Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 60

Abigɛl tia Devidi

Abigɛl tia Devidi

NYAHA nyandi ji i wama Devidi gulɔ pisoi ji hu, bi ngi biyei gɔɔ lɔ? Ngi biyei mia a Abigɛl. Ngi nɛmahu leengɔ wa yɛla. I Devidi mabawoilɔ kena yia waa va tia ngi mabla. Kɛɛ pɛiŋ mua yaa kaa wue kɔlongɔ ji ma, mu tɔ lɛ pɛiŋ gbɔɔ yɛ a wue a Devidi.

Ji Devidi wimɛni Sɔɔl yeya, i liilɔ i lɔwu pui hu. Tao ngi ndeenga kɛ ngi bondeisia kpɛlɛ ti tooilɔ na ngi woma. Numu 400 mia kinii tooni na ngi woma. Ta mia yɛ looni ti kpɛlɛ gulɔ. Devidi lilɔ naa Moab mahin gama i nde ngi ma yɛɛ: ‘Kɔnɛ le, gbɛ nya kɛkɛ tia nya nje ti lo bi gama haŋ ngi kɔɔ gbɔɔ Ngewɔ a pie nya va.’ Na woma, Devidi tia ngi womabla ti tatoilɔ naa a lɔwu la ngiyisia hu.

Hindei ji woma mia Devidi tia Abigɛl ti lɔni. Abigɛl hini Nebal yɛni wɔɔ a kpatɛmɔ wa lɔ. Mbalanga 3,000 kɛ nje 1,000 mia yɛ ngi yeya. Kɛɛ Nebal wuehinda nyamungɔ wa yɛla. Kɛɛ ngi nyahin hinda yekpengɔ wa yɛla. Wati yia ma, i ngi mabla mabawoilɔ. Mu tɔ lɛ sia na ye wueni.

Devidi tia ngi womableisia ti kpekpeya wa wueilɔ a Nebal. Ti yɛɛ a ngi mbalanga mahugbe. Fale, foo yia ma ji Devidi yɛ ŋanyakpa lɔlei hu, i hinga lɛnga looilɔ Nebal gama kɔ i gbɔ ngi ma. Ji ye hingei jisia ti foni, ti mɛini Nebal a ngi yeenga ti mayumbuisia leetee. Komɛ wati mia yɛla, tao mɛhɛ gboto wa yɛɛ Nebal yeya mɛva. Fale hingei jisia ti ndeilɔ tɛɛ: ‘Ji mu yɛ bi gama, mu kpekpeya wa wueilɔ a bie. Mui bi mbala yia bɛ humani, kɛɛ mu gbɔilɔ bi ma a ti mahugbe la. Fale naa, kɔne le, mu gɔ a mɛhɛ wulo.’

Nebal yɛpɛilɔ nyamungɔ ti gama, tao i yɛpɛilɔ nyamungɔ kɔlongɔ Devidi ma. Kɛ i ndenga ti ma yɛɛ: ‘Ngɛɛ nya mɛhɛ ve wu nyikɔ wɛ.’ Ji hingei jisia ti yamani ti ji hugɛ a Devidi, i lileeilɔ wa kɛ i ndenga yɛɛ: ‘A wu gɔboweisia wumbu.’ Kɛ ti mbumbunga kɔ ti li ti Nebal waa tia ngi mableisia.

Nebal womamɔ yila na kpɛlɛ humɛilɔ Nebal yɛ ndeni, kɛ i ya i hugɛ a Abigɛl. Gama kɛ Abigɛl hinjenga i mɛhɛ wulo lɛtɛma, i too jakasi mahu kɛ i gbujanga pili hu kɔ i li i fe Devidi wɛ. Ji tia Devidi ti gomɛni, i gbujailɔ jakasi mahu kɛ i mawɛlɛnga Devidi gɔɔbu i nde yɛɛ: ‘Kɔnɛ le ndemui, baa wolo nya hini Nebal ma. Kpowamɔ mia a ngie tao kpowa hinda lee mia a pie. Mɛhɛ wulo gbe, kɔnɛ le hou bi manu mu ma, tao bi lema na ma wueni.’

Kɛ Devidi ndenga ngi ma yɛɛ: ‘Nɛmahuleemɔ mia a bie. Bi nya mabawonga Nebal waa va. Li bi ye pɛɛla a ndilɛli.’ Ji Nebal haani, Abigɛl woteilɔ a Devidi nyahin.