Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 54

Kpayamɔ Wai

Kpayamɔ Wai

KPAYAMƆ wai na wɔɔ yɛ ndunyi ji ma bi ngi biyei gɔɔ lɔ? Ngi biyei mia a Samsin. I yɛni a nyama yia lɔ wɔɔ Isuɛl. Jɛhova mia kpayei veni ngi wɛ. Pɛiŋ taa ya ngi le, Jɛhova ndeilɔ ngi nje ma yɛɛ: ‘Bi wama hindolo le maa sange, ta mia a Isuɛlbleisia mabawo Filistiabla yeya.’

Filistiabla ti yɛ Kenaan lɔlei hu lɔ tao ti nyamungɔ wa yɛla. Kɔgɔbla ti yɛɛ ti yeya kpoto tao ti yɛɛ a nyamu a Isuɛlbleisia huleengɔ gboŋ. Foo yia ma, ji Samsin yɛ lima Filistiabla gama, kɔli lakpa wa yia wailɔ ngi mahu a gbele. Bi kɔɔ lɔ gbɔɔ Samsin pieni? I paailɔ a ngi loko gbami. Tao i Filistiabla waailɔ nahi ti leengɔ hɔndɔ gboto ma.

Wati leengɔ woma, Samsin loilɔ a nyaha yia nahi ngi biyei mia a Dilaila. Filistiabla ti ndeilɔ Dilaila ma tɛ ta ngi gɔlɔ a kani gole taosi gboto ina i hugɛilɔ a tie sia ta ye gu la Samsin ma. Dilaila hamingɔ wa yɛla navui na va. Ii yɛ loni a Samsin tao ii yɛ loni a Ngewɔ mabla. Fale, i yɛɛ a Samsin mɔli kɔ i nde ngi ma gbɔɔ piengɔ ngi gbayangɔ wa.

Na kpɛlɛ leengɔ woma, Dilaila guilɔ naa Samsin ma kɔ i hugɛ a ngie mia ngi gbayei laani na. Kɛ Samsin ndenga ngi ma yɛɛ: ‘Sia wɔɔ gba tii ya nya wu weleni. Pɛiŋ taa ya nya le, Ngewɔ loko looilɔ nya ma kɔ ngi wote a Nasalaitimui. Ti nya wui welenga, nga baa lɔ a kpayei na nya hu.’

Ji Dilaila ji hu gɔɔni, i pieilɔ Samsin i la ngi gɔɔ ma i yii kɛ i hindo yia loinga kɔ i wa i ngi wui wele. Ji Samsin wuni, kpaya gbi ii yɛ ngi hu. Na woma, Filistiabla ti wailɔ naa ti ngi hou, kɛ ti ngi yami venjɔ gbua hu, kɛ ti ngi wotenga a ti luwei.

Foo yia ma, Filistiabla ti komɛ wa houilɔ kɔ ti tato ve ti yewɔi wɛ, Degɔn. Ti Samsin gbuailɔ kpindi wɛɛ bu kɔ i wa i ti yaloli. Pɛiŋ ta yaa ngi gbua kpindi wɛɛ bu, ngi wundiei lolangɔ yɛla. Samsin ndeilɔ naa hindolupui na ma yɛ houni ngi lukui ma yɛɛ: ‘Pie ngi loko wɛɛ ndɔkoi nasia ma ti houni pɛɛ ji ma.’ Kɛ Samsin hɛnga Jɛhova gama kpayei va. Kɛ i loko wɛlɛnga ndɔkoisia ma i nde ngeleya yɛɛ: ‘Pie mua Filistiabla mu haa a lenga.’ Filistiabla ti 3,000 mia ti yɛ pɛɛ na bu. Ji Samsin ligbini ndɔkoisia ma, pɛɛ wooilɔ kɛ ti kpɛlɛ ti haanga.