Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 38

Hinga 12 Nasia Ti Lini Kenaan Manɛɛ Mi

Hinga 12 Nasia Ti Lini Kenaan Manɛɛ Mi

NGUWEI jisia lɔ lɛ ti hɛɛni nguli ji ma hingei jisia ti gbaki ma. Bia tɔ ma sia ti nyandengɔ la? Bi kɔɔ lɔ mia ti gbuani na a tie? Ti gbuani a tie Kenaan lɔlei hu lɔ. Bi kɔɔ lɔ kɛ Eblaham, Aisak, kɛ Jekɔb ti yɛɛ wɔɔ heini Kenaan lɔ hiye? Kɛɛ ndɔlei mia pieni Jekɔb tia ngi mableisia ti gbuani na, kɛ ti ya Iijipt. I hinje wati na ma, i too wati na ma Isuɛlbleisia ti yɛ yama ma Kenaan fo 216 mia naa leenga. Ti fonga naa hinda yia lɔ ta na loli a Kedɛs.

Nunga nyamuisia mia ti yɛ Kenaan lɔlei hu. Fale Mojisi hinga ti 12 looilɔ kɔ ti li ti Kenaan manɛɛ, kɛ i ndenga ti ma yɛɛ: ‘A li wu tɔ ina nunga ti lolɛ mia ti na, tao ina ti gahungoi. A tɔ gbɔma ina tuhaiŋ a gbekpe lɔ na. Tao wua lema wa va a nguwei lɛnga.’

Ji manɛɛblei jisia ti yamani Kedɛs, ti ndeilɔ Mojisi ma tɛɛ: ‘Kenaan lɔlei hu nyandengɔ wa huleengɔ gboŋ.’ Kɔ Mojisi bɛ i lala, ti nguwei lɛnga gɛilɔ a ngie. Kɛɛ ye manɛɛblei jisia ti 10 ti ndeilɔ tɛɛ: ‘Nungei nasia ti Kenaan lɔlei hu ti gbayangɔ wa. Ta mu kpɛlɛ waa lɔ, ina mu ndenga muɛ mu lapi maa a tie kɔ mu ti lɔlei gbua ti yeya.’

Ji Isuɛlbleisia ti ji humɛini, ti luwailɔ huleengɔ gboŋ. Kɛ ti tatonga a nde la tɛɛ: ‘A yɛɛ a fisa ina mu yɛ haailɔ Iijipt ɔɔ ŋanya lɔlei na hu. Ti wama naa mu waa ma, kɛ ti mu nyahangeisia kɛ mu lengeisia hounga ti li ti ti wote a nduwɔnga. A mu loko loo numu yeka ma i loo mu gulɔ kɔ mu yama Iijipt!’

Kɛɛ ye manɛɛblei jisia ti fele ti yɛɛ na nahi ti langɔ yɛla a Jɛhova. Ti yɛni a Jɔsua tia Kelɛb lɔ. Ti ndeilɔ Isuɛlbleisia ma tɛɛ: ‘Wua luwa, gbɛva see Jɛhova lɔ looni mu woma. Mua gulɔ mu lapi a tie mu ti lɔlei gbua ti yeya.’ Jɔsua tia Kelɛb ti lapilɔ Isuɛlbleisia ti lii nɛpɔ va kɛɛ tii woloni ti ma. Isuɛlbleisia ti longɔ yɛla pɛiŋ ti ti waa.

Ji pieilɔ Jɛhova lii i lewe huleengɔ gboŋ, kɛ i ndenga Mojisi ma yɛɛ: ‘Nasia kinii ti vui gungɔ a 20 tao teengɔ ma, tɛɛ fo Kenaan lɔlei hu. Gbɛva see sia bɛ ti kabandema hindei nasia gbi lɔnga ngi pieni Iijipt lɔlei hu kɛ ŋanya lɔlei hu, kɛɛ tuŋ tii lani a nge. Fale ngi pie ma ti leetee ŋanya lɔlei ji hu fo 40 va, haŋ ti kpɛlɛ ti haa. Kɛɛ lee Jɔsua tia Kelɛb tia mia ta waa Kenaan lɔlei hu.’