Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 53

Jɛfita Lahedi Wumbuilɔ

Jɛfita Lahedi Wumbuilɔ

BI LAHEDI wumbunga wɔɔ gba hinda wue va kɛ bi tɔnga kɛ kpaukpaungɔ pie va? Na mia wueni a kini ji bi ngi lɔ ma pisoi ji hu. Na va mia bi ngi lɔ ma ngi lii nyaningɔ. Ngi biyei mia a Jɛfita, ta bɛ yɛni a kitileemɔ yia lɔ wɔɔ Isuɛl.

Wati na Jɛfita yɛ na, Isuɛlbleisia tii yɛ a Jɛhova vɛi. Ti tatoilɔ gbɔma a hinda nyamuisia wue la. Fale, Jɛhova ti waailɔ Amɔnbleisia yeya kɔ ti ti ya mɔnɛ. Ji pieilɔ Isuɛlbleisia ti wɔɔ Jɛhova gama tɛɛ: ‘Mu jumbu ma hinda wuenga a bie, dae le, mu ma bawo!’

Isuɛlbleisia ti kɔɔilɔ kɛ ti jumbu ma hinda wuenga, fale ti tatoilɔ gbɔma a Jɛhova vɛi la. Tao Jɛhova manuilɔ ti ma gbɔma.

Isuɛlbleisia ti loko looilɔ naa Jɛfita ma kɔ i loo ti gulɔ ti kɔ wɛɛ Amɔnbleisia ma. Kɛɛ Jɛfita longɔ yɛla Jɛhova i gbɔ ngi ma kɔ i gu Amɔnbleisia ma. Fale i hɛ wueilɔ Jɛhova gama kɛ i lahedi wumbunga yɛɛ: ‘Ina bi pieilɔ ngi gu Amɔnbleisia ma, ji nga yama, numui ye haala yi a gbua nya ye pɛɛbu wa va nya gulɔ, nga ngi ve lɔ bi wɛ.’

Jɛhova woloilɔ Jɛfita ma kɛ i pienga i gu Amɔnbleisia ma. Ji Jɛfita yamani, bi haala mui na gɔɔ lɔ wani ngi gulɔ? Ngi nyahalui mia, tao ndo yiakpi na mia yɛ ngi yeya. Fale Jɛfita wɔɔilɔ naa i nde yɛɛ: ‘Ee nya lui! Gbɛva mia bi pienga ndii nyani ma hindei ji bonda wama nya mai ma. Ngi lahedi wumbunga Jɛhova gama tao ngɛɛ mawali pie va.’

Ji Jɛfita lui kɔɔni kɛ lahedi na bonda mia ngi kɛkɛ mbumbunga, ngi lii nyanilɔ kulo. Gbɛva see i wama li maa i ngi kɛkɛ lo kɛ ngi ndiamuisia. Kɛɛ i lima yenge ma Jɛhova gula wɛlei bu lɔ Sailɔ, haŋ i lo hu i haa. Fale i ndeilɔ ngi kɛkɛ ma yɛɛ: ‘Bi lahedi wumbunga Jɛhova gama, kungɔ bi pie sia bi ndenga la.’

Na woma, Jɛfita lui lilɔ naa Sailɔ. Tao i yɛɛ Jɛhova gula wɛlei bu a yenge na haŋ i lo hu i haa. Fo gbi lee hu, Isuɛl nyahanga ti yɛ a li ta va ngi ma, tao tia tieni ta yɛɛ na a kohunɛ jii naani va. Nunga ti loilɔ a Jɛfita lui hinda jifa ngi gbekpengɔ wa yɛla.