Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 75

Hiibu Hinga Lenga Naanisia

Hiibu Hinga Lenga Naanisia

JI MAHIN Nɛbukanaisa Isuɛlbleisia woteni a ngi bɔilupuisia, i kɔlɔ gɔɔbla kpɛlɛ wumbuilɔ i li a tie Babilɔn. Na woma i nasia wɔyɔilɔ ti lia nahi ti nyandengɔ, tao ti nɛmahu leengɔ. Ti lɛnga mia bi ti lɔ ma pisoi ji hu. Ye ngla biyei mia yɛla a Daniɛl. Babilɔnbleisia ti yepekei nasia loilɔ a Sɛdak, Misak, kɛ Abɛdnigo.

I yɛɛ Nɛbukanaisa nɛmahu kɔɔngei jisia gaa va kɔ ti yenge ngi maha wɛlei bu. Ti kaa wuenga fo sawa va, Nɛbukanaisa a nasia wumbu lɔ ti nɛmahu leengɔ kɔ ti ya gbɔ ngi ma hindeisia hu gbatɛ va. Ngi longɔ yɛla foningi jisia ti yɛ kahugbua yekpe hu, tao ti gahui i yɛ kpau. Fale, i ndeilɔ ngi bɔilupuisia ma kɔ ti ya mɛhɛ yiakpi na ve ti wɛ, i yɛ a mɛ tia ngi mabla, kɛ ndɔ yiakpi na tia ngi mabla ti yɛ a kpɔli.

Daniɛl lɔ lɛ pisoi ji hu. Bi kɔɔ lɔ gbɔɔ i nde ma Aspɛnas ma, Nɛbukanaisa bɔilupuisia ti mahumui? Daniɛl ndema lɔ ngi ma yɛ ii loni i yaa mɛhɛ yiakpi nasia mɛ mahin a mɛ. Kɛɛ Aspɛnas lii hɛɛilɔ. Kɛ i ndenga yɛɛ: ‘Kɛɛ mɛhɛ jisia mia mahin ndenga yɛ kungɔ wu ya mɛ. Fo sawei gbɔyɔnga wu gahuisia tii yɛ lɔ kpau sia wu mbangeisia ti ndei na, kɛnga mahin a nya waa lɔ.’

Kɛ Daniɛl ya numui na gama Aspɛnas ngi loko waani ngi yeya, tia ngi ndiamɔ saweisia, i nde ngi ma yɛɛ: ‘Kɔnɛ le, yaa mu gɔ a haiŋ nasia lee nunga ta hiŋ mɛ va, kɛ njei kpɔli va jii 10 va. Bi tɔ ina mu luwui ɛɛ nyande i lee nasia ma tia mahin kɛ ngi mabla taa mɛhɛ yiakpi mɛ.’

Ti mahugbemui lumailɔ ji ma. Tao jii 10 leengoi woma, Daniɛl tia ngi ndiamɔ saweisia ti luwui gbekpeilɔ i lee ti mbangeisia ma. Fale, ti mahugbemui gbeilɔ ti ma kɔ ti ya tuhaiŋ nasia mɛ nunga ta hiŋ.

Ji ye fo sawei gbɔyɔni, ti lilɔ a foningi jisia Nɛbukanaisa gama kɔ i ti ya bɛɛ. Na woma, mahin i Daniɛl tia ngi ndiamɔ saweisia lɔ wumbuni, gbɛva see i tɔilɔ kɛ tia mia ti nɛmahu leengɔ wa. Wati gbi lee Nɛbukanaisa yɛ a ti mɔli kɔlongɔ hinda ma, ti yɛɛ hu gɔɔngɔ heima 10 bɛ i lee ngi jaagbuableisia kɛ ngi nɛmahuleebleisia ma ti yɛ na.