Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 70

Jona tia Nyɛ Lakpa Wai

Jona tia Nyɛ Lakpa Wai

KINI ji lɔ lɛ nja wai ji hu. Bii gii la kɛ kpundɛ wa mia i hu? Nyi na lɔ wama ngi gbɔli va. Bi ye kini ji biyei gɔɔ lɔ? Ngi biyei mia a Jona. Mu tɔ lɛ sia kpundei ji ye ngi maini.

Jona yɛni wɔɔ a Jɛhova lutui lɔ. Ji Jɛhova lutui Ilaisa haani, hu ii guani ta mia Jɛhova ndeni Jona ma yɛɛ: ‘Hiye, bi li Ninivɛ, ta wai na hu. Gbɛva see ti wuehinda nyamungɔ wa le. Nya longɔ bi li bi yɛpɛ ti gama.’

Kɛɛ Jona ii yɛ loni i li. Fale, i heilɔ ndɛndei hu i li a pele yeka we. Jɛhova gohu ii yɛ nɛɛni na ma. Fale, i pieilɔ vivi wa i vɛ. Njei lumbeilɔ wa i loni kulo kɔ ndɛndei i lɔmbu. Njawulibla ti luwailɔ huleengɔ gboŋ, kɛ ti tatonga a gbaa la a ti yewɔisia.

Na woma Jona ndeilɔ naa ti ma yɛɛ: ‘Nga Jɛhova lɔ vɛli. Ngewɔ na ngelegohu tia ndunyi gbatɛni. Kɛɛ na i ndenga nya ma pie va, ta mia ngi wila ma pie leima.’ Fale, njawuibla ti ngi mɔlilɔ tɛɛ: ‘Gbɔɔ naa mua pie a bie kɔ njei i gɔlɛ mu va?’

Kɛ Jona ndenga ti ma yɛɛ: ‘A nya wili njei hu, kɔ i gɔlɛ wu va.’ Njawuibla tii yɛ loni ti pie, kɛɛ ji njei lɛni gulɔma a lumbe la, ti Jona wumbuilɔ kɛ ti ngi wilinga njei hu. Gama kɛ njei gbenga a lumbe la.

Sia lee Jona yeini njei hu, kɛ nyɛ wa ngi gbɔlinga, kɛɛ ii haani. Jii sawa mia i mbumbuni nyi gohu. I yɛ na lɔ kɛ i Ngewɔ manɛnɛnga kɔ i manu ngi ma ngi layei gbua va hu.

Jɛhova manuilɔ Jona ma, kɛ i pienga nyi i bali a ngie ngiyi ma. Na woma, Jona lilɔ Ninivɛ. Gbɔɔ mua kaa kɔlongɔ na ma wueni? Tɔmasei mia a ji kɛ kungɔ mu wolo Jɛhova ma a wati gbi.