haailɔ, kɛ i yama ndɛvu hu, bii gii la kɛ ngi nje gohu a nɛilɔ? Aa ngi gohu a nɛilɔ wa! Kɛɛ bi giingoi la kɛ numu haanga a yama lɔ gbɔma ndɛvu hu? Na wuenga wɔɔ gba?

Bia nungei jisia lɔ ma pisoi ji hu? Kini ji yɛni a Ngewɔ lutui lɔ, ngi biyei mia Ilaija. Nyapui ji bi ngi lɔ ma pondo nyaha mia a ngie, i yɛ Jɛlefat lɔ. Ngi lui mia a hindolui ji. Foo yia ma, hindolui ji higbɛilɔ, kɛ i haanga. Na woma, Ilaija ndeilɔ ngi nje ma yɛɛ: ‘Ndui ji ve mbɛ.’

Kɛ Ilaija ndui womi wumbunga i li la ngi lumui hu, kɛ i nda kpukoi ma. Kɛ i hɛnga yɛɛ: ‘O Jɛhova, pie ndupui ji i yama ndɛvui hu.’ Kɛ ndupui tatonga a lɛvu la gbɔma! Kɛ Ilaija yamanga a ngie ngi nje gama kɛ i ndenga yɛɛ: ‘Kpe lɛ, bi lui yamanga ndɛvui hu!’ Na va mia nyapui ji gohunɛingɔ wa hi.

Ngewɔ lutui yepekei yɛɛ na, nahi ngi biyei mia a Ilaisa. Pɛiŋ aa ya wote a Ngewɔ lutui, i yɛni a bɔilopo lɔ Ilaija gama. Wati lɛnga leengɔ woma ji i woteni a Ngewɔ lutui, Jɛhova pieilɔ i kabandema hindanga wue. Foo yia ma, Ilaisa lilɔ ta yia hu ta na loi a Sunɛm. Nyapo yia yɛɛ na a ngi hou panda. Wati lɛnga leengɔ woma, ye nyapui ji hiindolo yia leilɔ.

Ji ye ndui ji lakpani, wati yia i tooilɔ ngi kɛkɛ woma kɛ ti ya mba leemi. Hu ii guani kɛ ye ndupui wɔɔnga yɛɛ: ‘Nya wui lɔ gbalɛ ma!’ Kɛ ti ya a ngie pɛɛ la. Na woma, ye ndui ji haailɔ. Ngi nje lii nyanilɔ wa. I lilɔ gama i Ilaisa loli.

Ji Ilaisa lini, i ye pomi wumbuilɔ, kɛ i ya la lumui hu. Na woma, i hɛilɔ Jɛhova gama, kɛ i wɛlɛnga pomi mahu. Hu ii lɛmbini, kɛ ndui luwui hu latonga a gbandila, kɛ i lisonga heima wɔfila. Bii gii la kɛ ngi nje gohunɛilɔ wa ji i jɔkɔni lumui hu i tɔ kɛ ngi lui yamanga ndɛvui hu?

Nunga gbotonga ti haanga, tao ji waa a ndinyani wa ti mableisia gama kɛ ti ndiamuisia. Kpaya gbii mu yeya nunga ti wu va hei hu. Kɛɛ kpayei lɔ Jɛhova yeya. Mu wama kaa wuema kulɔma sia i ye wama nunga miliɔn gboto wu ma la hei hu.