Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 57

Ngewɔ Loko Looilɔ Devidi Ma

Ngewɔ Loko Looilɔ Devidi Ma

BIA na lɔ ma wuenga pisoi ji hu? Hindo lupui ji mbalalui ji mabowonga njalei ji yeya. Njalei ji wailɔ kɔ i mbalalui na hou i li la mɛ va. Kɛɛ hindo lupui ji wimɛilɔ i li i kpua ngi yeya. Ji njalei ji wani ngi mahu, i houilɔ i paa. A wati yepekei, i mbala yia mabawoilɔ gbɔma kɔli yeya. Hindolupui ji lii loongɔ wa hiye? Bi ngi biyei gɔɔ lɔ?

Ngi biyei mia a Devidi. I yɛ ta yia hu lɔ ta na loli a Bɛtilɛm. Ngi maada biyei mia wɔɔ a Obɛd, na Luut tia Boas ti ndeni. Ba gii lɔ a tie? Devidi ngi kɛkɛ biyei mia wɔɔ a Jɛsi. Devidi yɛ wɔɔ a mbala mahugbe mɔ lɔ. Ji ti Sɔɔl woteni a mahin Isuɛl mahu, fo 10 leengɔ woma ta mia ti Devidi leni.

Wati yia, Jɛhova ndeilɔ Samuɛl ma yɛɛ: ‘Ngulɔ ngu nɛingɔ wai wumbu bi li Jɛsi ye pɛɛla Bɛtilɛm. Ngi loko loonga ngi lo yia ma kɔ i wote a mahin Isuɛl mahu.’ Ji Samuɛl Jɛsi haala lui Ɛliab lɔni i ndeilɔ ngi nɛmahu yɛɛ: ‘Ji mia lɔɔ Jɛhova loko loonga ngi ma.’ Kɛɛ Jɛhova ndeilɔ ngi ma yɛɛ: ‘Baa ngi la jifa ngi nyandengɔ ɔɔ jifa ngi guangɔ bɛɛ ta mia. Ta yana ngaa loko loo ngi ma kɔ i wote a mahin.’

Fale Jɛsi wailɔ a ngi lui yepekei Abinedab, Samuɛl gama. Kɛɛ Samuɛl ndeilɔ ngi ma yɛɛ: ‘Ta yana Jɛhova a loko loo ngi ma.’ Kɛ Jɛsi ngi lui yepekei loinga gbɔma Samma, kɛ Samuɛl ndenga yɛɛ: ‘Ta yana Jɛhova a loko loo ngi ma.’ Na woma, Jɛsi wailɔ a ngi lengeisia ti wɔfila Samuɛl gama, kɛɛ Jɛhova ii loko looni ye ngla gbi ma. Kɛ Samuɛl mɔlinga yɛɛ: ‘Bi hinga lengeisia ti kpɛlɛ lɔ?’

Kɛ Jɛsi ndenga yɛɛ: ‘Ye kɛlɛma yi lɔ na. Kɛɛ i ya mbala mahugbemi.’ Ji ti wani a Devidi, Samuɛl tɔilɔ kɛ ngi nyandengɔ. Jɛhova ndeilɔ naa ngi ma yɛɛ: ‘Ji mia, ngulei jende ngi wumba.’ Tao hi lɔ Samuɛl pieni. Wati lɛnga leengɔ woma Devidi woteilɔ a mahin Isuɛl mahu.