Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 72

Ngewɔ Gbɔilɔ Hɛsikaya Ma

Ngewɔ Gbɔilɔ Hɛsikaya Ma

BI KƆƆ lɔ gbɛva mia kini ji hɛ ma Jɛhova gama? Gbɛva mia i kɔlei jisia laa Jɛhova jaagbuami gɔɔbu? Ngi biyei mia a Hɛsikaya. I yɛni wɔɔ a maha lɔ kɛnyɛwu filisia ti mahawui hu Isuɛl. Wati yia ma ngi lii nyanilɔ. Bii kɔɔ gbɛva le?

Ajifa Asilia gɔgɔbleisia ti lilɔ kɔ ti kɔ wɛɛ ti ma. Tao ye Asilia gɔgɔblei jisia ti yɛ gɔnga a Isuɛl kɛnyɛwu puuisia ti mahawui. Tao Jɛhova gbeilɔ ye kɛnyɛwu puui jisia ti mahawui ma ti yeya, ajifa tii yɛ a na wue ngi longɔ la.

Asilia mahin yɛ kɔlɔ nyɛinga Hɛsikaya gama. Ye kɔleisia mia Hɛsikaya fombonga Ngewɔ hɛ wɛlei gulɔ. Ye kɔlei jisia hu, i bagbuama yɛpɛnga nyɛilɔ kɔlongɔ Jɛhova ma, tao i ndeilɔ Hɛsikaya ma kɔ i waa ngi bu. Na va mia Hɛsikaya hɛni Jɛhova gama yɛɛ: ‘O Jɛhova, mu mabawo Asilia mahin yeya. Kɔ nunga kpɛlɛ ti kɔɔ ndunyi hu kɛ bia yakpe mia Ngewɔ a bie.’ Jɛhova woloilɔ Hɛsikaya hɛwui ma?

Hɛsikaya yɛni a maha yekpe lɔ. Ii yɛ wueni sia mahangei nasia ti yɛ na kɛnyɛwu puuisia ti mahawui mahu, ɔɔ sia ngi kɛkɛ Ehas yɛ na. Hɛsikaya yɛɛ a jia a Jɛhova jaweisia. Fale, ji i kpɔyɔni a hɛ la, Jɛhova ngi lutui Aisaia looilɔ kɔ i nde ngi ma yɛɛ: ‘Asilia mahin ɛɛ ngi gɔwɔ loo Jelusalɛm. Ngi kɔgɔmɔ yia bɛ ɛɛ lukpe na gbla, tao tɛɛ sɔli ye ngla bɛ wili Jelusalɛm.’

Pisoi ji gbe lɛ kɔlɔ la ji ma. Bi kɔɔ lɔ yeni mia ti haangoi ji? Asilia gɔgɔbleisia mia. Jɛhova ngi maikei yoyoilɔ, tao kpindi yakpe, ye maikei ji kɔgɔbla 185,000 waailɔ. Fale, Asilia mahin wukpuailɔ bu kɛ i yamanga ngi yetahu.

Kɛnyɛwu fili nasia ti mahawui mabawoilɔ, tao nunga ti ndilɛli majɔɔilɔ wati wulo va. Ji Hɛsikaya haani, ngi lui Manasɛ mia woteni a mahin. Kɛɛ Manasɛ tia ngi lui Amɔn, tii yɛni wɔɔ a maha yekpenga. Na pieilɔ hinda nyamui i gboto Isuɛl gbɔma. Ji Amɔn bɔilupuisia ti ngi waani, ngi lui Josaya mia woteni a mahin Isuɛl kɛnyɛwu filisia ti mahawui mahu.