Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 34

Isuɛlbleisia Ti Mɛhɛ Nina Majɔɔilɔ

Isuɛlbleisia Ti Mɛhɛ Nina Majɔɔilɔ

BI KƆƆ lɔ gbɔɔ nungei jisia ti tɛtɛma ma ndɔɔmi? Mɛhɛ mia. Kolengɔ fofo tao kpuangɔ a mbavuka.

Ngawu yia mia naa kinii i gunga la ji Isuɛlbleisia ti gbuanga Iijipt. Tia lɛ tuŋ ŋanya lɔlei hu. Tuhaiŋ ii gbotoni a gbekpe na, fale Isuɛlbleisia ti tatoilɔ a gbonyɛ la ta nde tɛɛ: ‘A yɛɛ a fisa ina Jɛhova yɛ mu waailɔ Iijipt. Gbɛva see mu yɛɛ a mɛhɛ mɛ na sia mu longɔ la.’

Kɛ Jɛhova ndenga Mojisi ma yɛɛ: ‘Ngi pie ma mɛhɛ i gbua ngelegohu i wu.’ Tao himia Jɛhova pieni. Fuli yepekei ma a ngendei, ji Isuɛlbleisia ti haiŋ guwi ji lɔni ndɔɔmi, ti yɛɛ a ti nyɔunyɔu mɔli, tɛɛ: ‘Gbɔɔ a ji?’

Kɛ Mojisi ndenga ti ma yɛɛ: ‘Mɛhɛ ji mia Jɛhova fenga wu wɛ mɛ va.’ Ti ye mɛhɛ ji lolilɔ a MANAA. Nɛɛngɔ yɛla sia lee keki na na ta kpatɛ a kɔmi.

Mojisi ndeilɔ naa ti ma yɛɛ: ‘Na lee a gu numu bi va ta mia kungɔ bi tɛma.’ Tao himia ti yɛ a pie ngenda gbi. Kɛɛ ye mɔnui na yɛ a lo ndɔɔmi, i yɛɛ a wu ji fuli a gbua.

Mojisi ndeilɔ gbɔma ti ma yɛɛ: ‘Numu gbi aa mɛhɛ ji looma gbatɛ fuli yepekei va.’ Kɛɛ ti lɛnga tii woloni na ma Mojisi ndeni. Bi kɔɔ lɔ gbɔɔ yɛ a wue ji ngee yɛ a wo ma? Kpolisia mia ti yɛ a wu hu, tao ye kui yɛɛ a gbua.

Kɛɛ fuli ye weitei ma, Jɛhova ndeilɔ ti ma kɔ ti manaa lɛma foo fele va, gbɛva see fuli ye wɔfilei ma, manaa ɛɛ wu. Ji ti yɛ a tooma gbatɛ fuli ye wɔfilei va ii yɛ a kunyamu gbua tao kpolinga tii yɛ a wu hu. Kabandema hinda yeka mia a na!

Manaa mia Jɛhova yɛ a fe Isuɛlbleisia wɛ haŋ ti gbua ŋanya lɔlei hu.