Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 58

Devidi tia Golaya

Devidi tia Golaya

FILISTIABLA ti wailɔ gbɔma kɔ ti gɔ a Isuɛlbleisia. Devidi ndeenga ti sawa ti yɛɛ Sɔɔl gɔgɔbleisia lia. Fale foo yia ma, Jɛsi ndeilɔ Devidi ma yɛɛ: ‘Nyɔ yelengoi wumbu, kɛ bledi gate lɛnga bi li la bi ndeenga wɛ, tao bi kɔɔ ina ti gahui ii ye na.’

Ji Devidi foni Isuɛl gɔgɔbleisia ti wali hu, i wimɛilɔ i li kɔ yiti ya kɔ i li i ngi ndeenga lɔɔ. Filistiabla ti gɔgugbawai Golaya gbuailɔ naa kɔ i Isuɛlbleisia yɛlɛ. A nde ngeleya yɛɛ: ‘A kɔgugba yia gbua wu lia kɔ i wa i lapi a nge. I nya waanga, mua wote lɔ a wu luweisia. Kɛɛ ina ngi ngi waailɔ, wua bɛ wua wote lɔ a mu luweisia.’ Golaya yɛɛ a ji wue a ngenda, kɛ kpɔkɔ foo 40 va pɛiŋ Devidi a yaa li.

Kɛ Devidi kɔgɔbla ti lɛnga mɔlinga yɛɛ: ‘Numui na a Filistiamui ji waa, i Isuɛl gbua ngufema hindei ji hu, gbɔɔ wua fe ngi wɛ?’

Kɛ kɔbleisia ti ndenga ngi ma tɛɛ: ‘Sɔɔl a kpatɛ wa velɔ ngi wɛ, tao a ngi nyahalui velɔ gbɔma ngi wɛ.’

Kɛɛ Isuɛl gɔgɔbleisia kpɛlɛ ti luwailɔ Golaya ma, gbɛva see ngi ma luwangɔ wa yɛla. Ngi nguayi leengɔ yɛla numu fele ma, tao kɔgɔmɔ yia yɛɛ na ngi gɔvɛlei hou va.

Kɔgɔbleisia ti lɛnga ti lilɔ ti nde Sɔɔl ma kɛ Devidi longɔ i gɔ a Golaya. Kɛɛ Sɔɔl ndeilɔ Devidi ma yɛɛ: ‘Bɛɛ gu ba gɔ a Filistiamui na, ndopo mia a bie. Kɛɛ ta kɔgɔmɔ mia a ngie i hinje ngi gulongoi hu ma haŋ i loa hu i lakpanga.’ Kɛ Devidi ndenga yɛɛ: ‘Nga Filistiamui ji waa lɔ sia ngi kɔli na tia njalei na waani la ti wani kɔ ti nya kɛkɛ mbalanga mɛ. Jɛhova a gbɔɔ nya ma.’ Kɛ Sɔɔl ndenga yɛɛ: ‘Li, Jɛhova i yɛ bi woma.’

Devidi lilɔ naa njei la, kɛ i kɔtu magbogbongɔ lɔɔlu wɔyɔnga, kɛ i punga ngi gbafei hu. Kɛ i ya i ngi lavulei wumbu i li Golaya mahu. Ji Golaya ngi lɔni, i yɛɛilɔ vui. Golaya giilɔ la kɛ Devidi waa va hinda wulo hiŋ mia lee.

Kɛ i ndenga ngi ma yɛɛ: ‘Wa nya mahu, nga bi waa lɔ ngi bi ve huanga tia ŋɔninga wɛ kɔ ti bi mɛ.’ Kɛ Devidi ndenga ngi ma yɛɛ: ‘Bia wama nya mahu a sɔli tia ndikpei, kɛɛ nya ngi wama bi mahu a Jɛhova biyei hu lɔ. Jɛhova a bi waa lɔ nya yeya a fuli ji kɔ ngi bi waa.’

Na woma, Devidi lilɔ Golaya mahu a pimɛ, i kɔti gbua ngi gbafei hu i pu ndavulei hu kɛ i pilinga a ngi gbayei kpɛlɛ. Kɛ ye kɔti ya i hɔɔ Golaya lawa, kɛ i gulanga i haa. Ji Filistiableisia ti tɔni kɛ ti gɔgugbawai haanga, ti kpɛlɛ ti leeilɔ a pimi. Na woma, Isuɛlbleisia ti tooilɔ ti woma kɛ ti koi gbuaa.