Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 61

Devidi Woteilɔ a Mahin

Devidi Woteilɔ a Mahin

SƆƆL tooilɔ gbɔma Devidi woma ngi hou va. Sɔɔl kɔgɔbla 3,000 wumbuilɔ kɔ i li i Devidi gɔkoi ngi waa va. Ji Devidi ji magɔɔni, i tutusia looilɔ kɔ ti li ti mia gɔkoi Sɔɔl yɛ a yii na tia ngi gɔgɔbleisia. Ji ti na lɔni, Devidi ngi womabla fele mɔlilɔ yɛɛ: ‘Ye mia mua ta mua li wali na hu Sɔɔl a yii na.’

Kɛ Abisai kpɛmbonga yɛɛ: ‘Nya.’ Abisai yɛni wɔɔ a Juluya lui lɔ, Devidi ndee nyahalui. Ji Sɔɔl tia ngi gɔgɔbleisia ti yɛ laani jii hu, Devidi tia Abisai ti lilɔ mia Sɔɔlni ti yɛ laani na. Kɛ ti Sɔɔl jɔli, tia ngi yagbɔi hakei wumbunga ngi wukɔ kɛ ti yaa la. Numu gbi ii ti lɔni, gbɛva see ti yɛ jii wa hu lɔ.

Sia lee bi tɔma la pisoi ji hu, Devidi tia Abisai ti gbuailɔ yɛlɛiŋ miando Sɔɔlni ti yɛ laani na ti lɛ ngiye wa yia ya, Kɛ Devidi yele gula i nde Abna ma numui na yɛ looni Isuɛl gɔgɔbleisia ti gulɔ, yɛɛ: ‘Abna, gbɛva mia bi gbenga a Isuɛl mahin mahugbe la, bi lemui? A tɔ lɛ mia ngi jɔli na tia ngi yagbɔi hakei?’

Ji Sɔɔl wuni jii hu, i kɔɔilɔ kɛ Devidi mia yɛpɛ ma. Kɛ i mɔlinga yɛɛ: ‘Devidi bia mia bi yɛpɛ ma?’ Bia Sɔɔl tia Abna lɔma pisoi ye pekei na hu?

Devidi ndeilɔ naa yɛɛ: ‘Nya vui mia o mahin nya lemui.’ Kɛ i mɔlinga yɛɛ: ‘Gbɛva mia bi hitɛnga bi bɔilupui woma? Hinda nyamui ye gbɔɔ ngi pienga a bie? O mahin bi jɔli gbe, numu yia loo i wa poma.’

Kɛ Sɔɔl ndenga yɛɛ: ‘Ngi jumbu hinda wuenga tao ngi kpowa hinda wuenga.’ Na woma kɛ Devidi ya miando i yɛ lima na, kɛ Sɔɔl yamanga ngi ye pɛɛla. Devidi ndeilɔ naa ngi lii hu yɛɛ: ‘Ngi gbuama mbeindo ngi li ngi hei Filistiabla ti lia. Na ii wue lɔ Sɔɔl a nya waa lɔ foo yia ma.’ Tao na mia Devidi pieni. Devidi lilɔ i Filistiableisia ti hugbowa i pie bi tɔnga bɛ i ti valɔ.

Foo yia ma, Filistiableisia ti lilɔ kɔ tia Isuɛlbleisia ti gɔ. Ye koi na hu mia Sɔɔl tia Jonɛtan ti haani na. Ji Devidi lii nyanilɔ wa, kɛ i ngole nyande yia yaanga i nde yɛɛ: ‘Nya lii nyaningɔ wa le bi va nya ndii Jonɛtan. Sia hinda yekpi va bi pieni nya gama!’

Ji kpɛlɛ leengɔ woma, Devidi yamailɔ Isuɛl lɔlei hu i li i hei ta wa yia hu ta na loli a Hiblɔn. Kɛɛ koi yɛɛ Devidi womableisia luahu tia numu yia, na loko looni Isbosɛt ma kɔ i wote a mahin. Kɛɛ tii guni Devidi womableisia ma. Devidi vui yɛni a fo 30 lɔ ji ti ngi woteni a mahin. Fo wɔfila kɛ ye kutu mia i mahayei mɛni Hiblɔn. Ndengei nasia i ti lɛnga leni Hiblɔn ti biyei mia a Amnɔn, Absalɔn kɛ Adonija.

Wati yia wailɔ naa ji Devidi tia ngi womabla ti lini kɔ ti kɔ gula ta nyande yia ma ta toli a Jelusalɛm. Juluya, Devidi ndee nyahalui ngi lui Joab, ta mia looni ti gulɔ. Fale Devidi Joab looilɔ ngi gɔgɔbleisia mahu. Ji kpɛlɛ leengɔ woma, Devidi mahayei mɛilɔ Jelusalɛm.